લાંચ કેસમાં આસિ. રજિસ્ટ્રારના રેગ્યુલર જામીન કોર્ટે ફગાવ્યા

નવગુજરાત સમય > અમદાવાદ

પાલડીની રજિસ્ટ્રાર ઓફિસના આસિસ્ટન્ટ રજિસ્ટ્રાર ધીરધારના લાઇસન્સની કાયદેસરની રૂ. 5000ની ફી સાથે લાંચના રૂ. 11,500 લેતા એસીબીની ટીમે નરેન્દ્ર ડાહ્યાભાઇ મોદીને ઝડપી પાડ્યો હતો. ત્યારબાદ આરોપીને જેલના હવાલે મોકલી આપ્યો હતો. જ્યાંથી તેણે કરેલી રેગ્યુલર જામીન અરજી સેશન્સ કોર્ટે ફગાવી દીધી છે.

રાજ્ય સરકારના ક્લાસ-3 ઓફિસર નરેન્દ્ર ડાહ્યાભાઈ મોદી અમદાવાદના પાલડી વિસ્તારમાં આવેલી રજિસ્ટાર ઓફિસમાં આસિસ્ટન્ટ રજિસ્ટાર તરીકે ફરજ બજાવે છે. તેમણે એક વ્યક્તિ પાસે ધીરાણ લાઇસન્સ આપવા માટે 16,500 રૂપિયાની માંગણી કરી હતી. જેમાંથી 5 હજાર રૂપિયા સરકારી ફી પેટે અને 11,500 રૂપિયા લાંચ પેટે માંગ્યા હતા. જોકે, જે તે વ્યક્તિએ આ અંગે એસીબીમાં જાણ કરી હતી. જેથી એસીબીએ ઘોડાસર પાસે લાંચ લેતા તેને રંગેહાથ ઝડપી જેલમાં મોકલી આપ્યો હતો. જ્યાંથી તેણે રેગ્યુલર જામીન માટે અરજી કરી હતી. જેમાં એવી રજૂઆત કરી હતી કે, હું નિર્દોષ છું, ખોટી રીતે સંડોવી દેવામાં આવ્યો છે, કોર્ટ પાસે જામીન આપવાની સત્તા છે અને કોર્ટ જામીન આપે તો તમામ શરતોનું પાલન કરવા તૈયાર છું.

જો કે, અરજીનો વિરોધ કરતા સરકારી વકીલ વર્ષાકિરણ રાવે એવી રજૂઆત કરી હતી કે, આરોપી સામે ગંભીર કેસ છે, આ પ્રકારના કિસ્સા વધી રહ્યાં છે, સરકારી કચેરીઓમાં કરપ્શન કેન્સરની જેમ વધી રહ્યું છે ત્યારે આરોપીને જામીન ન આપવા જોઇએ. કોર્ટે બન્ને પક્ષની રજૂઆત બાદ આરોપીના જામીન ફગાવી દીધા છે.