લાખોના પાર્ટી ડ્રગ્સના સપ્લાયર- ખરીદદાર કોણ? પોલીસની તપાસ

નવગુજરાત સમય > અમદાવાદ

હવે ગુજરાત પણ બીજું પંજાબ થવાના માર્ગે જઇ રહ્યું હોય તેમ લાગી રહ્યું છે. ગુજરાતનું યુવાધન જીવલેણ પાર્ટીડ્રગ્સની લતે ચઢી ગયું છે ત્યારે ગુજરાતમાં ઠલવાનાર એમડી ડ્રગ્સનો ૮૯ લાખનો જથ્થો ATSની ટીમે નવસારીથી ઝડપી લીધો હતો. ડ્રગ્સ સાથે ઝડપાયેલા ત્રણ ઇસમોની સ્થાનિક પોલીસે પૂછપરછ આદરી છે. તેઓ મુંબઇના એક નિગ્રો પાસેથી આ ડ્રગ્સ લાવ્યા હોવાનું તપાસમાં બહાર આવ્યું છે પરંતુ તેઓ આ ડ્રગ્સ ગુજરાતના કયા શહેરોમાં અને કોને પહોંચાડવાના હતા તેની તપાસ માટે પોલીસે સાત દિવસના રિમાન્ડ મેળવ્યા છે. આ રેકેટમાં કોઈ હાઇપ્રોફાઇલ સંડોવણી છે કે કેમ તેની તપાસ પણ ચાલી રહી છે.

છેલ્લા ઘણા સમયથી ગુજરાત ATS અને પોલીસ રાજ્યમાં ચાલી રહેલા ડ્રગ્સના રેકેટ પર નજર રાખી રહી છે. જેને કારણે જ અમદાવાદની ઝાક GIDCમાં ચાલતા ઇન્ટરનેશનલ ડ્રગ્સ રેકેટનો પર્દાફાશ થયો હતો. આટલું મોટું રેકેટ પકડાયા બાદ પણ હજુ સુધી ગુજરાતમાં અન્ય રાજ્યોમાંથી મોટા પાયે ડ્રગ્સ ઠલવાઇ રહ્યું છે. પોલીસ તપાસમાં એવું સામે આવ્યું હતું કે, હાઇપ્રોફાઇલ પાર્ટીઓમાં યુવાનો મસ્તીથી ઝુમવા અને ઉન્માદની ચરમસીમાએ પહોંચવા માટે લાખો રૂપિયામાં વેચાતા આ મોતના સામાનનો સહારો લેતા હોય છે. માત્ર યુવાનોની પાર્ટીઓમાં જ નહિ પરંતુ અમદાવાદ, સુરત અને વડોદરા જેવા મહાનગરોમાં ધનિક મહિલાઓ પણ પાર્ટીમાં ઝુમવા માટે પાર્ટી ડ્રગ્સનો સહારો લેતી હોવાનું જાણી શકાયું છે.

ગુજરાત ATSના બી.એચ. ચાવડા અને મનિષ ઠાકરની ટીમને બાતમી મળી હતી. નવસારી પાસે એમડી ડ્રગ્સની ડીલીવરી થવાની છે. પોલીસ ત્યાં વોચમાં ગોઠવાઇ ગઇ હતી. ત્યારે જ બાઇક ઉપર ગૌરાંગ વિરજીભાઇ ટંડેલ (રહે. કાકવાડી મચ્છીવાડ. વલસાડ) ડગ્સની ડિલિવરી આપવા આવ્યો હતો અને નિમેષ જયંતિલાલ પટેલ (વલસાડ) તથા ભાવેશ ઇશ્વરભાઇ પટેલ (નવસારી) તે ડિલિવરી લેવા માટે આવ્યા હતા.ત્યારે જ ATS ત્રાટકી હતી અને તેમને રૂપિયા ૮૯ લાખના ડ્રગ્સ સાથે ઝડપી લીધા હતા.

હાલ તો નવસારી પોલીસે નિમેષ અને ભાવેશ પાસેથી તેઓ આ ડ્રગ્સ કોને પહોંચાડવાના હતા તથા અન્ય ડ્રગ્સ સપ્લાયરોની વિગતો મેળવવા માટે કવાયત કરી રહી છે. કેમકે અમદાવાદની માફક દક્ષિણ ગુજરાતમાં પણ ધનિક યુવાનો મોટા પ્રમાણમાં ડ્રગ્સના આદી બની ગયા છે. માટે જ પોલીસ આ રેકેટના મૂળ સુધી જવા માટે મહેનત કરી રહી છે.

શહેરના પોશ વિસ્તારમાં ડ્રગ્સ સપ્લાયરો સક્રિય

અમદાવાદના પોશ વિસ્તારોમાં ટોળે વળીને બેસી રહેતા નબીરાઓને તેઓ માંગે ત્યારે અને માંગે તેટલું ડ્રગ્સ સપ્લાય કરતા સપ્લાયરો સક્રીય છે. ખાસ કરીને મુંબઇ કે અન્ય રાજ્યોમાંથા લવાતું લાખો રૂપિયાનું ડ્રગ્સ અમદાવાદમાં ઠલવાઇ રહ્યું છે.