મેડિકલ રિએમ્બર્સમેન્ટના બિલ પર સહી માટે સિવિલમાં ‘વહીવટ’ કરવો જ પડે

નવગુજરાત સમય > અમદાવાદ

– સરકારી, અર્ધસરકારી તેમજ ઘણી ખાનગી સંસ્થાઓમાં નોકરી કરતા કર્મચારીઓ માટે મેડિકલ રિએમ્બર્સ મેળવવા માટેની એક વ્યવસ્થા છે. આ વ્યવસ્થા અંતર્ગત કર્મચારી અથવા તેના પરિવારના કોઈ સભ્યને બીમારી લાગુ પડી હોય તો મેડિક્લેમ ઉતારતી કંપની સારવાર પાછળ થયેલા ખર્ચનું વળતર આપતી હોય છે. જોકે વળતર મેળવવા કર્મચારીએ હોસ્પિટલના RMO (નિવાસી તબીબી અધિકારી)ની કાઉન્ટર સહી લેવી ફરજિયાત હોય છે ત્યારે અમદાવાદ સિવિલમાં આ અંગે ભ્રષ્ટાચાર ચાલતો હોવાની ફરિયાદો ઊઠી છે. એટલું જ નહીં સુપરિન્ટેન્ડન્ટ સુધી ફરિયાદો થઈ છે. નામ ન આપવાની શરતે એક દર્દીએ કહ્યું કે, તે છેલ્લા એક અઠવાડિયાથી RMO ઓફિસના ચક્કર લગાવી રહ્યો હતો તેમ છતાં તેના મેડિકલ રિએમ્બર્સમેન્ટના બિલ પર અધિકારીની સહી મળતી નહોંતી, પણ તેમણે RMO ઓફિસના એક કર્મચારીનો સંપર્ક સાધતા માત્ર દસ મિનિટમાં બિલો પર સહી થઈ હતી. સિવિલના RMO પર દર્દીઓની ફાઈલો ગુમ કર્યાના ભૂતકાળમાં આક્ષેપો થઈ ચૂક્યા છે. હોસ્પિટલ સુપરિન્ટેન્ડન્ટની પોસ્ટ પછી નિવાસી તબીબી અધિકારીની પોસ્ટ મહત્વની હોય છે. હોસ્પિટલ સૂત્રો કહે છે કે, સિવિલ હોસ્પિટલમાં ઘણા સિનિયર સિટિઝન્સ અને બીમાર વ્યક્તિઓ મેડિકલ રિએમ્બર્સમેન્ટના બિલો પર સહી કરાવવા સવારે આઠ વાગ્યાથી લાઈનમાં આવીને બેસી જાય છે, પણ ડૉક્ટર સાહેબ ક્યારેય સવારે 10 વાગ્યા પહેલા આવતા નથી. આ ઉપરાંત બપોરે એક વાગ્યે દર્દીઓની ગમે એટલી ભીડ હોય તો પણ ડૉક્ટર સાહેબ ઓફિસ બંધ કરી ‘વામકુક્ષી’ કરી ત્રણ વાગ્યા બાદ ઓફિસનો દરવાજો ખોલે છે ત્યારબાદ સાંજે 4.45ના ટકોરે ઓફિસ બંધ કરી ડૉક્ટર સાહેબ રવાના થઈ જતા હોય છે. મેડિકલ રિએમ્બર્સની સહી માટે આવેલા બાકીના લોકોને બીજા દિવસે બોલાવવામાં આવે છે. રાજ્ય સરકારની એક પણ ઓફિસમાં બપોરે ત્રણ કલાક રીસેસનો નિયમ નથી ત્યારે સિવિલના આ ડૉક્ટર સાહેબ અને તેમના મળતીયાઓ માટે બે કલાકની રીસેસનો અલાયદો નિયમ ઘડવામાં આવેલો છે. યુ.એન.મહેતા હોસ્પિટલ, કિડની હોસ્પિટલ, કિન્સર હોસ્પિટલ સહિત અમદાવાદ શહેર નજીકની હોસ્પિટલમાં દાખલ દર્દીઓ મેડિકલ રિએમ્બર્સમેન્ટ માટે અમદાવાદ સિવિલમાં આવે છે. સિવિલના ડૉક્ટરો કહે છે કે, હોસ્પિટલ આરએમઓ શારીરિક રીતે સક્ષમ નથી. તેમ છતાં કેમ તેમને આટલી મહત્વની પોસ્ટ પર રાખવા આવ્યા છે તેની પાછળનું રહસ્ય સમજાતું નથી.