પીધેલી હાલતમાં પોલીસને ફોન કરીને પીએમ મોદીને મારવાની વાત કરવી ભારે પડી

નવી દિલ્હીઃ વ્યક્તિ નશામાં ડૂબી જાય પછી નશો તેના પર હાવી થઈ જતો હોય છે. આવામાં ઘણાં કિસ્સામાં એવું બનતું હોય છે કે વ્યક્તિ શું કરે છે અથવા શું બોલે છે તેનું તેને પોતાને જ ભાન ના રહેતું હોય. નવા વર્ષની ઉજવણીમાં ચિક્કાર દારુ ઢીંચવાનું યુવકને ભારે પડી ગયું. દિલ્હીમાં બનેલા એક કિસ્સામાં સામે આવ્યું છે કે, એક શખ્સ એટલો દારુ ઢીંચી ગયો કે તે પોતાનું માનસિક સંતુલન ગુમાવી બેઠો અને દેશના વડાપ્રધાન નરેન્દ્ર મોદીને મારવાની ધમકી આપવા માટે સીધો પોલીસને જ ફોન કરી દીધો. (સાંકેતિક તસવીર)

રાજધાની દિલ્હીમાં બનેલી આ ઘટનામાં એક શખ્સે ફોન કરીને વડાપ્રધાન મોદીને મારી નાખવાની ધમકી આપી દીધી. ધમકી આપતા આ ફોન પછી દિલ્હી પોલીસ પણ દોડતી થઈ ગઈ હતી. આખરે પોલીસે તપાસ કરીને આ શખ્સને પકડી લીધો છે.

આ શખ્સે ફોન પર કહ્યું હતું કે, વડાપ્રધાન મોદીને મારવા માટે 30 કરોડ રુપિયાની સોપારી આપશે. પોલીસે આ પ્રકારની ધમકી આપનારા શખ્સને તાત્કાલિક પકડી પાડ્યો. પોલીસના જણાવ્યા પ્રમાણે આ શખ્સનું નામ પિંટુ સિંહ છે અને તેની ઉંમર 30 વર્ષની હોવાનું કહેવાઈ રહ્યું છે.

પિંટુ નશામાં એટલો ડૂબેલો હતો કે તે કોને ફોન કરીને શું વાત કરી રહ્યો છે તેનું ભાન જ નહોતું. તેણે PCRમાં ફોન કરીને વડાપ્રધાનને મારવાની સોપારી આપવાની વાત કરી હતી. પોલીસે આ ફોન પછી તાત્કાલિક તપાસ શરુ કરી હતી અને પિંટુનું ઘર શોધી કાઢ્યું હતું. કેટલાક ન્યૂઝ રિપોર્ટમાં આ શખ્સની ઓળખ નીતિન તરીકે પણ કરાઈ હોવાનું જણાવાયું છે.

નશામાં ધમકી આપનારો શખ્સ સુથારી કામ કરે છે અને તે દિલ્હીના સાગરપુર વિસ્તારમાં રહે છે.

જ્યારે પોલીસે પિંટુને તેના ઘરેથી જ પકડી પાડ્યો ત્યારે તે સંપૂર્ણ રીતે નશાની હાલતમાં હોવાનું જાણવા મળી રહ્યું છે જોકે, આ અંગે વિસ્તૃત માહિતી નથી મળી રહી. પોલીસે પિન્ટુની ધરપકડ કરીને આગળની કાર્યવાહી શરુ કરી છે.