અમદાવાદઃ કોરોનાની મહામારીના કપરા સમયમાં દર્દીઓ માટે જીવનદાયક બનેલી ટોસિલિઝુમેબ ઈન્જેક્શનના કાળાબજારી વિશે ઘણી ખબરો સામે આવી રહી છે. એવામાં શનિવારે ગુજરાત ફૂડ એન્ડ ડ્રગ કન્ટ્રોલ એડમિનિસ્ટ્રેશને નકલી ટોસિલિઝુમેબ દવા બનાવીને વેચવાનું એક કૌભાંડ પકડતા ખળભળાટ મચી ગયો. હોસ્પિટલના IUC અને વેન્ટીલેટર પર રહેલા કોરોનાના દર્દીઓ માટે આ ઈન્જેક્શન ખૂબ જ જરૂરી બની જાય છે.
હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:
નકલી દવાના કૌભાંડમાં પકડાયેલા લોકોએ સોહેલ ઈસ્માઈલી તાઈ નામના વ્યક્તિનું નામ આપ્યું છે, જે જેનિક ફાર્મા નામની વેબસાઈટનો માલિક અને કૌભાંડનો મુખ્ય ષડયંત્રકારી છે. FDCAને શંકા છે કે ગેંગે કેટલાક ગ્રાહકોને આ નકલી ઈન્જેક્શન વેચ્યા હોઈ શકે છે. આ કૌભાંડ અમદાવાદ અને સુરતમાં ચાલી રહ્યું હતું.
FDCA કૌભાંડનો પીછો કરતા અમદાવાદની સંજીવની હોસ્પિટલ સુધી પહોંચ્યા હતા, જ્યાં હોસ્પિટલ બહારથી એક દર્દીએ આ દવા ખરીદી હતી. કૌભાંડ વિશે વધુ જાણકારી આપતા FDCAના ચીફ એચ.જી કોશીએ કહ્યું, સાબરમતીની મા ફાર્મસીના અક્ષય શાહ અને આશિષ શાહ ટોસિલિઝુમેબના 4 બોક્સ ચાંદખેડાના જીમ કોચ હર્ષ ઠાકોર પાસેથી બિલ વગર 80,000 રૂપિયામાં ખરીદ્યા હતા. ઠાકોરે આ દવા પાલડીમાં હેપ્પી કેમિસ્ટના નિલેશ લાલીવાલા પાસેથી 70,000 રૂપિયામાં ખરીદી હતી. જેણે આ દવા સુરતના સોહેલ તાઈ પાસેથી ખરીદી હતી.
આ સમગ્ર કૌભાંડ ત્યારે સામે આવ્યું જ્યારે એક દર્દીના સંબંધીએ મા ફાર્મસીમાંથી ટોસિલિઝુમેબ 10mlના ત્રણ બોક્સ ખરીદ્યા. આ દરેક દવાના બોક્સ પર ટોસિલિઝુમેબ એક્ટેમરા 250mg પ્રિન્ટ કરેલું હતું. તેમને બિલ વગર આ દવા 1.35 લાખ રૂપિયામાં વેચવામાં આવી. કૌભાંડના મુખ્ય સૂત્રધાર એવા સોહેલ તાઈની ધરપકડ હજુ કરવાની બાકી છે.
કૌભાંડ સામે આવ્યા બાદ FDCAએ સંજીવની હોસ્પિટલમાં એડમિટ દર્દીના ડોક્ટરનો સંપર્ક કર્યો અને તેમને જાણવા મળ્યું કે ગ્રાહકે ખરીદેલી દવામાંથી એક શીશીનો ડોઝ દર્દીને આપી દેવાયો છે. કોશીએ કહ્યું, દર્દી લતાબેનને આ નકલી દવા આપ્યા બાદ કોઈ નુકસાન થયું નથી. આ કદાચ દેશનું પહેલું નકલી ટોસિલિઝુમેબ દવા વેચવાનું કૌભાંડ છે. ઘટનામાં ક્રાઈમ બ્રાન્ચમાં FIR નોંધાવવામાં આવી છે.
કોશીની ટીમ ગુરુવારથી જ આરોપીઓની પાછળ પડી છે. તેમણે સુરતના રાંદેર વિસ્તારમાં શુક્રવારે રાત્રે એક એપાર્ટમેન્ટમાં રેડ પાડી હતી, જ્યાંથી આ નકલી દવા, તથા પેકિંગ મટિરીયલ સહિત 8 લાખનો મુદ્દામાલ ઝડપી લીધો હતો.
આ પણ જુઓઃ કોરોના વાયરસને માત આપીને ઘરે પહોંચેલી યુવતીનું અનોખી રીતે કરાયું સ્વાગત