ગુરુગ્રામ- CBI અને EDના કર્મચારી બનીને લોકો પાસેથી પૈસાની વસુલી કરનાર પિતા-પુત્રની એક જોડીની ગુરુગ્રામ પોલીસ દ્વારા ધરપકડ કરવામાં આવી છે. પોલીસના જણાવ્યા અનુસાર, આ બન્ને આરોપીઓએ ફરિયાદીને ધમકી આપી હતી કે જો તેમને ચાર કરોડ રુપિયા આપવામાં નહીં આવે તો દરોડા પાડવામાં આવશે અને ખોટા કેસમાં ફસાવી દેવામાં આવશે. મુખ્ય આરોપીની ઓળખ યશપાલ અરોરા તરીકે થઈ છે. યશપાલના પત્ની, દીકરો અને અન્ય સાથીઓ આ કામમાં સાથ આપતા હતા.
ગુરુગ્રામના એક નિવાસી અને ભારતીય જનતા પાર્ટીના સભ્ય યશપાલ બત્રાએ ગત સપ્તાહમાં પોલીસ સ્ટેશનમાં ફરિયાદ નોંધાવી હતી કે ફેક કેસની ધમકી આપીને તેમની પાસેથી પૈસાની માંગ કરવામાં આવી રહી છે. આ ફરિયાદ પછી પોલીસને સમગ્ર બાબતની જાણ થઈ હતી. એસીપી પ્રીત પાલ સંગવાન જણાવે છે કે, ફરિયાદી વિરુદ્ધ કોઈ પણ કેસ દાખલ કરવામાં નથી આવ્યો તેમ છતા આરોપીએ દાવો કર્યો હતો કે ઈડી દ્વારા તેમની સંપત્તિની તપાસ કરવામાં આવી રહી છે અને કેસ ફાઈલ કરવાની યોજના બની રહી છે. આરોપીએ કહ્યુ હતું કે, જો પૈસા ચૂકવવામાં આવશે તો તેઓ અધિકારીઓ સાથે વાત કરશે અને કેસ પાછો ખેંચવાની અપીલ કરશે.
ન્યુ કોલોની પોલીસ સ્ટેશનમાં સેક્શન 384, 385, 386, 489, 506 અને 120બી અંતર્ગત આરોપીઓ વિરુદ્ધ ફરિયાદ દાખલ કરવામાં આવી છે. આરોપીઓને પકડવા માટે એક ટીમ તૈયાર કરવામાં આવી હતી. પોલીસે ફરિયાદી શખ્સના માધ્યમથી આરોપીને સંદેશ મોકલાવ્યો કે તેઓ બે લાખ રુપિયા આપવા તૈયાર છે. આરોપીએ બુધવારની સાંજે પોતાના એક માણસને પૈસા લેવા માટે મોકલ્યો હતો. જ્યારે તે પૈસા લઈ રહ્યો હતો તે જ સમયે પોલીસે ધરપકડ કરી લીધી હતી.
પ્રાથમિક તપાસ દરમિયાન પોલીસને જાણકારી મળી કે, પિતા-પુત્ર આ પહેલા પણ સીબીઆઈના એક કેસમાં ચાર વર્ષ જેલની સજા કાપી ચૂક્યા છે. આરોપીએ પોતાનો ગુનો કબૂલ્યો અને જણાવ્યું કે તેમણે આ પહેલા દસ લાખ રુપિયા પડાવ્યા છે. આ પહેલા પણ ઈડીના અધિકારી બનીને તેમણે ઘણાં લોકોને છેતર્યા છે. પોલીસે જણાવ્યું કે, અમને આશા છે કે અન્ય પીડિતો પણ સામે આવશે અને અમારો સંપર્ક કરશે.