‘સેપ્ટ’ યુનિવર્સિટી સામે લુખ્ખાગીરી પોલીસ FIR કરી તો લારી સળગાવી!

નવગુજરાત સમય > અમદાવાદ

‘સેપ્ટ’ યુનિવર્સિટી સામે ઊભી રહેતી ખાણી-પીણીની લારીઓ ઉપર બે ટપોરી ત્રણ દિવસથી આતંક મચાવતા હોવાની ફરિયાદ છતાં પોલીસે કાર્યવાહી ન કરતાં બે લુખ્ખાએ એક લારી સળગાવી છે. લારીઓમાં તોડફોડની ફરિયાદમાં યુનિવર્સિટી પોલીસે કાર્યવાહી ન કરતાં બે દિવસ પછી ઓમલેટની લારી ધમકી આપ્યા બાદ સળગાવી દેવાઈ હતી. મોહન રબારી અને ઉમંગ રબારી નામના શખ્સો પોલીસ ફરિયાદ છતાં પકડાયાં નથી.

ખાનપુરમાં રહેતા રોનક અશોકભાઈ પરમારે ફરિયાદમાં જણાવ્યું છે કે, સેપ્ટ યુનિવર્સિટી સામે પોતે રોનક ઓમલેટ નામે ધંધો કરે છે. ગત તા. 18ના રોજ રાત્રે 9 વાગ્યાના અરસામાં સામે આવેલી ત્રિપાઠી પાન પાર્લર નામની લારી ઉપર મોહન રબારી અને ઉમંગ રબારીએ ધીરેન્દ્ર ત્રિપાઠી સાથે ઝઘડો કર્યો હતો. આ સમયે રોનક પરમાર વચ્ચે પડ્યા હતા. આ બનાવના એક કલાક પછી મોહન રબારી અને ઉમંગ રબારીએ એક્ટિવા ઉપર રોનક પાસે આવીને ‘તું અમને ઓળખતો નથી, અમે આ વિસ્તારના દાદા છીએ’ કહીને લારી સળગાવી દેવાની ધમકી આપી હતી. આ પછી તા. 19ના રાત્રે 4 વાગ્યાના અરસામાં લારી સળગાવી દેવામાં આવી હતી. સ્વિફ્ટ કારમાં આવેલા ઉમંગ, મોહન અને અન્ય બે શખ્સોએ લારી સળગાવી હોવાની ફરિયાદ નોંધાવાઈ છે. પાનના ગલ્લાવાળા ધિરેન્દ્ર ત્રિપાઠી અને કોલ્ડ કોફીવાળા જયદિપ શાહે ફરિયાદ નોંધાવી હતી. ત્રણ-ત્રણ ફરિયાદ છતાં યુનિવર્સિટી પોલીસ બે ‘ટપોરી’ને પકડતી નહીં હોવાના મુદ્દે ચર્ચા જાગી છે.

યુનિ. પોલીસ સ્ટેશનમાં એક મહિનાથી PI નથી!
યુનિવર્સિટીના પીઆઈ જે.એસ. બારીયા ગત તા. 24 નવેમ્બરથી ‘સીક લીવ’ ઉપર છે. PI બારીયા માંદગીની રજા ઉપર ઉતર્યા તે પાછળ અનેક કારણોની ચર્ચા થઈ રહી છે. એક મહિનાથી યુનિવર્સિટીનો હવાલો નવરંગપુરા PI આર.વી. દેસાઈ પાસે છે. યુનિવર્સિટી જેવું મહત્વનું પોલીસ સ્ટેશન ઉચ્ચ અધિકારીઓ PI વગર કેમ ચલાવે છે? તે અનેક લોકોને સમજાતું નથી.