વટવા GIDCના ટોરેન્ટ પ્લાન્ટમાં ભીષણ આગ

નવગુજરાત સમય > અમદાવાદ

– વટવા જીઆઈડીસી ફેઝ ૪માં બંધ થઈ રહેલા ટોરેન્ટ પ્લાન્ટમાં આજે ડિમોલીશન દરમિયાન એકાએક આગ ભભૂકી ઊઠી હતી. પાવર પ્લાન્ટની ચીમનીની એંગલ ગેસ કટરથી કાપવા જતા ઉડેલા તણખાથી કુલિંગ પ્લાન્ટનો ભંગા સળગી ઊઠ્યો હતો. સદ્દનસીબે પ્લાન્ટ બંધ હતો અને ડિમોલીશનની ટીમના કર્મચારીઓ મુશ્કેલીમાં મુકાય તે પહેલા બહાર દોડી જઈ ઘટનાની જાણ ફાયર બ્રિગેડને કરી હતી. ત્રણેક કલાકની જહેમત બાદ આગ કાબૂમાં આવી હતી. બીજી તરફ ટોરેન્ટ પાવરમાં આગ લાગી હોવાની વાત પણ આગની જેમ ફેલાતા આસપાસના લોકોમાં પણ ઉચાટ ફેલાયો હતો. ફાયર બ્રિગેડના સૂત્રો પાસેથી પ્રાપ્ત વિગતો અનુસાર, ટોરેન્ટ પાવરનો વટવા જીઆઈડીસી ફેઝ-૪માં આવેલો પ્લાન્ટ બંધ છે અને તેના ડિમોલીશનનું કામ એક ખાનગી કંપનીને સોંપાયું છે. આ ખાનગી કંપનીના કર્મચારીઓ પાવર પ્લાન્ટની ચીમનીમાં લોખંડની એંગલ ગેસ કટરથી કાપી રહ્યાં હતા દરમિયાન બાજુમાં પડેલા કુલીંગ પ્લાન્ટના ભૂસાના કચરામાં તણખલો ઊડતા આગ લાગી હતી. આગ વધુ ભડકે તે પહેલા કર્મચારીઓ બહાર દોડી ગયા હતા. દરમિયાન ભંગારમાં પડેલા પ્લાસ્ટિકના કારણે આગ વધુ ભભૂકી અને આગની જ્વાળાઓ આસપાસના અડધા કિલોમીટર દૂરથી પણ દેખાવા લાગી. ઘટનાની જાણ થતા દોડી આવેલા ફાયર બ્રિગેડના લાશ્કરોએ ૭ ફાયર ફાઈટરની મદદથી ત્રણેક કલાકની જહેમત બાદ આગને કાબૂમાં લીધી હતી. સદ્દનસીબે પ્લાન્ટ બંધ હોય કોઈ જાનહાની કે દુર્ઘટના સર્જાઈ ન હતી.