હિન્દુ યુવતીને લઈ ભાગી ગયેલા મુસ્લિમ યુવકની ધરપકડ, પ્રેમિકાનો અલગ જ ખુલાસો

આગ્રા: 21 વર્ષની હિંદુ યુવતીને ભગાડી જવાના મામલે મુસ્લિમ યુવક સામે અપહરણનો ગુનો નોંધાયા બાદ આ મામલે નવો જ ખુલાસો થયો છે. યુવતીએ શુક્રવારે કોર્ટ સમક્ષ જણાવ્યું હતું કે તેનું કોઈ અપહરણ નથી થયું, તે પોતાની મરજીથી યુવક સાથે ગઈ હતી. મથુરાના એસપી એમપી સિંઘના જણાવ્યા અનુસાર, યુવતીને પોલીસે અલ્હાબાદમાંથી શોધી કાઢી હતી. કાયદાકીય કાર્યવાહીના ભાગરુપે યુવતીને મેજિસ્ટ્રેટ સમક્ષ કલમ 164 હેઠળ નિવેદન નોંધાવવા રજૂ કરાઈ હતી.

યુવતીને ભગાડી જનારો યુવક વૃંદાવનનો છે. યુવતી પોતાની માતા સાથે મંદિરમાં અહીં આવતી હતી, અને તે દરમિયાન યુવક સાથે તેને પ્રેમસંબંધો બંધાયા હતા. યુવતી પોતાના પ્રેમી સાથે ભાગી જતાં તેના પરિવારજનોની ફરિયાદના આધારે યુવક અહમદ હસન વિરુદ્ધ વૃંદાવન પોલીસ સ્ટેશનમાં કલમ 366 (અપહરણ અથવા લગ્ન કરવા ફરજ પાડવી) હેઠળ ફરિયાદ નોંધી હતી.

પ્રેમી સાથે ભાગી ગયેલી યુવતી ગ્રેજ્યુએટ છે. પોલીસ સમક્ષ આપેલા પોતાના નિવેદનમાં તેણે જણાવ્યું હતું કે તે અને તેનો પ્રેમી લગ્ન રજિસ્ટર્ડ કરાવવાના જ હતાં, પરંતુ તે પહેલા પોલીસે તેમને પકડી લીધા હતા. છોકરીએ પોતાનું અપહરણ ના થયું હોવાનું મેજિસ્ટ્રેટ સમક્ષ નિવેદન આપ્યું છે, ત્યારે તેના પરિવારજનોએ તેના પ્રેમી પર યુવતીનું ધર્માંતરણ કરવાના ઈરાદેથી તેને ભગાડી જવાનો આરોપ લગાવ્યો છે.

યુવતીના પરિવારજનોનો આક્ષેપ છે કે હસન તે વિસ્તારમાં ઈસ્લામનો પ્રચાર કરતો હતો અને તેમની દીકરી તેના પ્રભાવમાં આવી ગઈ હતી. છોકરીના પરિવારજનોનો એવો પણ આક્ષેપ છે કે તે ઘરેથી સોનાનાં ઘરેણાં અને 22 હજાર રુપિયા કેશ લઈને ભાગી છે. આ ઉપરાંત, તેનું આધાર કાર્ડ અને અન્ય સર્ટિફિકેટ્સ પણ ગુમ છે.