માતા અને પોલીસકર્મી પિતાનું ખૂન કરાવી બોયફ્રેન્ડ સાથે ભાગી ગયેલી છોકરી પકડાઈ ગઈ

મૃતક કોન્સ્ટેબલનું નામ જ્યોતિ પ્રસાદ શર્મા હતું, અને તેઓ એક મકાનમાં પોતાના માતાપિતા તેમજ પત્ની અને બે બાળકો સાથે રહેતા હતા. મૃતકની દીકરીને ડીજે નામના એક સ્થાનિક યુવક સાથે જ પ્રેમસંબંધ હતા, જે જ્યોતિ પ્રસાદને માન્ય નહોતા. આ મામલે તેમણે અગાઉ પણ પોતાની દીકરીને ચેતવણી આપી હતી. પ્રાપ્ત વિગતો અનુસાર, થોડા દિવસ પહેલા જ શર્માએ દીકરીને તેના પ્રેમી સાથે રંગેહાથ પકડી હતી, અને તેના પ્રેમીને કોલર પકડીને ઢસડ્યો હતો તેમજ પોતાની દીકરીથી દૂર રહેવાની ધમકી આપી હતી. આ સમયે તેણે શર્માને જોઈ લેવાની ધમકી આપી હતી.

આ ઘટના બાદ પણ શર્માની દીકરીએ પ્રેમી સાથે સંબંધ ચાલુ રાખ્યા હતા, અને બંનેએ શર્મા તેમજ તેમના પત્નીની હત્યાનો પ્લાન બનાવ્યો હતો. કારણકે, આ સંબંધ સામે તે બંનેને જ વાંધો હતો. પ્લાનિંગના ભાગરુપે ગુરુવારે સવારે સાડા ચાર વાગ્યાની આસપાસ ડીજે શર્માના ઘરે આવી પહોંચ્યો હતો. આ વખતે શર્માની દીકરી પોતાના ડૉગ સાથે ઘરની બહાર આંટા મારી રહી હતી. ઘરના ઉપરના માળે રહેતા તેના દાદાએ તેને બહાર ફરતા જોઈ પણ હતી, પરંતુ તેઓ ખૂબ અંધારું હોવાથી કંઈ પૂછ્યા વિના જ પાછા સૂવા જતા રહ્યા હતા.

ધારદાર હથિયાર લઈને ઘરમાં ઘૂસેલો ડીજે શર્મા અને તેમની પત્ની પર તૂટી પડ્યો હતો. બંને વચ્ચે જોરદાર ઝપાઝપી પણ થઈ હતી, અને ઘરમાંથી બચાવો-બચાવોની બૂમો પણ સંભળાઈ હતી. બૂમો સાંભળી પાડોશીએ ઘરની બહાર ફરી રહેલી શર્માની છોકરીને પૂછ્યું પણ હતું કે અંદર શું થઈ રહ્યું છે.. જેના જવાબમાં તેણે જણાવ્યું હતું કે પપ્પા દારુ પીને આવ્યા છે, અને મમ્મી સાથે ઝઘડો કરે છે. ભૂતકાળમાં પણ આવું થતું હોવાના કારણે પાડોશીએ પણ દખલઅંદાજી નહોતી કરી.

થોડા સમયમાં ઘરમાંથી અવાજ આવતા બંધ થઈ ગયા હતા, અને શર્માની દીકરી ઘરે પરત ફરી હતી. તેણે કૂતરાને બાંધી દીધો હતો, અને ત્યાંથી ગાયબ થઈ ગઈ હતી. બીજી તરફ, સવારે આઠ વાગ્યા સુધી વહુ ચા લઈને ના આવતા મૃતકના ઘરની ઉપર જ રહેતા તેમના પિતાએ પોતાના પૌત્રને નીચે બધું બરાબર છે કે નહીં તે જોવા મોકલ્યો હતો. શર્માનો પુત્ર જ્યારે નીચે આવ્યો ત્યારે તેણે જોયું કે તેના માતાપિતાના બેડરુમનો દરવાજો અંદરથી બંધ હતો. તેણે બારીમાંથી જોયું તો અંદર બંનેના મૃતદેહ લોહીથી લથપથ હાલતમાં પડ્યા હતા. આ દ્રશ્ય જોઈ તેણે તરત જ પથ્થરથી લોક તોડી નાખ્યું હતું, અને પોતાના માતાપિતાને મરેલા જોઈ ચીસાચીસ કરતા આસપાસના લોકો પણ દોડી આવ્યા હતા. આ ઘટનાની ત્યારબાદ પોલીસને જાણ કરવામાં આવી હતી.

પોલીસના જણાવ્યા અનુસાર, ડબલ મર્ડર બાદ મૃતકની દીકરી જે રીતે ગાયબ થઈ હતી તેનાથી આ ખૂનમાં તેની સંડોવણી હોવાની પણ શંકા ઉદ્દભવી હતી. પોલીસને મૃતક કોન્સ્ટેબલની દીકરીના પ્રેમપ્રકરણ સહિતની માહિતી મળતા તે દિશામાં તપાસના ચક્રો ગતિમાન કરાયા હતા. બીજી તરફ, શર્માની દીકરી અને તેનો પ્રેમી મર્ડર બાદ બાઈક પર સવાર થઈને રાજસ્થાન બાજુ જવા નીકળી ગયા હતા. તેમણે પોતાના ફોન બંધ કરી દીધા હોવાથી તેમનું લોકેશન પણ નહોતું મળી રહ્યું. જોકે, પોલીસે બંનેના નંબર પર સતત નજર રાખી હતી, અને રાત્રે શર્માની દીકરીનો ફોન અચાનક ઓન થયો હતો.

ફોન ચાલુ થતાં જ તેનું લોકેશન મંદસૌર અને નીમચ વચ્ચે મળ્યું હતું, અને તેના આધારે થોડી જ વારમાં મૃતકની દીકરી અને તેનો પ્રેમી પોલીસના હાથમાં આવી ગયા હતા. બંને હત્યાકાંડ બાદ રાજસ્થાન ભાગવાની ફિરાકમાં હતાં. આ સમગ્ર ઘટનાને તેમણે પૂરા પ્લાનિંગ સાથે અંજામ આપ્યો હતો તેમ પોલીસનું કહેવું છે. માતાપિતા બંને વચ્ચેના સંબંધના વિરોધી હોવાથી છોકરીએ પ્રેમી સાથે મળીને તેમનો કાંટો કાઢી નાખવાનું કાવતરું રચ્યું હતું. જોકે, હવે તે અને તેનો પ્રેમી બંને પોલીસની ગિરફ્તમાં આવી ગયા છે.