અર્પિત મહેતા ફાયરિંગ કેસમાં ગોવા રબારીની રેગ્યુલર જામીન અરજી

નવગુજરાત સમય > અમદાવાદ

સિટી પલ્સ મલ્ટિપ્લેક્ષના માલિક અને બિલ્ડર અર્પિત મહેતા પર ફાયરિંગ કરી ખંડણી માગવાના કેસમાં ચાર્જશીટ બાદ ગોવા રબારીએ રેગ્યુલર જામીન માટે સેશન્સ કોર્ટમાં અરજી કરી છે. કોર્ટે આ મામલે તપાસ અધિકારીને નોટિસ પાઠવી વધુ સુનાવણી સોમવાર પર મુલતવી રાખી છે. જ્યારે જેલમાં રહી હથિયાર મંગાવવાના કેસમાં મેટ્રોકોર્ટમાં કરેલી જામીન અરજી પર સુનાવણી પૂર્ણ થતા સોમવારે ચુકાદો જાહેર કરાય તેવી શક્યતા છે. ઉલ્લેખનીય છે કે, ફાયરિંગ કેસમાં ગોવાએ આગોતરા જામીન માટે અરજી કરી હતી જો કે, કોર્ટે તે ફગાવી દીધી હતી.

અર્પિત મહેતા પર ફાયરિંગ કરી ખંડણી માગવાના કેસમાં ચાર્જશીટ બાદ ગોવા રબારી તરફે એડ્વોકેટ શ્રીધર દેરાસરીએ રેગ્યુલર જામીન માટે અરજી કરી છે. જેમાં એવી રજૂઆત કરી છે કે, આ કેસમાં મારો કોઇ રોલ નથી, છેલ્લા 18 વર્ષથી જેલમાં છું અને સીઆરપીસીની કલમ 268 લાગેલી હોવાથી જેલમાંથી બહાર પણ નિકળ્યો નથી, આ કેસમાં અન્ય આરોપીઓ ઝડપાઇ ચુક્યા છે અને હથિયાર પણ રિકવર કરી દેવામાં આવ્યું છે, પોલીસે કરેલી ચાર્જશીટમાં મારો કોઇ રોલ કે ટેલિફોનિક ડિટેઇલ પોલીસે મૂકી નથી, મારો કોઇ જ રોલ આખીય ચાર્જશીટમાં નથી, કિન્નાખોરી રાખી ફસાવવામાં આવ્યો છે. તેથી છોડી મૂકવો જોઇએ.

આ ઉપરાંત જેલમાંથી હથિયાર મંગાવવાના કેસમાં પણ ગોવાએ મેટ્રોકોર્ટમાં જામીન અરજી કરી હતી. જેમાં પણ તે જેલમાં હતો અને કોઇ જ રોલ નથી તેવો મુદ્દો ઉપસ્થિત કરી જામીન માગ્યા છે. જો કે, સરકારી વકીલે એવી રજૂઆત કરી હતી કે, આરોપીનો ગંભીર રોલ છે અને જેલમાંથી ફોન વાપરી હથિયાર મંગાવ્યા હતા ત્યારે જામીન ન આપવા જોઇએ. આ કેસમાં બન્ને પક્ષે સુનાવણી પૂર્ણ થતા કોર્ટે સોમવારે ચુકાદો જાહેર કરવાનો આદેશ કર્યો છે.