અમદાવાદઃ શહેરના જાણીતા અને વેટરન ગ્રાફિક આર્ટિસ્ટ સુબ્રતા ભૌમિક પર સોશિયલ એન્ટરપ્રાઈઝ સાઈટ બૂંધના સ્થાપક સોનલ જૈને ફેસબૂક પોસ્ટ દ્વારા અસભ્ય વ્યવહારનો આરોપ લગાવ્યો છે. અહીં ઉલ્લેખનીય છે કે ગ્રાફિક આર્ટિસ્ટ સુબ્રતા ભૌમિક છેલ્લા 40 વર્ષથી ડિઝાઈન ક્ષેત્રે સંકળાયેલા છે અને 50 કરતા પણ વધારે રાષ્ટ્રીય તેમજ આંતરરાષ્ટ્રીય પુરસ્કાર જીતી ચૂક્યા છે. સાથે જે તેઓ હાલ દેશની વિવિધ શૈક્ષણિક સંસ્થાઓમાં માર્ગદર્શક તરીકે કાર્યરત છે. જ્યારે સુબ્રતા ભૌમિકને આ આરોપ વિશે પૂછવામાં આવ્યું ત્યારે તેમણે આ આરોપને ખોટા ગણીને નકારી દીધા હતા.
પોસ્ટ કરી જણાવી આપવીતી
સોનલ જૈને કહ્યું કે, ‘તેઓ અમેરિકામાં હતા અને સુબ્રતા ભૌમિકે તેમની સાથે જે ગેરવર્તન કર્યું છે તે વિશે વાત કરવા માગતા નહોતા પણ જ્યારે તેમણે જાણ્યું કે આર્ટિસ્ટ જતીન દાસ પર તેઓની અસિસ્ટન્ટે આરોપ લગાવ્યા છે તો તેમનામાં પણ ફેસબૂક પર પોસ્ટ લખવાની હિંમત આવી. સોનલ જૈને જણાવ્યું કે જતીન દાસ અંગેની પોસ્ટ વાંચીને મને પણ મારી આપવીતી લખવાની હિંમત આવી.’
2016માં બની ઘટના
ઓક્ટોબર 22ની પોસ્ટમાં સોનલ જૈન જણાવે છે કે, ‘વર્ષ 2016ના જુલાઈ-ઓગસ્ટની વાત છે, હું જ્યાં કાર્ય કરતી હતી તે શૈક્ષણિક સંસ્થામાં તેઓ બોર્ડ કમિટીમાં હતા. મેં મારા બોસને આ અસભ્ય વર્તન અંગેની વાત કરી ત્યારે તેમણે મને કાયદાકીય ફરિયાદ કરવા માટે કહ્યું. ત્યારે કોઈ જ પગલું લેવા માટેની મારી માનસિક હાલત નહોતી અને તેના ત્રણ દિવસ બાદ મારા બોસે મને સુબ્રતા ભૌમિક સામે બેસાડીને એકબીજાની માફી માગવા માટે કહ્યું, અને તેમણે કહ્યું કે શું થયું અને હું જોતી જ રહી ગઈ. મને મારા બોસ અને અન્ય સહકર્મચારીઓ ત્યારે શિકારીઓ જેવા લાગ્યા હતા.’
ફેસબુક પોસ્ટ કરી કહી ઘટના
સોનલ જૈને પહેલા કરેલી પોસ્ટમાં આ ઘટના ક્યાં બની હતી અને ખરેખરમાં શું થયું હતું તે અંગે જણાવ્યું નહોતું પરંતુ એ જણાવ્યું હતું કે તેમની પાસે પુરાવાઓ છે. બાદમાં તેમણે તેમની ફેસબૂક પોસ્ટ અપડેટ કરી હતી કે જેમાં વધારે માહિતી આપી છે. તેમણે અપડેટ કરેલી પોસ્ટમાં જણાવ્યું કે, રૂમમાં સીસીટીવી કેમેરો હતો અને જો કોઈ સંસ્થા આ ઘટનાને આગળ વધારવા માગતી હોય તો હું અન્ય વિગતો આપી શકું તેમ છું. ભૂતકાળમાં તેમણે મને વિલન ચીતરવાના પ્રયાસ કર્યા અને પછી મારા બચાવમાં આવ્યાં હતા. મીટિંગ બાદ લાંબી ચર્ચાઓ થઈ અને મને મારા બોસ સાથે વાત કરવાનું કહેવામાં આવ્યું. ત્યારે મને અને મારા બોસને લાગ્યું કે તેઓ વૃધ્ધ છે અને સલાહ આપતા રહે છે.’
પોસ્ટ શૅર કરવાનું આપ્યું કારણ
સોનલ જૈને ઉમેર્યું કે, સુબ્રતો ભૌમિકને બોર્ડના સલાહકાર પદેથી હટાવવામાં આવ્યા અને તેના થોડા મહિના બાદ જ્યારે ફરી વખત એડવાઈઝરી કાઉન્સિલ મીટિંગ થઈ, અને તેમના મિત્ર જતીન દાસે સુબ્રતાને પરત લાવવા માટે કહ્યું. (જતીન દાસે પણ હું જે મહિલાને જાણું છું તેની સાથે ગેરવર્તન કર્યું હતું) પોસ્ટમાં અંતમા એવું કહેવામાં આવ્યું છે કે હું તમારી સમક્ષ આ તસવીર એટલા માટે રજૂ કરું છું કારણકે તમે જ્યારે તેમને જુઓ ત્યારે ઓળખી શકો.
શૅર કરી તસવીર
આ પછી સોનલ જૈને ઉમેર્યું હતું કે,’ મેં પોસ્ટ એટલા માટે નહોતી કરી કારણકે હું નહોતી ઈચ્છતી કે ફેમિલીને કોઈ તકલીફ પડે પરંતુ ઘણાં લોકો આ વિશે પૂછી રહ્યાં છે. તેણે મને બે વાર બળજબરીથી કિસ કરી હતી. ચેન્નાઈ એરપોર્ટ પર કિસ કરી હતી અને પછી મિટિંગ રુમમાં પણ બીજી કિસ કરી હતી. તેના હાથ મારા પર હતાં. આ પછી હું ધક્કો દઈને રુમની બહાર ભાગી હતી.’ આ વાત શૅર કરવાનું મારુ કારણ એ કે, યુવાન સ્ત્રીઓએ વૃદ્ધ લોકોને સમજવાં જોઈએ. એવા લોકો જે ‘પ્રતિષ્ઠાં’ સારી હોવાનો લાભ લઈ શકે છે. તમારે ધ્યાન રાખવું જોઈએ. તમારી જાતને બચાવો. જે બોસ/લોકો/કમિટી આવી ઘટનાને છાવરી રહ્યાં છે. તેઓ પણ આ ઘટનામાં બરાબરના ભાગીદાર બને છે. મારી સાથે બનેલી ઘટનામાં અમે એક નાની કંપની/ટીમ છીએ. ઓર્ગનાઈઝેશન શરુઆતના તબક્કામાં હોવાથી CASH (Committee Against Sexual Harassment) પોલિસી પણ નથી.
સુબ્રતોએ તોડ્યો ભરોસોઃ સોનલ જૈન
સુબ્રતા અરણ્ય કોલેજમાં એડ્વાઈઝરી કાઉન્સિલ તરીકે કાર્યરત છે તેમજ કંપની અરણ્ય ક્રિએટિવ એજન્સીમાં કામ કરે છે. ચેન્નાઈ અને પોંડિચેરી ઓફિસમાં કામ કરવું સલામતભર્યું છે. જ્યાં ભરોસાલાયક વર્ક એન્વાયર્મેન્ટ છે. જ્યાં સેક્સ્યુઅલ હેરેસમેન્ટને પ્રોત્સાહન આપવામાં નથી આવતું. હું આશા રાખું છું કે જે સ્ત્રીઓએ મારો એપ્રોચ કર્યો છે. તેઓ પણ આગળ આવીને સુબ્રતોએ કરેલા હેરેસમેન્ટના અનુભવ શૅર કરે. હું આ બે વર્ષ દરમિયાન અનેક આઘાત અને ટ્રોમાંમાંથી પસાર થઈ છું. જેથી મારી પર્સનલ લાઈફ અને કરિયરને પણ ખૂબ જ નુકસાન પહોંચ્યું છે. મેં હેરેસમેન્ટને અત્યંત નજીકથી જોયું છે. સુબ્રતાના કેસમાં તે કલિગ હતો. જેણે પહેલા મારો ભરોસો જીત્યો અને પછી મારો મિસયુઝ કર્યો. તેણે એક વિશ્વાસુ, સીનિયર અને આદરપાત્ર હોવાનો ભરોસો તોડ્યો છે.
‘આવી ઘટના બની જ નથી’
આ ઘટનાના અનુસંધાને અમારા સહયોગી અમદાવાદ મિરરે 72 વર્ષના ડિઝાઈનરની મુલાકાત લીધી હતી. તેમના અસોસિએટ પાયલ નાણાવટીએ જણાવ્યું હતું કે,’તે એક પ્રોફેશનલ પ્રોજેક્ટ હતો જ્યાં નવી ઈન્સ્ટીટ્યૂટ અરણ્યાંનું સેટઅપ કરવાનું હતું. બોર્ડ પ્રેસિડન્ટ ઈન્દિરા પરીખે આ પ્રોજેક્ટ સોંપ્યો હતો. સોનલ જૈન અહીં ઓફિસ આસિસ્ટન્ટ હતાં. હું 2016થી ભૌમિક સાથે છું અને આ પ્રકારની કોઈ ઘટના બની જ નથી.’ સોનલ જૈને એવું પણ કહ્યું છે કે ભૌમિકને એડ્વાઈઝરી કાઉન્સિલ તરીકે હટાવવામાં આવ્યાં છે પરંતુ હકીકતમાં પ્રોપર્ટીનો વિવાદના કારણે દરેક બોર્ડ મેમ્બર્સને રાજીનામું આપવાની ફરજ પડી હતી.
સુબ્રતો ભૌમિકે પોતાના બચાવમાં કહ્યું કંઈક આવું
આ દરેક આરોપોને ખોટા જણાવતાં સુબ્રતો ભૌમિકે જણાવ્યું હતું કે,’સોનલ જૈન પબ્લિસિટી મળે તે માટે આવા આરોપો લગાવે છે. તે મને શા માટે આ ઘટનામાં સંડોવે છે. મેં હંમેશા ભારતને આગળ લઈ જવાનો પ્રયાસ કર્યો છે. શું હવે હું આવી રીતે ભારતને સમગ્ર વિશ્વ સામે પ્રેઝન્ટ કરીશ? મેં ઐશ્વર્યા રાય, જુહી ચાવલા, દીપિકા પદુકોણ સાથે પણ કામ કર્યું છે. શું તમે આ પહેલા મારા વિશે આવું ક્યાંય પણ સાંભળ્યું છે.?’ (#MeTooના કવરેજ પર IamGujarat.comની પોલિસી)
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.