40 લાખની ફોર્ચ્યુનર માત્ર 15 લાખમાં! પોલીસે પકડી માત્ર મોંઘીદાટ ગાડીઓ ઉઠાવતી ગેંગ

ગુરુગ્રામ: સમય સાથે હવે ચોર પણ હાઈટેક બન્યા છે, અને તેમાંય ગાડીઓ ઉઠાવતા ચોર તો જાણે હવે નાની ગાડીમાં રસ જ ના હોય તેમ લાખો રુપિયાની લક્ઝુરિયસ ગાડીઓ ઉઠાવી રહ્યા છે. આવી જ એક ગેંગ હાલ ગુરુગ્રામમાંથી પકડાયેલી છે, જે માત્ર ફુલી ઓટોમેટિક SUVની જ ચોરી કરતી હતી. આ ગેંગ પાસે એક હાઈ-એન્ડ માસ્ટર કી હતી, જેનાથી તેઓ ગમે તેવી ગાડીની સિક્યોરિટી સિસ્ટમને ક્રેક કરીને તેની સેકન્ડોમાં જ ચોરી કરી લેતા હતા.

લાખો રુપિયાની ગાડી ઉઠાવ્યા બાદ ચોરોની આ ગેંગ તેનો વહીવટ પણ એવી રીતે કરતી કે પોલીસ માટે તેનો પત્તો લગાવવો જ અશક્ય બની જતો. પોલીસ સૂત્રોના જણાવ્યા અનુસાર, ગુરુગ્રામમાંથી ચોરાયેલી ગાડીની ઓરિજિનલ નંબર પ્લેટ કાઢીને આ ગેંગ ફેક નંબર પ્લેટ લગાવી દેતી હતી, અને તેને દિલ્હીથી છેક નાગાલેન્ડ મોકલી દેતી. નાગાલેન્ડમાં આ ગાડીઓને વેચવા માટે પણ અલગ નેટવર્ક કામ કરતું હતું, અને દિલ્હીમાંથી ચોરાયેલી ગાડીનો હાથોહાથ સોદો પણ કરી દેવાતો હતો.

ગુરુગ્રામ પોલીસની ક્રાઈમ બ્રાંચે આ ગેંગના મુખ્ય સૂત્રધારને નાગાલેન્ડથી ઝડપી લીધો હતો, અને તેને ગુરુગ્રામ લાવવામાં આવ્યો છે. તેનું નામ કિનખેત હોવાનું બહાર આવ્યું છે. તેના બે સાગરિતો અંકિત અને જલાલ સ્થાનિક પોલીસના હાથમાં આવી ગયા બાદ તેમણે પૂછપરછ દરમિયાન ગાડીઓ ઉઠાવવાના અને તેનો વહીવટ કરવાના સમગ્ર નેટવર્કની માહિતી પોલીસની આગળ ઓકી દીધી હતી. જેનાથી પોલીસ નાગાલેન્ડ પહોંચી હતી, અને તેણે કિનખેતને પકડી લીધો હતો.

છેલ્લા બે વર્ષમાં માત્ર ગુરુગ્રામમાં જ કુલ 7500 હજારથી વધુ લક્ઝુરિયસ ગાડીઓ ચોરાઈ છે. પોલીસના જણાવ્યા અનુસાર, આ ગેંગ 40 લાખ રુપિયાની ફોર્ચ્યુનર કારનો 15 લાખ રુપિયામાં સોદો કરી દેતી હતી. જેમાંથી ગાડી ઉઠાવનારાને અઢીથી ચાર લાખ રુપિયા જ મળતા હતા. એક સિનિયર પોલીસ અધિકારીએ જણાવ્યું હતું કે, ગુરુગ્રામમાંથી ચોરેલી કાર નાગાલેન્ડ મોકલી દેવાતી, અને નવી રજિસ્ટ્રેશન પ્લેટ સાથે થોડા દિવસોમાં જ તેનો સેકન્ડ હેન્ડ કાર માર્કેટમાં સોદો થઈ જતો હતો.

નોર્થ-ઈસ્ટના રાજ્યોમાં ઈનોવા અને ફોર્ચ્યુનર જેવી ગાડીઓની જોરદાર ડિમાન્ડ છે. જેના કારણે જ ચોરીનું આ સમગ્ર નેટવર્ક ચાલતું હતું, અને ચોરાયેલી ગાડીઓ વેચવામાં ગેંગને કોઈ તકલીફ નહોતી પડતી. પોલીસે એમ પણ કહ્યું હતું કે ચોર જે ડિવાાઈસથી ગાડીનું લોક તોડતા તે એન્જિન કંટ્રોલ મોડ્યૂલને બાયપાસ કરી દેતું હતું. આ ડિવાઈસ 50 હજારથી લઈને દોઢ લાખ રુપિયા સુધીમાં ઓનલાઈન કે પછી વર્કશોપ્સ પરથી આસાનીથી મળી જાય છે.