2 યુવતીઓને જાહેરમાં ફાયરિંગનો વિડીયો બનાવી સોશિયલ મીડિયા પર અપલોડ કરવાનું ભારે પડ્યું

ફરીદાબાદઃ દિલ્હીને અડીને આવેલા હરિયાણાના પલવલ જિલ્લામાં જાહેરમાં ફાયરિંગનો વિડીયો બનાવીને સોશિયલ મીડિયા પર અપલોડ કરવાની બે યુવતીઓને ભારે પડી ગયું. સાયબર પોલીસે બંને સામે ગુનો નોંધી કાર્યવાહી હાથ ધરી છે. આ સાથે બંનેની ધરપકડ પણ કરવામાં આવી છે અને વધુ પૂછપરછ કરવામાં આવી રહી હોવાનું જાણવા મળ્યું છે.

5 વિડીયો સોશિયલ મીડિયા પર અપલોડ થયા
સાયબર પોલીસ પ્રભારી સત્યનારાયણના જણાવ્યા અનુસાર સાયબર સેલના પ્રભારી વિનોદ કુમારે કહ્યું છે કે, 16 સપ્ટેમ્બરે સોશિયલ મીડિયા પ્લેટફોર્મની ગતિવિધિ પર નજર રાખતી વખતે બે છોકરીઓ ગેરકાયદેસર હથિયારો સાથે રસ્તા પર ખુલ્લેઆમ ફાયરિંગ કરતી જોવા મળી હતી. આવા 5 વિડીયો સોશિયલ મીડિયા આઈડી પર અપલોડ કરવામાં આવ્યા હતા. આ અંગે પોલીસે બંને સામે ગુનો નોંધી તેમની ઓળખ કરી હતી.

સોમવારે ધરપકડ કરી હતી
પોલીસનું કહેવું છે કે ફાયરિંગ કરનાર યુવતીનું નામ ચંચલ ઉર્ફે દિશા ગૌતમ છે. જ્યારે અન્યની ઓળખ પૂનમ રાવ તરીકે થઈ છે. પોલીસે બંનેની સામે ગુનો નોંધીને આગળની તપાસ હાથ ધરી છે.

રીલ્સ બનાવવાના ચક્કરમાં કાયદો હાથમાં લેતા યુવાનો!ઉલ્લેખનીય છે કે, સોશિયલ મીડિયા રીલ્સ બનાવવાના ચક્કરમાં કેટલાક લોકો કાયદાને હાથમાં લઈને કામ કરતા હોય છે. ભૂતકાળમાં પણ આવા સેંકડો વિડીયો સામે આવ્યા છે જેમાં અસલી બંદૂકથી જાહેરમાં ફાયરિંગ કર્યું હોય. નોંધનીય છે કે, આવા સ્ટંટથી અન્ય લોકોના જીવ જોખમમાં મૂકાઈ જતાં હોય છે ત્યારે યુવાનોએ આવી રીલ્સ બનાવવા માટે કાયદો હાથમાં લેવો જોઈએ નહીં.