ચારિત્ર્ય અંગે શંકા હોવાથી પતિએ પત્નીને ત્રીજા માળેથી ફેંકી કરી હત્યા

નવગુજરાત સમય.કોમ
અમદાવાદઃ વાડજ વિસ્તારમાં આવેલી એક સોસાયટીમાં રહેતા પતિએ ચારિત્ર્ય અંગે શંકા રાખી તેની પત્નીને ત્રીજા માળેથી ફેંકી હત્યા કરી હોવાની ઘટના શનિવારે રાત્રે સામે આવી હતી. પોલીસે પતિની અટકાયત કરી વધુ તપાસ હાથ ધરી છે.

પોલીસ સૂત્રો પાસેથી મળતી માહિતી મુજબ વાડજ વિસ્તારમાં આવેલી કૃષ્ણનગર સોસાયટીમાં રહેતા સુનિલ રોહિતભાઇ પટેલ નામના યુવકે તેની જ પત્ની પ્રતિક્ષા(27)ના ચારિત્ર્ય અંગે શંકા રાખતો હતો. જેના કારણે બંને વચ્ચે અણબનાવ રહેતો અને લડાઇ થતી રહેતી હતી. શનિવારે રાત્રે કોઇ બાબતને લઈ બંને વચ્ચે ઝઘડો થયો. જેમાં સુનિલે તેની પત્નીને માર માર્યો અને ઘરના ત્રીજા માળેથી નીચે ફેંકી હત્યા કરી નાંખી હતી. ઘટનાની જાણ થતા આજુબાજુના લોકો એકઠા થઈ ગયા અને પોલીસને જાણ થતાં તે પણ આવી પહોંચી હતી.

પોલીસે તપાસ હાથ ધરી આરોપી પતિ સુનિલ પટેલની અટકાયત કરી તેને જેલના સળિયા પાછળ ધકેલી દીધો છે. મળતી માહિતી મુજબ સુનિલે એલએલબીનો અભ્યાસ કર્યો હોવાનું જાણવા મળી રહ્યું છે. પોલીસ દ્વારા આ ઘટનાની વધુ તપાસ કરવામાં આવી રહી છે.