EDના અધિકારી જે. પી. સિંહ વતી જયેશ ઠક્કર ધમકીના પત્રો લખતો

નવગુજરાત સમય > અમદાવાદ

આઇપીએલના કરોડોના સટ્ટા કાંડ બાદ બહાર આવેલા લાંચ કાંડમાં ઇડીના અધિકારી જે.પી.સિંહની પણ સંડોવણી ખુલી હતી. આ મામલે સીબીઆઇએ કેસ દાખલ કરી જયેશ ઠક્કર, સોનુ જાલન સહિત ચાર આરોપીઓને ઝડપી પાડ્યા હતા. આ કેસમાં સોનુ અને જયેશે રેગ્યુલર જામીન માટે સીબીઆઇ કોર્ટમાં અરજી કરી હતી. જેની સુનાવણી દરમિયાન સીબીઆઇએ એવો ઘટસ્ફોટ કર્યો છે કે, અમદાવાદના બુકી જયેશ ઠક્કરે અમદાવાદ એન્ફોર્સમેન્ટ વિભાગ (ઇડી) ના જોઇન્ટ ડાયરેકટર જે.પી.સિંહ વતી એક આરોપીને ધમકીભર્યો પત્ર લખ્યો છે.

તેમજ મર્સિડીસ બેન્ઝ કાર પણ લાંચકાંડમાં મેળવી હોવાના દસ્તાવેજો મળી આવ્યા છે. જેથી બંને આરોપીઓને જામીન ન આપવા જોઇએ. બન્ને પક્ષે સુનાવણી પૂર્ણ થતા કોર્ટે આ મામલે ચુકાદો 20મી સપ્ટે. પર મુલતવી રાખ્યો છે.

સટ્ટાકાંડમાં સંડોવાયેલા આરોપીઓને સવલત આપવા તથા અન્ય આરોપીઓની ધરપકડ નહીં કરવા માટે તે સમય અમદાવાદ ઇડીના જોઇન્ટ ડિરેક્ટર જે.પી.સિંગે માતબર લાંચ માગી હોવાના મામલે સીબીઆઇએ સોનુ સહિત ચાર આરોપીઓની ધરપકડ કરી જેલમાં મોકલી આપ્યા હતા.

મુંબઇના સોનુ જાલન અને અમદાવાદના જયેશ ઠક્કરે કાયમી જામીન મેળવવા માટે સ્પે. સીબીઆઇ કોર્ટમાં કરેલી જામીન અરજી કરી હતી. સુનાવણી દરમિયાન સીબીઆઇએ એવી રજૂઆત કરી હતી કે, અધિકારી જે.પી.સિંગ વતી અમદાવાદના બુકી જયેશ ઠક્કરે એક આરોપીને ધમકીભર્યો પત્ર લખ્યો છે. સોનુ જાલને આરોપી મહાવીર અને મંયક અગ્રવાલ પાસેથી મર્સીડીસ બેન્જ અને રૂ. 50 લાખની માગણી કર્યાનું કોલડેટા પરથી ફલિત થાય છે.