આયા 3 વર્ષના બાળકને માર મારતી હતી, વિડીયોએ સૌ કોઈને ચોંકાવી દીધા

કાનપુરઃ એક 24 વર્ષની મહિલા કે જે આયા (Babysitter) તરીકે 3 વર્ષના બાળકને સાચવતી હતી તેનો વિડીયો વાયરસ થયો છે. આ ઘટના કાનપુરમાં આવેલા કલ્યાણપુરના ઈન્દ્રનગરની છે. આ મહિલાની સોમવારે અટકાયત કરવામાં આવી છે. આ વિડીયો જોનારી દરેક વ્યક્તિ હચમચી જાય છે, જેમાં દેખાય છે કે આયા બાળકને લાતો મારે છે અને પછી તેની છાતીમાં તથા પીઠના ભાગે માર મારી રહી છે. દર્દથી પીડાતું બાળક વિડીયોમાં રડતું દેખાઈ રહ્યું છે.

ઈન્દ્રનગર વિસ્તારમાં રહેતા અને રેલવેમાં ફરજ બજાવતા બાળકના પિતા સૌરભે પોલીસ ફરિયાદ નોંધાવ્યા બાદ આયાની અટકાયત કરવામાં આવી છે.

સૌરભે પોલીસને જણાવ્યું કે, તેમના બે બાળકો છે. જેમાંથી એક બાળકની સારસંભાળ મારા સાસુ-સસરા દ્વારા રાખવામાં આવે છે, અને તેઓ નજીકમાં જ રહે છે, હું અને મારી પત્ની બન્ને નોકરી કરતા હોવાથી અમે અમારા બીજા ત્રણ વર્ષના બાળકની સંભાળ માટે અમે આયા રાખી હતી. તેમણે એમ પણ જણાવ્યું કે તેમની હાજરીમાં આયા બાળક સાથે સારો વ્યવહાર કરતી હોય છે.

તેમણે ઉમેર્યું કે, "પાછલા કેટલાક દિવસથી અમારા ધ્યાને આવ્યું કે બાળકના વર્તનમાં પરિવર્તન જોવા મળ્યું હતું, જે અચાનક ચમકી જતું હતું અને ગભરાતું હતું. અમે તેના શરીર પર લાલ ચકામા પણ જોયા. અમારી ગેરહાજરીમાં તેની સાથે કંઈક શંકાસ્પદ થતું હોવાનું અમને લાગ્યું. પછી અમે રુમમાં જે CCTV લગાવ્યો છે તેના ફૂટેજ ચેક કર્યા ત્યારે તેમાં દેખાયું કે આયા બાળક પર જૂલમ ગુજારી રહી હતી.

આયાએ પોલીસની પૂછપરછમાં જણાવ્યું કે બાળક સીધું રહે તે માટે તેની સાથે કડક વ્યવહાર કરતી હતી. પોલીસે જણાવ્યું કે, "અમને આ ઘટના અંગે જાણ થઈ, અને અમે મહિલાની અટકાયત કરી. જરુરી કલમો સાથે અમે મહિલા સામે ફરિયાદ નોંધીશું."