અમદાવાદ: પાંચ વર્ષની છોકરીનો રેપ કરનારા સ્કૂલવાન ડ્રાઈવરને આજીવન કેદ

અમદાવાદ: પાંચ વર્ષની બાળકી પર બળાત્કાર ગુજારનારા સ્કૂલવાનના ડ્રાઈવરને સ્પેશિયલ કોર્ટે આજીવન કેદની સજા ફટકારી છે. અમદાવાદના વટવા વિસ્તારમાં આજથી પાંચ વર્ષ પહેલા હિરેન જોશી નામના શખ્સે બાળકી પર રેપ કર્યો હતો. શહેરના ઈસનપુર તેમજ વટવા વિસ્તારમાં સ્કૂલવાન ચલાવતા હિરેન જોશીને પોક્સો કોર્ટના સ્પેશિયલ જજ વીજે કલોટરાએ 15,000 રુપિયાનો દંડ પણ ફટકાર્યો છે. સરકારી વકીલ નિલેશ લોધાના જણાવ્યા અનુસાર, 11 માર્ચ 2014ના રોજ આરોપીએ પોતાની વાનને સર્વિસ રોડ પર ઉભી રાખી છોકરીના ગુપ્તાંગમાં આંગળી નાખી હતી, જેનાથી તેને ઈજા થઈ હતી. છોકરીના પિતાએ આ મામલે વટવા પોલીસ સ્ટેશનમાં ફરિયાદ નોંધાવી હતી. પોલીસે તાત્કાલિક આરોપીની ધરપકડ કરી હતી, અને ત્યારથી જ તે જેલમાં છે. કોર્ટે 14 સાક્ષીઓ અને 17 જેટલા દસ્તાવેજી પુરાવાને ધ્યાનમાં રાખીને આરોપીને આકરી સજા ફટકારી હતી. આ કેસમાં પીડિતાની ઉંમર ખૂબ જ નાની હોવાથી પોલીસે તેનું નિવેદન નહોતું લીધું, અને સાક્ષીની યાદીમાં પણ તેનું નામ નહોતું. આરોપીએ આ મામલે હાઈકોર્ટમાં પિટિશન કરી હતી, જેના કારણે કેસની સુનાવણી બે વર્ષ સુધી સ્થગિત થઈ ગઈ હતી. આખરે હાઈકોર્ટે આ મામલે પરવાનગી આપતા બાળકીને કોર્ટમાં લવાઈ હતી. બાળકી આરોપીને જોઈને ગભરાઈ ગઈ હતી, પરંતુ પોક્સો કોર્ટના જજે બાળકીની મમ્મીને ડાયસ પર બેસવા ખુરશી આપી, તેના ખોળામાં બાળકીને બેસાડાઈ હતી. જોકે, બાળકી કંઈ બોલી નહોતી શકી અને સતત રડી રહી હતી. જોકે, કોર્ટ પાસે પૂરતા સાક્ષીઓ અને સાયન્ટિફિક પુરાવા હોવાથી આરોપીને આજીવન કેદની સજા ફટકારાઈ હતી.