લવમેરેજ કરી યુવક પોલીસ સ્ટેશનમાં હાજર થયો, પત્ની સાથે ઘરે જતાં રસ્તામાં ના થવાનું થયું

ગાંધીનગર: છોકરીના પરિવારજનોની ઈચ્છા વિરુદ્ધ લવમેરેજ કરનારા ધનસુરાના નાણાં ગામના યુવક સાથે ના થવાનું થયું છે. ઘટનાની વિગત એવી છે કે, ગાંધીનગરમાં એક મોબાઈલના શોરુમમાં નોકરી કરતા અંકિત બાવા (ઉં. 25 વર્ષ)એ પોતાના વતનમાં આવેલા ઘરની પાછળ રહેતી યુવતી સિદ્ધિ વાળંદ સાથે લવમેરેજ કર્યા હતા. જેનું તેમણે અમદાવાદમાં રજિસ્ટ્રેશન કરાવ્યું હતું.

લગ્ન બાદ જીગર અને રિદ્ધિ પોતાના મિત્ર જિગરસિંહ તેમજ તેમના પત્ની અને વકીલ દર્શનાબેન સાથે ધનસુરા પોલીસ સ્ટેશને પહોંચ્યા હતા. પોલીસે યુવતીના માતાપિતાને પણ બોલાવ્યા હતા, જ્યાં તેમણે આ લગ્નનો વિરોધ કર્યો હતો. પતિ-પત્નીની સુરક્ષાને ધ્યાનમાં રાખતા પોલીસ તેમને મજરા સુધી મૂકી આવી હતી. શનિવારે રાત્રે બનેલી આ ઘટનામાં કપલ અને તેમની સાથે રહેલા જિગરસિંગ અને તેમના પત્ની એક કારમાં ચિલોડા હાઈવે પર રાંધેજા તરફ જઈ રહ્યા હતા.

આ દરમિયાન રાતના સમયે તેમની કાર આગળ બીજી એક કાર આવીને ઉભી રહી હતી. પાછળથી પણ અન્ય એક ગાડી દ્વારા તેમનો રસ્તો બ્લોક કરી દેવાયો હતો. કાર ચલાવી રહેલા જીગરસિંહે રિવર્સ લઈ ભાગવાનો પ્રયાસ કર્યો હતો, પરંતુ બીજી એક કાર બાજુમાં આવીને ઉભી રહી જતાં ભાગવાનો કોઈ રસ્તો નહોતો રહ્યો. આ કારમાંથી સિદ્ધિના પિતા, ભાઈ, કાકાના દીકરા સહિત 10 લોકો ઉતર્યા હતા, અને ચારેય પર હુમલો કર્યો હતો. ત્યારબાદ સિદ્ધિને ગાડીમાંથી બળજબરીપૂર્વક ઉતારીને લઈ જવામાં આવી હતી.

આ મામલે સિદ્ધિના પતિ અંકિતે હુમલો થવાની તેમજ બળજબરીપૂર્વક પત્નીનું અપહરણ થયું હોવાની ફરિયાદ નોંધાવી છે. પોલીસે આ મામલે યુવતીના પિતા, ભાઈ અને કાકાના દીકરા સહિત 10 લોકો સામે ફરિયાદ નોંધી કાર્યવાહી શરુ કરી છે.