કારમી ગરીબી સહન ના થતા માએ 45 દિવસનું છોકરું 10,000માં વેચવાની કોશિશ કરી

આગ્રાઃ આર્થિક સંકળામણ અને શારીરિક તકલીફ એટલી વધી ગઈ કે માએ પોતાના 45 દિવસના બાળકને કથિત રીતે વેચવાની કોશિશ કરી હોવાની ઘટના બની છે. આગ્રાની ઘટનામાં નવજાત બાળકને એસએન મેડિકલ કૉલેજ (SNMC)માં ઝાડાની તકલીફના લીધે દાખલ કર્યું છે. (પ્રતિકાત્મક તસવીર)

ગોપાલપુરાની રહેવાસી મહિલાએ કહ્યું કે, તેના પતિ નોકરી ગુમાવ્યા બાદ સતત દારુના નશામાં ડૂબેલા રહે છે, મહિલા તથા તેનો પતિ બૂટ બનાવવાની ફેક્ટરીમાં કારીગર તરીકે કામ કરતા હતા અને કોરોનાના કારણે જાહેર કરાયેલા લોકડાઉન દરમિયાન તેમણે પોતાની નોકરી ગુમાવી દીધી હતી. પોતાના બાળકની સારી રીતે કાળજી રાખી શકતી ના હોવાથી તેને વારંવાર ખેંચ (fits) આવે છે. મંગળવારે આ મહિલાએ હોસ્પિટલના ઈમર્જન્સી વોડ પાસે તેની આસપાસ રહેલા લોકોને બાળક વેચી દેવાની કોશિશ કરી હતી.

એક યુવાન દંપતી કે જે પોતાના બીમાર સગાની ખબર કાઢવા માટે હોસ્પિટલ આવ્યા હતા તેઓ 10,000 રુપિયામાં બાળકને ખરીદવા માટે તૈયાર થઈ ગયા હતા, તેઓ પોતાની સાથે નવજાત માટે નવા કપડાં પણ લઈને આવ્યા હતા. મહિલાએ એમ કહ્યું કે, તે પોતાના બાળકને વેચવા માગે છે કારણ કે તેના પહેલા બાળકનો સારી રીતે ઉછેર થઈ શકે, જે 3 વર્ષનો છોકરો છે.

આ દરમિયાન બાળકોના હક માટે કામ કરતા સમાજ સેવક નરેશ પરાસે આ અંગેની ફરિયાદ નોંધાવી અને પોલીસે ઘટના સ્થળ પર આવીને મહિલાની અટકાયત કરી હતી. એમએમ ગતે પોલીસ સ્ટેશનના પોલીસ અધિકારી અવધેશ અવસ્થિએ જણાવ્યું કે, "અમે તેના પરિવારનો સંપર્ક કરવાની કોશિશ કરી રહ્યા છીએ, અમને તેના પતિની ભાળ મળી નથી અને મહિલાના સગા પણ આર્થિક રીતે સશક્ત નથી. પાડોશીએ જણાવ્યું કે મહિલા અને પુરુષ બન્ને માનસિક રીતે સશક્ત નથી."

પોલીસ અધિકારીએ આગળ જણાવ્યું છે કે, "અમે હજુ સુધી બાળકને વેચવાનો કેસ નથી નોંધ્યો, કારણ કે ત્યાં કોઈ આર્થિક લેવડ-દેવડ થઈ નહોતી. આમ છતાં બન્ને તરફના લોકોને ચેતવણી આપી છે કે તેમની સાથે કાયદાકીય કાર્યવાહી કરવામાં આવી શકે છે."

આ ઘટના અંગે હોસ્પિટલના પ્રિન્સિપલ ડૉક્ટર સંજય કાલાએ જણાવ્યું કે, "બાળક અને તેની માતા બન્ને હોસ્પિટલમાં દાખલ છે. મહિલા માનસિક રીતે સ્થિર નથી. બાળકની અને પોતાની સારવાર ચાલી રહી હતી અને મહિલા હોસ્પિટલમાંથી બહાર જવા નીકળી ગયા હતા. હવે અમે પોલીસની મદદની સાથે તમામ પ્રયાસ કરી રહ્યા છીએ કે જો તેમના સગા મળી જાય તો બાળક અને માતાને તેઓ મદદરુપ થઈ શકે."