મહિલા કોરોના દર્દીના ખરાબ વીડિયો ઉતારીને બ્લેકમેઈલ કરનારો વોર્ડબોય પકડાઈ ગયો

મુંબઈઃ કોરોના વાયરસના કારણે જાહેર થયેલા લોકડાઉન અને આર્થિક સંકળામણના કારણે ઘણાં પરિવારોની સ્થિતિ કફોડી બની ગઈ હતી જેઓ પોતાના પરિવારની સ્થિતિ સુધારવા માટે મહેનત કરવા માટે તૈયાર છે. આવામાં કેટલાક લોકો એવા પણ છે કે જેઓ સોર્ટકટમાં રુપિયા કમાઈ લેવા માટે ખોટા રસ્તા અપનાવી રહ્યા છે. આવી જ એક ઘટનામાં ખાનગી હોસ્પિટલમાં કામ કરતા વોર્ડબોયની ધરપકડ કરવામાં આવી છે. આવોર્ડબોય વસઈની ખાનગી હોસ્પિટલમાં દાખલ થયેલી મહિલા દર્દીનો વીડિયો બનાવીને બ્લેકમેઈલ કરીને 10 લાખ રુપિયાની માગણી કરી હતી. વોર્ડબોયે 41 વર્ષના કોવિડ કેર સેન્ટરમાં દાખલ મહિલાનો સેમી ન્યૂડ વીડિયો ઉતાર્યો હતો.

આ 19 વર્ષનો વોર્ડબોય રવિવારે મહિલાનો જે વીડિયો ઉતાર્યો હતો તે મહિલાને બતાવવા માટે પહોંચ્યો હતો. મહિલા જ્યારે સૂતી હતી ત્યારે તેનો વીડિયો ઉતાર્યો હતો. વોર્ડબોયે આ વીડિયો જો રુપિયા ના આપ્યા તો વાયરલ કરવાની ધમકી આપી દીધી. જ્યારે મહિલાએ આ વીડિયો જોયો તો તેને ડિલિટ કરવા માટે પણ કહ્યું હતું. તેણે જણાવ્યું કે જ્યારે તે મહિલાને દવા આપવા માટે તેમના રુમમાં ગયો ત્યારે તે ઊંઘતા હતા અને તેમનો વીડિયો ઉતારી લીધો હતો.

મહિલાએ માણિકપુર પોલીસનો સંપર્ક કર્યો. પોલીસે હોસ્પિટલમાંથી ભાગી ગયેલા વોર્ડબોયને બુધવારે પકડીને વસઈ કોર્ટમાં રજૂ કરીને તેના 14 દિવસના રિમાન્ડ મેળવ્યા છે.

પોલીસે જણાવ્યું કે વોર્ડબોય વીડિયો ઉતારવા માટે તેના ફ્રેન્ડનો ફોન લઈ આવ્યો હતો. અન્ય મહિલા દર્દીઓની વોર્ડબોય દ્વારા પજવણી કરવામાં આવી છે કે નહીં તે અંગેની પણ તપાસ કરવામાં આવી છે. પોલીસ દ્વારા મહિલા દર્દીઓની સુરક્ષા જળવાય તેની ખાસ તકેદારી રાખવા માટે જણાવવામાં આવ્યું છે. પોલીસે જણાવ્યું કે

આરોપી શખ્સના મોબાઈલ ફોનમાંથી પોર્ન વીડિયો પણ મળી આવ્યો છે, જેને કબજે લેવામાં આવ્યા. વોર્ડબોયના ફ્રેન્ડની પણ તપાસ કરવામાં આવી છે પરંતુ તેનો કોઈ રોલ વીડિયો લેવામાં કે બ્લેકમેઈલિંગ કરવામાં નથી લાગી રહ્યો. વોર્ડબોય યુવક સામે IPCની કલમ 354 (પજવણી) અને 385 (ખંડણી) અને ઈન્ફોર્મેશન ટેક્નોલોજી એક્ટ હેઠળ ગુનો નોંધવામાં આવ્યો છે.

રિમાન્ડ દરમિયાન આ વિડીયોનો વોર્ડબોય દ્વારા અન્ય ઉપયોગ કરાયો છે, અન્યને આ વીડિયો મોકલવામાં આવ્યો છે, કોઈ બીજા સાધનમાં તેને સેવ કરવામાં આવ્યો છે કે નહીં તે અંગેની પૂછપરછ કરવામાં આવશે. આ સાથે આવું વોર્ડબોયે અગાઉ કે હાલના સમયમાં કર્યું છે કે નહીં તે અંગેની પણ પૂછપરછ કરવામાં આવી શકે છે.