મોબાઈલ ઓન રહી ગયો અને ઠગાઈના કારસામાં બે ઝડપાયા

નવગુજરાત સમય > અમદાવાદ

પાપનો ભાંડો ક્યારેક તો ફૂટે જ છે. આ કહેવત સાર્થક થતી હોય તેવી ઘટનામાં વેપારી સાથે વાતચીત પછી મોબાઈલ ફોન ‘ઓન’ રહી જતાં છેતરપિંડીનો કારસો પકડાઈ ગયો હતો. બાજપાઈ લોન યોજનાના નામે છેતરપિંડીની ફરિયાદ નોંધાવવામાં આવતાં વાડજ પોલીસે તાબડતોબ બે આરોપીને ઝડપી લીધા છે.

નવા વાડજમાં રહેતા પંકજભાઈ જયદેવભાઈ શુક્લા ગુરૂકુળના સોનલ ચાર રસ્તા ખાતે કપડાંની દુકાન ધરાવે છે. દસે’ક દિવસ પહેલાં AEC ચાર રસ્તા પાસે તેમને એક કાકા મળ્યા હતા. ભાવેશ ચૌહાણ નામ આપનાર આ શખ્સે બાજપાઈ લોન યોજના અંગે વાતચીત કરી હતી. બાદમાં, ભાવેશ ચૌહાણ બાજપાઈ યોજનાનું ફોર્મ લઈને પંકજભાઈની દુકાને ગયા હતા. તેમના પત્ની જાગૃતિબહેનની સહી, ફોટા, રહેઠાણના પુરાવા લીધા હતા. આ પછી ભાવેશ ચૌહાણે પંકજભાઈની દુકાનમાંથી રૂ. 10,000ની કિંમતના કપડાં લીધા હતા અને પૈસા આપ્યા નહોતા.

‘તમારા ઘરે બેન્કનો માણસ ખરાઈ માટે આવશે’ તેમ કહીને ભાવેશ ચૌહાણ મફતમાં કપડાં લઈને જતા રહ્યા હતા. તા. ૨૬ જુલાઈએ સવારે ૧૦ વાગ્યે પંકજભાઈના ઘરે એક શખ્સ આવ્યો હતો. અમિત સી. સોલંકી નામ આપનાર આ શખ્સે પોતે બેન્ક ઓફ બરોડામાંથી આવે છે તેમ કહ્યું હતું. ભાવેશભાઈએ મોકલ્યો છે તેમ કહી પ્રેસ રિપોર્ટર (જનતાનું જોર નામનું પ્રેસકાર્ડ) તરીકેનું કાર્ડ બતાવ્યું હતું. પંકજભાઈ અને તેમના પત્ની વિશે માહિતી મેળવી હતી. રૂ. પાંચ લાખની લોન થશે અને દર રૂ. એક લાખે રૂ. ૨૧૦૦ ફાઈલ ચાર્જ લેખે રૂ. ૧૦,૫૦૦ તૈયાર રાખવાનું કહી બીજા દિવસે એગ્રીમેન્ટ કરવા આવશે તેવી વાત કરી હતી.

બીજા દિવસે સવારે ૧૦ વાગ્યે ભાવેશભાઈના મોબાઈલ ફોન ઉપરથી ફોન આવ્યો ત્યારે ફાઈલચાર્જ તૈયાર રાખવા વાત કરી હતી. વાત પૂરી થઈ પણ ભાવેશનો ફોન ‘ઓન’ રહી ગયો હતો. પંકજભાઈએ ઠગ ટોળકીની વાતચીત સાંભળી લીધી કે, ‘કપડાં નહીં લેવાના, તારે રોકડા જ લેવાના છે.’ આ વાતચીત સાંભળી હોવાથી પંકજભાઈને શંકા ગઈ હતી. સાંજે ભાવેશ અને અમિત આવ્યા ત્યારે પંકજભાઈએ ‘લોન નથી લેવી’ તેમ કહી ભાવેશ પાસે કપડાંના પૈસા માગ્યા હતા. ‘હું પૈસા લઈને આવું છું’ તેમ કહી ભાવેશ જતો રહ્યો હતો.

ભાવેશ સાથે દુકાને આવેલા શખ્સની તલાશી લેતા તેની પાસેથી બાજપાઈ યોજનાના ફોર્મ, બીજી મહિલાઓના નામથી લખેલા ફોર્મ, ફોટોગ્રાફ મળ્યા હતા. પોલીસ કન્ટ્રોલ રૂમને ફોન કરાતાં વાડજ પોલીસ સ્ટેશનના PSI ડી.આર. ગઢવી અને ટીમે સ્થળ પરથી વાડજ પોલીસે ભાવેશ ચૌહાણ અને અમિત સોલંકીની ધરપકડ કરી છે. વાડજના PI વી.જી. રાઠોડે જણાવ્યું કે, આ ઠગ ટોળકીએ છેતર્યાની ફરિયાદ ચાર શખ્સો નોંધાવી ચૂક્યા છે. અન્ય લોકો ભોગ બન્યા હોય તો પોલીસનો સંપર્ક સાધવા અપીલ કરાઈ છે.