ગેરકાયદે વીજ જોડાણમાં કરંટ લાગતા એક યુવકનું મોત

નવગુજરાત સમય > અમદાવાદ

શહેરમાં હજુ પણ કેટલાક સ્થળો પર ગેરકાયદે વીજ જોડાણ મેળવીને મફત વીજળી વાપરવાના પેંતરા ચાલી રહ્યાં હોવાના ઘટસ્ફોટ સાથે કરૂણ બનાવ પ્રકાશમાં આવ્યો છે. વટવામાં ચાની કિટલી પર ગેરકાયદે જોડાણના વાયરો વરસાદી માહોલમાં ખુલ્લા પડતા ઈલેક્ટ્રિક થાંભલામાં વીજ કરંટ પ્રસર્યો હતો, જેમાં એક સ્થાનિક યુવકનું મોત નિપજવાની ઘટના પોલીસ ચોપડે નોંધાઈ છે. પોલીસે ગેરકાયદે વીજ જોડાણ કરનારા બે શખ્સો સામે બદરકારીથી મોત નિપજાવાનો ગુનો નોંધી બન્ને આરોપીઓની શોધખોળ શરૂ કરી છે.

વટવા ચાર માળિયા નજીક રહેતા શકિનાબાનું મહોમદભાઈ આરબે વટવા પોલીસ સ્ટેશનમાં ફરિયાદ નોંધાવી છે કે, તેમનો ૩૦ વર્ષનો દીકરો આદીલ નજીકમાં જ નોકરી કરતો હતો. આદીલ ગત ૧૨ તારીખે ઘર નજીક આવેલી કે.જી.એન નામની ચાની કિટલી પર ચા પીવા પહોંચ્યો ત્યારે એક ઈલેક્ટ્રિક લાઈટના થાંભલાને અડી જતા તેને કરંટ લાગ્યો હતો અને તેનું મોત નિપજ્યું હતુ.

જે થાંભલામાંથી આદીલને કરંટ લાગ્યો તે થાંભલા પરથી યાસીનખાન સાબીરખાન અને ખ્વાજા મયુદ્દીન નામના બે શખ્સોએ ચાની કિટલી માટે ગેરકાયદે વીજ જોડાણ લીધુ હતુ. પોલીસે બેદરકારીથી કોઈનું મોત નિપજાવા અંગેનો ગુનો નોંધ્યો છે.

આ ઘટના અંગે તપાસ કરી રહેલા વટવાના પી.એસ.આઈ એસ.એ ગોહિલે જણાવ્યું હતુ કે, ઘટના સમયે અકસ્માત મોત નોંધી તપાસ શરૂ કરી હતી. જો કે વીજ જોડાણ ગેરકાયદે લીધુ હોવાનું ખુલતા બેદરકારીનો પણ ગુનો નોંધ્યો છે. હાલ બન્ને આરોપીઓની ધરપકડ માટે શોધખોળ કરવામાં આવી રહી છે.