લાંચ કેસ: મહિલા પોલીસ સ્ટેશનના PI દિવ્યા રવિયા માંદગીની રજા પર

નવગુજરાત સમય > અમદાવાદ

મહિલા પોલીસ સ્ટેશનમાં ACBની ટ્રેપ પછી ભૂગર્ભમાં ઉતરી ગયેલા પીઆઈ દિવ્યા રવિયા આખરે માંદગીની રજા ઉપર ઉતરી ગયા છે. પીઆઈ રવિયાએ મહિલા પોલીસ સ્ટેશનમાં ફેક્સ કરીને ગત તા. 12ના બપોર પછીથી પોતાની તબિયત બગડી છે અને સાત દિવસ સુધી પોતે આવી નહીં શકે તેવી જાણકારી આપી છે. બીજી તરફ, પીઆઈ રવિયાને પૈસા આપવા પડે તેવો ઉલ્લેખ FIRમાં હોવાથી તેમના ઘરે સર્ચ કરવામાં આવી હોવાનો દાવો કરતી ACB હજુ સુધી મહત્વના પુરાવા મેળવી શકી નથી.

ગત તા. 12ના રોજ ACBની ટ્રેપ પછી મીઠાખળી સ્થિત મહિલા પોલીસ સ્ટેશનમાં સન્નાટો પ્રવર્તે છે. તો, સામાજિક પ્રશ્નો લઈને આવતાં પ્રજાજનોને ન્યાય આપવાની પ્રક્રિયા નિષ્પક્ષ અને ન્યાયી બને તેવી આશા જાગી છે. મહિલા ACP પન્ના મોમાયા આ પોલીસ સ્ટેશનમાં બેસવા લાગ્યા છે. બીજી તરફ, ACBના ઉચ્ચ સૂત્રોનું કહેવું છે કે, પીઆઈ રવિયાનું નામ ફરિયાદમાં છે. ફરિયાદમાં ઉલ્લેખ છે કે, ‘અમારા કેસમાં વકીલ પરમાર અને કામિની તથા મહિલા વકીલ ઉમાબેન તથા કપીલાબેન અને રમીલાબેનના અને તેમના પીઆઈ સાહેબ રવિયા મેડમના એમ મળીને કુલ સાત લાખ રૂપિયા માંગેલા.’

ACBના સૂત્રોએ ઉમેર્યું કે, આવા ઉલ્લેખથી પ્રોસિજરના ભાગરૂપે પીઆઈ રવિયાના ઘરે સર્ચ કરાયું હતું. તેમની સામે વધુ પુરાવા એકત્ર કરાઈ રહ્યાં છે. સરકારી નોકર પીઆઈ રવિયા ભૂગર્ભમાં ઉતરી ગયા છે એટલે તેમનું નિવેદન નોંધી શકાયું નથી. આવા સંજોગોમાં પીઆઈ નિર્દોષ હોય તો તેમણે સામેથી હાજર થઈ નિવેદન નોંધાવવું જોઈએ.

એક PIના કારણે આખું પોલીસતંત્ર ચર્ચાસ્પદ મહિલા પોલીસ સ્ટેશનમાં લાંચની ટ્રેપ પછી ACBની મંથર ગતિની અને સ્થિતિ સ્પષ્ટ ન કરતી તપાસના કારણે પોલીસતંત્રમાં અનેક ચર્ચા જાગી છે. એવી ચર્ચા થઈ રહી છે કે, એક પીઆઈના કારણે આખા પોલીસતંત્રમાં ‘લાંચવૃત્તિ’ હોય તેવી છાપ ઉપસી રહી છે. ACBની કાર્યપદ્ધતિથી પોલીસ તંત્ર માટે ‘બદનામી’ના દિવસો આવ્યા હોવાની ચર્ચા ઉચ્ચસ્તરે થઈ રહી છે. બીજી તરફ, મહિલા પીઆઈ રવિયા લાંચની ટ્રેપના દિવસો થયા છતાં ક્યા કારણોસર ભાગતા ફરે છે? તેવો સવાલ ઉઠ્યો છે.