પોલીસ કોન્સ્ટેબલ અને તેમની પત્નીની ઘાતકી હત્યા, દીકરી અને તેનો બોયફ્રેન્ડ ગાયબ!

ઈન્દૌર: એક અજીબોગરીબ ઘટનામાં પોલીસ કોન્સ્ટેબલ અને તેની પત્નીની ઘાતકી હત્યા બાદ દંપતીની દીકરી અને તેનો બોયફ્રેન્ડ ગાયબ થઈ ગયા છે. હાલ પોલીસ 17 વર્ષની દીકરી અને તેના બોયફ્રેન્ડે શોધી રહી છે. પ્રાપ્ત વિગતો અનુસાર, ગુરુવારે સવારે બનેલી આ ઘટનામાં છોકરી સવારે 4.30 કલાકે પોતાના જર્મન શેફર્ડ ડોગ સાથે બહાર ફરતી હતી ત્યારે જ બેડરુમમાં સૂઈ રહેલા તેના માતાપિતાનું મર્ડર કરી દેવાયું હતું.

ચોંકાવનારી વાત એ છે કે, આ ઘટના બાદ ઘરે પરત ફરેલી છોકરી ડૉગને દરવાજે બાંધીને રવાના થઈ ગઈ હતી અને ત્યારથી તેનો કોઈ પત્તો નથી. અધૂરામાં પૂરું ત્રણેક દિવસ પહેલા કોઈએ ઘરના સીસીટીવી કેમેરા પણ બંધ કરી દીધા હતા તેવું પોલીસ તપાસમાં બહાર આવ્યું છે. છોકરી જતા પહેલા એક પત્ર મૂકીને ગઈ છે, જેમાં તેણે પોતાના પિતા વિરુદ્ધ આક્ષેપ કર્યા છે. જોકે, પોલીસે આવા કોઈ પત્રની પુષ્ટિ નથી કરી.

મૃતક કોન્સ્ટેબલ સ્પેશિયલ આર્મ્ડ ફોર્સમાં કાર્યરત હતા. તેમના માતાપિતા એક જ ઘરમાં ઉપરના માળે રહે છે. ડબલ મર્ડર થયું ત્યારે તેમનો દીકરો દાદા-દાદીના ઘરે હતો. સવારે નવ વાગ્યા સુધી તેની મમ્મી ચા આપવા ના આવતા દાદાએ તેને તેના વિશે પૂછવા માટે મોકલ્યો હતો અને તે વખતે કોન્સ્ટેબલ અને તેમના પત્નીનું મર્ડર થઈ ગયું હોવાનું બહાર આવ્યું હતું.

કોન્સ્ટેબલ અને તેમના પત્ની જે બેડરુમમાં સૂતા હતા તે અંદરથી લોક હતો. જેના કારણે તેમના દીકરાએ બારીમાંથી અંદર જોતા તેના માતાપિતા લોહીથી લથબથ હાલતમાં પડેલા દેખાયા હતા. આ દ્રશ્ય જોતા જ ડરી ગયેલા છોકરાએ ચીસાચીસ કરી મૂકી હતી અને એક મોટા પથ્થરથી દરવાજાનું લોક તોડી દીધું હતું. છોકરાની ચીસો સાંભળી તેના દાદા-દાદી અને પાડોશમાં રહેતા બીજા લોકો નીચે દોડી આવ્યા હતા. તેમણે જોયું કે કોન્સ્ટેબલ જમીન પર પડ્યા હતા, અને તેમના પત્ની બેડ પર હતા.

આ પણ વાંચો: માતા અને પોલીસકર્મી પિતાનું ખૂન કરાવી બોયફ્રેન્ડ સાથે ભાગી ગયેલી છોકરી પકડાઈ ગઈ

એક તરફ કોન્સ્ટેબલ અને તેમના પત્ની ઘરમાં મૃત હાલતમાં પડ્યા હતા, ત્યારે બીજી તરફ તેમની દીકરી ગાયબ હતી. શરુઆતમાં પોલીસને લાગ્યું હતું કે મૃતકની દીકરીનું અપહરણ થયું હોઈ શકે છે, કારણકે તેનો ફોન પણ સ્વીચ ઓફ હતો. મૃતકના પિતા નિવૃત્ત ડીએસપી છે. તેમણે પોલીસને જણાવ્યું હતું કે સવારે સાડા ચાર વાગ્યે તેમણે હાલ લાપતા થયેલી મૃતકની દીકરીને કૂતરા સાથે ટહેલતા જોઈ હતી. તેઓ તેને પૂછવાના પણ હતા કે તે આટલી ઠંડીમાં કેમ બહાર ફરી રહી છે, પરંતુ તેઓ પૂછ્યા વિના જ ફરી સૂવા જતા રહ્યા હતા. આ જ સમયે પાડોશીઓએ ઘરમાંથી ચીસો સાંભળી હતી.

એક પાડોશી ઘરની બહાર પણ આવી ગયા હતા, અને તેમણે છોકરીને કોણ ચીસો પાડી રહ્યું છે તેવું પૂછ્યું હતું. જેના જવાબમાં તેણે જણાવ્યું હતું કે તેના પિતા દારુ પીને આવ્યા છે, અને તેઓ માતા સાથે મારઝૂડ કરી રહ્યા છે. ઘટના બની ત્યાં જ રહેતા એક વ્યક્તિએ પણ પોતે સવારે પાંચ વાગ્યે ઘરમાંથી ચીસો સાંભળી હોવાનું પોલીસને જણાવ્યું હતું. ફોરેન્સિક તપાસમાં એવું પણ બહાર આવ્યું છે કે હુમલાખોરો બે કે તેથી વધુ હતા. મૃતક કોન્સ્ટેબલ સાથે તેમની જોરદાર ઝપાઝપી પણ થઈ હતી.

બીજી તરફ, પોલીસનો દાવો છે કે તેમણે આરોપીની ઓળખ કરી લીધી છે, અને તેની ટૂંક જ સમયમાં ધરપકડ કરી લેવાશે. અત્યારસુધીની તપાસમાં એવું પણ બહાર આવ્યું છે કે છોકરી 20 વર્ષના એક યુવકના પ્રેમમાં હતી, પરંતુ તેના પરિવારજનો આ સંબંધની વિરુદ્ધમાં હતા અને તેમણે છોકરીને આ સંબંધ તોડી નાખવા ચેતવણી આપી હતી. જોકે, થોડા દિવસ પહેલા છોકરીને તેના પ્રેમી સાથે તેના પિતાએ પકડી લીધી હતી, અને મૃતક કોન્સ્ટેબલે છોકરાનો કોલર ઝાલીને તેને ખેંચ્યો હતો.