અ'વાદઃ પાર્ટનરની સામે જ મહિલાઓનો ગેંગરેપ કરતા, કુખ્યાત ડફેર ગેંગનો સભ્ય ઝડપાયો

અમદાવાદઃ બુધવારે અમદાવાદમાંથી શહેર ક્રાઈમ બ્રાન્ચ પોલીસે કુખ્યાત ડફેર ગેંગના એક સભ્ય અકબર ઉર્ફે લુલો સંધીની ધરપકડ કરી છે. પોલીસ મુજબ સંધી બે ગેંગરેપ કેસમાં આરોપી છે. ક્રાઈમ બ્રાન્ચના ઈન્ચાર્જ DCP રાજદીપસિંહ ઝાલાએ કહ્યું કે, આ ગેંગના ત્રણ સભ્યો હજુ પણ ફરાર છે. ઝાલાએ કહ્યું કે, અત્યાર સુધીમાં લુલા સંધીની બે ગેંગરેપના કેસોમાં તેની સંડોવણી હોવાનું સામે આવ્યું છે. જેમાં તેણે એક યુવતી અને એક મહિલાની તેમના જ બોયફ્રેન્ડ અને પતિ સામે ગેંગરેપ કર્યો હતો. ગેંગ આ સાથે હત્યા, લૂંટ અને ચોરીના ગુનામાં પણ સંડોવાયેલી છે. ક્રાઈમ બ્રાન્ચના સીનિયર અધિકારીએ જણાવ્યું કે, ગેંગના સભ્યો જો પોતાના ટાર્ગેટ પાસેથી કોઈ કિંમતી ચીજવસ્તુ ન મળે તો તેની સાથે ગેંગરેપ કરતા. પોલીસે કહ્યું કે આ ગેંગ 18 જેટલી ઘરફોડ ચોરી, ગેરકાયદે હથિયાર રાખવા અને ખીસ્સા કાપી ચૂકી છે. ક્રાઈમ બ્રાન્ચે કહ્યું કે ગેંગે સાણંદ, સરખેજ, બાવળા, કલોલ, લાઘણજ, બગોદરા, મહેસાણા, લખતર, બાવળા, બોટાદ, વિરમગામ અને કડીમાં આ ગુના આચર્યા છે. જેમાં 10 ઓક્ટોબરે નર્મદા કેનાલ પાસેથી એક યુવતી અને તેનો બોયફ્રેન્ડ પસાર થઈ રહ્યા હતા. આ દરમિયાન અકબર અને તેનો સાથી આવ્યો અને ચાકુની અણીએ તેમની પાસેથી પૈસા કે જ્વેલરી માગવા લાગ્યો. પરંતુ તેમની પાસે કશું જ નહોતું. આ બાદ તેમણે છોકરાના હાથને બાંધી દીધા અને યુવતીને જાળીમાં ખેંચી ગયા અને તેની સાથે ગેંગરેપ કર્યો અને પછી યુવકનું હેલ્મેટ લઈને ભાગી ગયા. પોલીસે અકબર પાસેથી હેલ્મેટ રિકવર કર્યું છે. આ બાદ 30 ઓક્ટોબરે અકબર અને તેના સાગરીતોએ ખેતરમાં શેડની નીચે ઉંઘી રહેલા દંપતિને ચાકૂની અણીએ લૂંટવાનો પ્રયાસ કર્યો. જ્યારે તેમની પાસે કોઈ મોંઘી વસ્તુ ન મળી તો તેણે પતિને ટુવાલથી બાંધી દીધો અને પત્નીનો ગેંગરેપ કર્યો. પોલીસે જણાવ્યું કે તેમણે ગેંગના ચોથા સભ્યની પણ ઓળખ કરી લીધી છે જે ગુનો આચરવા માટે વાહન ચોરી કરતો હતો.