જજ કોર્ટમાં ચુકાદો આપી રહ્યા હતા, બદમાશો ઘરમાં પત્નીને બંધક બનાવી રોકડ-દાગીના લૂંટી ગયા

રોહતાસઃ બિહારના રોહતાસમાં નીડર બદમાશોએ સિવિલ જજના ઘરે હથિયારના આધારે લૂંટ ચલાવી હતી. સિવિલ જજ મહેશ્વર નાથ પાંડે કોર્ટમાં કેસની સુનાવણી કરી રહ્યા હતા ત્યારે બદમાશોએ આ ઘટનાને અંજામ આપ્યો હતો. આ ઘટના સવારે 9-10 વાગ્યાની આસપાસ બની હતી. મળતી માહિતી મુજબ બદમાશો તેમના ઘરેથી 50 હજાર રોકડ અને ઘરેણાં લઈને ભાગી ગયા હતા.

મળતી માહિતી અનુસાર જ્યારે બિક્રમગંજ કોર્ટમાં પદસ્થાપિત ફર્સ્ટ ક્લાસ જ્યુડિશિયલ મેજિસ્ટ્રેટ મહેશ્વર નાથ પાંડે કોર્ટમાં ગયા હતા ત્યારે ત્રણ લૂંટારૂઓ તેમના ઘરના દરવાજે પહોંચ્યા અને જજને શોધવા લાગ્યા. જ્યારે જજની પત્ની ગુંજા દેવીએ જણાવ્યું કે જજ કોર્ટમાં ગયા છે. ત્યારે બદમાશોએ પીવા માટે પાણી માંગ્યું. ન્યાયાધીશના ઘરની નોકરાણી પાણી લેવા માટે અંદર ગઈ કે તરત જ ત્રણેય બદમાશોએ પત્નીને બંધક બનાવી માર મારવાનું શરૂ કર્યું અને કબાટમાં રાખેલી 50 હજારની રોકડ અને દાગીના લઈને ફરાર થઈ ગયા.

પ્રાપ્ત માહિતી મુજબ જે સમયે લૂંટારૂઓ ત્રાટક્યા તે સમયે જજની પત્ની અને પુત્રી સિવાય ઘરમાં એક નોકરાણી હતી. ત્રણેયને ધોળા દિવસે બંધક બનાવીને લૂંટની ઘટનાને અંજામ આપવામાં આવ્યો હતો. આરોપીઓ ભાગી જતા જ જજની પત્નીએ ફોન કરીને પતિને ઘટનાની જાણ કરી તો હડકંપ મચી ગયો હતો અને બિક્રમગંજ પોલીસ સ્ટેશનની ટીમ ઉપરાંત અન્ય અધિકારીઓ ઘટનાસ્થળે પહોંચ્યા હતા અને ઘટના અંગે તપાસ હાથ ધરી હતી.

જજની પત્નીએ જણાવ્યું કે સવારે 9-10 વાગે ત્રણ યુવક આવ્યા હતા. ત્રણેયની ઉંમર 20થી 25 વર્ષની વચ્ચે હતી અને તેઓ ન્યાયાધીશને શોધી રહ્યા હતા. જ્યારે પત્નીએ કહ્યું કે તેઓ કોર્ટમાં ગયા છે તે પછી બધાએ પાણી માંગ્યું. તેઓ પાણી લેવા જતા હતા ત્યારે બધાએ ઘરમાં ઘુસીને બંધક બનાવીને લૂંટ ચલાવી હતી. ત્યારબાદ બિક્રમગંજ પોલીસ સ્ટેશને ઘટનાની પુષ્ટિ કરી છે અને જણાવ્યું કે પોલીસ ટીમ ઘટનાસ્થળે પહોંચીને તપાસ હાથ ધરી છે અને લૂંટારૂઓને ઓળખવાના પ્રયાસો ચાલુ છે.