અ'વાદઃ બીજે તો છોડો કલેક્ટર ઓફિસમાં પણ ધોળા દિવસે ચોરી, કારમાંથી 14.50 લાખની ઉઠાંતરી

અમદાવાદઃ શહેરમાં ચોરો બેફાન બન્યા છે. સ્થિતિ એવી બની ગઈ છે કે હવે તો કલેક્ટર ઓફિસ કે જ્યાં ચુસ્ત અને સીસીટીવી કેમેરા હોય છે તેવી જગ્યાએ પણ ચોરી કરવાથી ચોરોને ડર નથી લાગતો. શહેરમાં બુધવારે પ્રહલાદનગરના એક બિલ્ડરે રાણીપ પોલીસ સ્ટેશનમાં ફરિયાદ નોંધાવી હતી કે જિલ્લા કલેક્ટરની ઓફિસમાં પાર્ક કરેલી તેની કારની વિન્ડો તોડીને કોઈ 14.50 લાખ રૂપિયા ચોરી ગયું. બિલ્ડરે નોંધાવેલી ફરિયાદ મુજબ, ચોરીની આ ઘટના માત્ર 15 મિનિટના સમયમાં બની હતી. આ સમયે બિલ્ડર જયદેવ ભાસ્કર અને તેનો ભાઈ રવિશ 7/12ના ઉતારાના ડોક્યુમેન્ટ લેવા માટે કલેક્ટર ઓફિસમાં ગયા હતા. ભાસ્કરે પોતાની ફરિયાદમાં જણાવ્યું કે, મેં આશ્રમ રોડ પર આવેલા ચીનુભાઈ ટાવરમાંથી આંગડિયા પેઢી મારફતે 500ના 30 બંડલ એમ કુલ 15 લાખ રૂપિયા મેળવ્યા હતા. મેં એક બંડલ મારા ખિસ્સામાં મૂક્યું અને બાકીના રૂપિયા કાગળમાં બાંધીને કારની ફ્રંટ પેસેન્જર સીટની નીચે મૂક્યા હતા. આ બાદ ભાસ્કર કારને ગેટ નંબર 2 નજીક પાર્ક કરીને કલેક્ટર ઓફિસમાં ગયો અને કામ પતાવીને 15 મિનિટમાં પાછા આવતા જ જોયું કે કારની વિન્ડો તૂટેલી હતી અને અંદરથી પૈસા પણ ચોરી થઈ ગયા હતા. આ સમગ્ર મામલે રાણીપ પોલીસના ઈન્સપેક્ટર J.G પટેલે કહ્યું કે, તેમણે વિસ્તારના સીસીટીવી ફૂટેજ ચેક કર્યા છે પરંતુ વિઝ્યુઅલ સ્પષ્ટ નથી. પટેલે કહ્યું, પોલીસ ચોરને પકડવાનો પ્રયાસ કરશે સાથે જણાવ્યું કે ફરિયાદીએ થોડી વધારે કાળજી રાખવાની જરૂર હતી અને આ રીતે કારમાં પૈસા નહોતા મૂકવા જોઈતા.