Shraddha Murder: આફતાબનો જેલમાં જ થશે પોસ્ટ નાર્કો ટેસ્ટ ઈન્ટરવ્યુ, કેમ લેવાયો નિર્ણય?

નવી દિલ્હીઃ શ્રદ્ધા હત્યા કેસના આરોપી આફતાબનો નાર્કો ટેસ્ટ કરવામાં આવ્યો છે. નાર્કો ટેસ્ટમાં આફતાબે પોતાનો ગુનો કબૂલી લીધો છે અને દિલ્હી પોલીસને ઘણી મહત્વની કડીઓ પણ મળી છે. બીજી તરફ નાર્કો ટેસ્ટ બાદ ફોરેન્સિક સાયન્સ લેબોરેટરી (FSL)ની 4 સભ્યોની ટીમ અને તપાસ અધિકારી શુક્રવારે નાર્કો ટેસ્ટ પછીના ઇન્ટરવ્યુ માટે સેન્ટ્રલ જેલની મુલાકાત લેશે. જેલ અધિકારીઓના જણાવ્યા અનુસાર, આફતાબના પરિવહનમાં વધુ જોખમ હોવાના કારણે આફતાબનો ઇન્ટરવ્યુ સેન્ટ્રલ જેલમાં લેવામાં આવશે. આફતાબનો પોસ્ટ નાર્કો ટેસ્ટ ઈન્ટરવ્યુ શુક્રવારે સવારે 10થી બપોરે 3 વાગ્યા સુધી લેવામાં આવે તેવી શક્યતા છે.

આફતાબને લઈ જતી વેન પર થઈ ચૂક્યો છે હુમલો
શ્રદ્ધા કેસના આરોપી આફતાબ પર ખૂની હુમલો કરવાનો પ્રયાસ કરવામાં આવ્યો છે. હકીકતમાં, સોમવારે રાત્રે પોલીસ પોલિગ્રાફ ટેસ્ટ બાદ આફતાબને તિહાડ લઈ જઈ રહી હતી. અચાનક કેટલાક લોકોએ સૂત્રોચ્ચાર કરતા વેન રોકી હતી. હાથમાં તલવાર લઈને એક યુવક વારંવાર પોતાને એક સંસ્થાનો કાર્યકર ગણાવી રહ્યો હતો. તે બૂમો પાડી રહ્યો હતો કે અમારી બહેન-દીકરીઓ સુરક્ષિત નથી તો અમે જીવીને શું કરીશું. આફતાબને 2 મિનિટ માટે સોંપો, અમે તેને ગોળી મારીશું. એક પોલીસકર્મી વાનની પાછળ પહોંચી ગયો અને તેણે પોતાની પિસ્તોલ કાઢીને હુમલાખોરોને રોકવાનો પ્રયાસ કર્યો. જો પોલીસકર્મી આગળ ન વધ્યો હોત તો આફતાબ પર જીવલેણ હુમલો થયો હોત.

આફતાબનો નાર્કો ટેસ્ટ પૂર્ણ, અનેક કડીઓ મળી
દિલ્હીના મહેરૌલી વિસ્તારમાં તેની લિવ-ઈન પાર્ટનર શ્રદ્ધા વોકરની ઘાતકી હત્યાના આરોપી આફતાબ અમીન પૂનાવાલાના નાર્કો ટેસ્ટ ગુરુવારે પૂર્ણ થયા હતા. પોલીસે કહ્યું કે પરીક્ષણ સફળ રહ્યું છે અને તપાસકર્તાઓને અનેક કડીઓ મળી છે. તેમણે કહ્યું કે આફતાબને સવારે 8.30 વાગ્યે નાર્કો ટેસ્ટ માટે આંબેડકર હોસ્પિટલમાં લઈ જવામાં આવ્યો હતો, જે લગભગ 10 વાગ્યે શરૂ થયો હતો અને 12.30 વાગ્યે પૂરો થયો હતો. રોહિણી સ્થિત ફોરેન્સિક સાયન્સ લેબોરેટરી (FSL)માં મંગળવારે તેનો પોલીગ્રાફ ટેસ્ટ પૂર્ણ થયો હતો.

જાણો શું છે મામલોએક વરિષ્ઠ FSL અધિકારીના જણાવ્યા અનુસાર, આફતાબનો પોલીગ્રાફ ટેસ્ટ હવે પૂર્ણ થઈ ગયો છે અને એક-બે દિવસમાં વિગતવાર રિપોર્ટ દિલ્હી પોલીસ સાથે શેર કરવામાં આવશે. સૂત્રોએ જણાવ્યું હતું કે આ કેસમાં પોલીગ્રાફ અને નાર્કો ટેસ્ટ ફરજિયાત હતા, કારણ કે આફતાબ પૂછપરછ દરમિયાન પૂછપરછ કરનારાઓને ગેરમાર્ગે દોરવાનો પ્રયાસ કરી રહ્યો હતો. શ્રદ્ધા અને આફતાબની મુલાકાત 2018માં ડેટિંગ એપ 'બમ્બલ' દ્વારા થઈ હતી. તે 8 મેના રોજ દિલ્હી આવ્યો હતો અને 15 મેના રોજ છતરપુર વિસ્તારમાં શિફ્ટ થયો હતો. 18 મેના રોજ, આફતાબે કથિત રીતે શ્રદ્ધાની હત્યા કરી હતી, તેના શરીરના 35 ટુકડા કરી નાખ્યા હતા અને 18 દિવસના સમયગાળામાં તેને વિવિધ સ્થળોએ ફેંકી દીધા હતા.