પોતાના લગ્નમાં ખર્ચો કરવા યુવકે કર્યો કાંડ, પણ એક ભૂલને કારણે પકડાઈ ગયો

મધ્ય પ્રદેશના કટનીમાં ચોરીનો અનોખો કિસ્સો સામે આવ્યો છે. પોતાના લગ્નમાં રૂપિયા ખર્ચી શકે તે માટે ચોરે બેંકમાં ચોરીની ઘટનાને અંજામ આપ્યો હોવાનું જાણવા મળ્યું છે. પ્રાપ્ત માહિતી અનુસાર આ મામલો જિલ્લાના બડવારા પોલીસ સ્ટેશનનો છે. પોલીસે ચોરની ધરપકડ કરી તેની પાસેથી 1.14 લાખની રોકડ રકમ સાથે મોબાઈલ અને મોટરસાઈકલ કબજે કરીને કાયદેસરની કાર્યવાહી હાથ ધરી છે.ઘટનાની વિગતો એવી છે કે, કટની જિલ્લાના બડવારામાં 7 જાન્યુઆરીએ મધ્યપ્રદેશ ગ્રામીણ બેંકમાં ચોરીનો મામલો સામે આવ્યો હતો. બેંકની દિવાલ તોડીને અજાણ્યા ચોર 1,27,212 રૂપિયાની ચોરી કરી ગયો હતો. આ અંગે બેંક મેનેજરની ફરિયાદ પરથી બડવારા પોલીસ સ્ટેશનમાં અજાણ્યા ચોર સામે ગુનો નોંધવામાં આવ્યો હતો. એસએચઓ અંકિત મિશ્રાએ તેમના ઉચ્ચ અધિકારીઓને મામલાની જાણ કરી હતી. આ પછી ચોરને શોધવા માટે ખાસ ટીમ બનાવવામાં આવી હતી.

આ દરમિયાન પોલીસને બાતમીદાર પાસેથી માહિતી મળી કે બડવારા પોલીસ સ્ટેશન વિસ્તારના રોહાનિયા ગામમાં રહેતો સુભાષ યાદવ (29 વર્ષીય) તેના મિત્રોને બિનજરૂરી મોટી પાર્ટી આપી રહ્યો હતો. પોલીસે શંકાના આધારે આરોપીને કસ્ટડીમાં લીધો હતો. સઘન પૂછપરછ બાદ આરોપીએ બેંકમાં ચોરી કર્યાની કબૂલાત કરી હતી. સુભાષે જણાવ્યું કે પોતાના લગ્ન કરાવવાના હોવાથી પૈસાના અભાવે ઘણા દિવસોથી બેંકમાં ચોરી કરવાનો પ્લાન બનાવી રહ્યો હતો.

ચોરે જણાવ્યું કે 6 અને 7 જાન્યુઆરીની મધ્યરાત્રિએ તેણે મધ્યપ્રદેશ ગ્રામીણ બેંક બડવારાની દિવાલ તોડીને 1.27 લાખની ચોરી કરી હતી. પોલીસે આરોપી પાસેથી રૂ.1 લાખ 14 હજારની રોકડ સાથે ખરીદેલ મોબાઈલ ફોન અને બનાવને અંજામ આપવા માટે વપરાયેલ બાઇક અને બ્રાન્ડેડ જેકેટ પણ કબજે કર્યા છે. આરોપીને કોર્ટમાં રજૂ કરીને વધુ તપાસ હાથ ધરવામાં આવી છે.