યુવકે ઓનલાઈન ગેમમાં પૈસા ગુમાવ્યા, કરજ ચૂકવવા પોતાના જ અપહરણનું તરકટ રચી માતા-પિતા પાસે માંગી રકમ

ઉજ્જૈન- ઓનલાઈન ગેમનું વળગણ એવુ હોય છે જેના શિકાર માત્ર બાળકો જ નહીં, મોટી ઉંમરના લોકો પણ બની જતા હોય છે. યુવાનો ગેમ પાછળ સમય તો વેડફે જ છે, હવે તો પૈસા પણ લગાવતા થઈ ગયા છે. આવો જ એક કિસ્સો મધ્યપ્રદેશથી સામે આવ્યો છે. અહીં એક 20 વર્ષીય યુવાને પોતાના જ અપહરણનું તરકટ રચ્યું અને પિતા પાસે બેન્ક અકાઉન્ટમાં 50,000 રુપિયા જમા કરાવવાની માંગ કરી. શનિવારના રોજ ઉજ્જૈન પોલીસે આ બાબતે જાણકારી આપી હતી. આ યુવકે ઓનલાઈન ગેમમાં પૈસા ગુમાવ્યા હતા અને હવે તે ભરવા માટે તેણે આ સમગ્ર યોજના ઘડી હતી.

નિતેશ અનોખીલાલે આરોપ મૂક્યો કે ઉજ્જૈનના કંચનપુરા વિસ્તારમાં તેનું અપહરણ કરવામાં આવ્યુ હતું અને સુમરખેડા રેલવે સ્ટેશન નજીક ચાલતી ટ્રેનમાંથી તેને ફેંકી દેવામાં આવ્યો હતો. સુમરખેડા રેલવે સ્ટેશન ઉજ્જૈનથી લગભગ 30 કિમી દૂર આવેલું છે. પ્રાપ્ત જાણકારી અનુસાર, નિતેશ રેલવે સ્ટેશનમાં અર્ધનગ્ન અવસ્થામાં ચાલીને આવતો જોવા મળ્યો હતો. રેલવે સ્ટેશનના કર્મચારીઓ પણ તેને જોઈને ચોંકી ગયા હતા. તેણે કર્મચારીઓને જણાવ્યું કે તેનું અપહરણ કરવામાં આવ્યું છે, તેની સાથે મારપીટ કરવામાં આવી અને ટ્રેનમાંથી ફેંકી દેવામાં આવ્યો. ત્યારસુધીમાં તેના માતા-પિતાએ બેન્ક અકાઉન્ટમાં 50,000 રુપિયા જમા કરાવી દીધા હતા.

નિતેશના માતા-પિતાને એક વીડિયો મેસેજ મોકલવામાં આવ્યો હતો, જેમાં કહેવામાં આવ્યુ હતું કે આ સ્થળ પર આવીને તમારા દીકરાને લઈ જજો. આ મેસેજ નિતેશના પિતા અને કાકાને મોકલવામાં આવ્યો હતો. વીડિયોમાં નિતેશ અર્ધનગ્ન અવસ્થામાં હતો અને તેને માર મારવામાં આવ્યો હોય તેમ દર્શાવવામાં આવ્યુ હતું. વીડિયો સાથે કહેવામાં આવ્યુ હતું કે 50,000 રુપિયા તમારે ચૂકવવા પડશે. નિતેશના પિતાએ પૈસા ભરી દીધા પણ તે સ્થળ પર દીકરો હાજર નહોતો, જેથી તેમણે માધવ નગર પોલીસ સ્ટેશનમાં ફરિયાદ દાખલ કરી. પોલીસ સ્ટેશનના ઈન-ચાર્જ મનિષ લોઢાએ નિતેશની મેડિકલ તપાસ કર્યા પછી નિવેદન નોંધ્યુ હતું.

તપાસ દરમિયાન પોલીસને લાગ્યું કે નિતેશની વાતો અસંગત છે. પોલીસને શંકા જતા તેમણે ફેરવી-તોળીને પ્રશ્નો કર્યા. આખરે તે ભાંગી પડ્યો અને સ્વીકાર્યું કે ઓનલાઈન ગેમ રમતી વખતે જે પૈસા ગુમાવ્યા હતા તે ચૂકવવા માટે આ તરકટ રચ્યુ હતું. પોલીસે જણાવ્યું કે, નિતેશે વીડિયો બનાવીને તેના પિતાને મોકલ્યો. લોકેશન ટ્રેસ ના થઈ શકે તે માટે ઈન્ટરનેટ પ્રોટોકોલનો ઉપયોગ કર્યો. માતા-પિતાએ પૈસા મોકલ્યા તો તરત તેને અન્ય અકાઉન્ટમાં ટ્રાન્સફર કરી દેવામાં આવ્યા હતા.

ઉલ્લેખનીય છે કે આર્મીમાં ભરતી થાય તે માટે તૈયારી કરવા માટે નિતેશ કંચનપુરામાં ભાડાના મકાનમાં રહેતો હતો. અહીં તેને ઓનલાઈન ગેમિંગની લત લાગી ગઈ હતી. માતા-પિતા પૈસા નહીં આપે તે ડરથી તેણે આ સમગ્ર તરકટ રચ્યુ હતું.