નવરંગપુરા પોલીસ સ્ટેશનના બે કોન્સ્ટેબલો સ્યૂઈસાઈડ નોટ લખી ગુમ થઈ ગયા

અમદાવાદ: નવરંગપુરા પોલીસ સ્ટેશનમાં ફરજ બજાવતા બે કોન્સ્ટેબલો લાપતા થઈ ગયા હોવાનું સામે આવ્યું છે. પ્રાપ્ત વિગતો અનુસાર, જિગર સોલંકી અને કૌશલ ભટ્ટ નામના બે કોનસ્ટેબલો સ્યૂઈસાઈડ નોટ લખીને ગુમ થઈ ગયા છે. આ બંને કોન્સ્ટેબલોએ નવરંગપુરા પોલીસ સ્ટેશનના પીઆઈ પીબી દેસાઈ અને તેમના બે કોન્સ્ટેબલો પોતાને ત્રાસ આપતા હોવાનું આ નોટમાં જણાવ્યું છે. તેમણે લખ્યું છે કે, હવે તેઓ જીવવા નથી માગતી, અને તેની સંપૂર્ણ જવાબદારી પીઆઈ, તેમના બે વહીવટદારો અને એસીપીની રહેશે. હવે સીધા Whatsapp પર મેળવો મહત્વના ન્યૂઝ, શરુ કરવા ક્લિક કરો નવરંગપુરાના આ બે કોન્સ્ટેબલો સામે થોડા સમય પહેલા જ બે લાખ રુપિયાનો તોડ કર્યાની અરજી થઈ હતી. સૂત્રોનું માનીએ તો, આ મામલે પીઆઈ અને ઉચ્ચ અધિકારીઓએ આ બંને કોન્સ્ટેબલોને ખુલાસો આપવા બોલાવ્યા હતા. જોકે, તેમણે અધિકારીઓની સામે જ તોડ થાય છે અને વહીવટો ચાલે છે તેવા પોતાની સ્યૂઈસાઈડ નોટમાં આક્ષેપ કર્યા છે, અને બંને કોન્સ્ટેબલોનો હાલ કોઈ પત્તો નથી. જિગર સોલંકી અને કૌશલ ભટ્ટ છેલ્લા બે દિવસથી ગુમ છે. આ અંગે સોલા અને ઘાટલોડિયા પોલીસ સ્ટેશનમાં જાણવાજોગ ફરિયાદ નોંધવામાં આવી છે. જિગર સોલંકીની સ્યૂઈસાઈડ નોટમાં એવા મતલબનું લખાણ કર્યાનો આક્ષેપ છે કે, તેમણે નવરંગપુરામાં દારુના સ્ટેન્ડ ચાલતા હોવાનું પીઆઈને જણાવ્યું હતું. જોકે, પીઆઈએ એવું કહી ધમકાવ્યા હતા કે શાંતિથી નોકરી કરો નહીંતર ખોટા કેસમાં ફસાઈ જશો. કૌશલ ભટ્ટે પણ જિગરની જેમ જ સ્યૂઈસાઈડ નોટ લખી છે, જેમાં તેમણે લખ્યું છે કે, તેમણે બી ડિવિઝનના એસીપીને નવરંગપુરા પીઆઈના બે વહીવટદારો વિશે જણાવ્યું હતું, જોકે એસીપીએ કોઈ એક્શન લેવાને બદલે રુબરુ બોલાવીને ધમકાવ્યા હતા, અને ખોટા કેસમાં ફસાવી દેવાની ધમકી આપી એવું કહ્યું હતું કે, કંઈ નહીં થાય. તારે મરવું હોય તો મરી જા.