અમદાવાદની ચોંકાવનારી ઘટના: ચેઈન સ્નેચરે ચેન ખેંચી, અને પછી મહિલા સાથે આવું કર્યું!

અમદાવાદ: ચેઈન સ્નેચિંગના ગુનામાં કડકમાં કડક સજાની જોગવાઈ હોવા છતાં તે અટકવાનું નામ નથી લઈ રહ્યા. અમદાવાદની એક મહિલાને તાજેતરમાં જ ચેઈન સ્નેચિંગનો ભયાનક અનુભવ થયો હતો. આ મહિલાને પોતાની ચેઈન તો ગુમાવવી જ પડી હતી, પરંતુ તેની સાથે ચેઈન સ્નેચરે તેને લાફા પણ માર્યા હતા. હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો ખાનપુરમાં રહેતા દિનેશભાઈ શાહ મંગવારે રાત્રે પોતાના પત્ની દક્ષાબેન સાથે લૉ ગાર્ડન જઈ રહ્યા હતા. દંપતી બાઈક પર મીઠાખળીથી લો ગાર્ડન તરફ જઈ રહ્યું હતું ત્યારે જ મોપેડ પર આવેલા બે શખ્સો તેમના પર ત્રાટક્યા હતા, અને દક્ષાબેનના ગળામાં હાથ નાંખી તેમની ચેઈન ખેંચી લીધી હતી. ચેઈન ખેંચનારા બુકાનીધારી શખ્સે આટલેથી ન અટકતાં દક્ષાબેનને લાફા માર્યા હતા, જેના કારણે તેમના નાકમાંથી લોહી નીકળવા લાગ્યું હતું. ચેઈન સ્નેચરના હુમલામાં ઘવાયેલા દક્ષાબેનના નાકમાંથી હીરાજડિત ચૂની પણ ક્યાંક પડી ગઈ હતી. તેમની ચેઈનનો એક ટૂકડો બ્લાઉઝમાં ફસાઈ ગયો હતો, પરંતુ પોણા ભાગથી પણ વધુની ચેઈન સ્નેચરો લઈને ભાગી ગયા હતા. આ ઘટના બની ત્યારે દક્ષાબેનની દીકરી પણ તેમની પાછળ જ અલગ મોપેડ પર આવી રહી હતી. તેણે ચેઈન સ્નેચરોનો પીછો કર્યો હતો, પરંતુ સેકન્ડોમાં જ તેઓ ગાયબ થઈ ગયા હતા. આ મામલે નવરંગપુરા પોલીસ સ્ટેશનમાં ફરિયાદ નોંધાવામાં આવી છે. પોલીસે દક્ષાબેનની ચેઈન લૂંટી તેમને માર મારનારા શખ્સોને શોધવા માટે કવાયત શરુ કરી છે.