પતિની કરતૂત: નાયબ મામલતદાર પત્ની સાથેના અંગત વિડીયો વાયરલ કરી દીધા

અમદાવાદ: ગાંધીનગરના સેક્ટર 3માં રહેતી 32 વર્ષીય મહિલાએ પોતાના પતિ વિરુદ્ધ સેક્ટર 7 પોલીસ સ્ટેશનમાં ફરિયાદ નોંધાવી છે. મહિલાનો આરોપ છે કે તેના પતિએ તેમની અંગત પળોના ફોટોગ્રાફ્સ અને વિડીયો તેણીના સંબંધીઓને મોકલી દઈને તેની આબરુને હાનિ પહોંચાડી છે. ફરિયાદી મહિલા નાયબ મામલતદાર તરીકે ફરજ બજાવે છે.

મહિલાએ ફરિયાદમાં જણાવ્યું છે કે તેના લગ્ન સ્વપ્નસ્વરુપ ખરાડી સાથે મે 2008માં થયા હતા. તેનો પતિ ખાનગી કંપનીમાં નોકરી કરે છે, જ્યારે મહિલા સરકારી નોકરિયાત છે. મહિલાએ એવો આક્ષેપ પણ કર્યો છે કે તેની સરકારી નોકરીથી પતિને ઈર્ષ્યા થતી હતી, અને તેના કારણે જ તે તેને હેરાન કરતો હતો.

પતિ વારંવાર રુપિયાની માગણી કરી જો માગ પૂરી ના થાય તો ધમકીઓ આપતો હતો તેવું પણ મહિલાએ ફરિયાદમાં જણાવ્યું છે.

પોતે રુપિયા આપવાનું બંધ કરી દેતા બદલો લેવાની ભાવના સાથે પતિએ અગાઉ ઉતારેલા પોતાની અંગત પળોના વિડીયો વાયરલ કરી દેવાની ધમકી આપી હતી. જોકે, પોતે ધમકીને વશ ના થતાં પતિએ ગયા સપ્તાહે આ વિડીયો તેણીના મિત્રો અને સંબંધીઓને મોકલી દીધા હોવાનું ફરિયાદમાં જણાવાયું છે.

મહિલાનો દાવો છે કે, તેના પતિએ આ વિડીયો તેની મરજી વિના ઉતારી લીધા હતા. પોતાના વિડીયો સોશિયલ મીડિયામાં ફરતા થઈ ગયા છે તેવું મહિલાને તેના એક મિત્ર મારફતે જાણવા મળ્યું હતું.

વિડીયો અંગે મહિલાએ પતિને પૂછતા તેણે જણાવ્યું હતું કે તેને બદનામ કરવાના હેતુથી પોતે વિડીયો માત્ર તેણીના મિત્રોને જ નહીં, પરંતુ સંબંધીઓને પણ મોકલી દીધા છે. આખરે આ મામલે પતિ-પત્ની વચ્ચે ઝઘડો થતાં પત્ની દ્વારા પતિ વિરુદ્ધ પોલીસ ફરિયાદ નોંધાવાઈ હતી.