EWS વિદ્યાર્થીઓને પણ મળશે IIM-Aમાં એડમિશન

પાર્થ શાસ્ત્રી, અમદાવાદ: શૈક્ષણિક વર્ષ 2020-21થી અમદાવાદ IIMમાં આર્થિક પછાત વર્ગ (EWS) માટે 10 સીટ અનામત રખાશે. મિનિસ્ટ્રી ઓફ હ્યુમન રિસોર્સ ડેવલપમેન્ટ (MHRD)ની ગાઈડલાઈનનું પાલન કરતાં આ નિર્ણય લેવામાં આવ્યો છે. B-સ્કૂલના હોદ્દેદારોના જણાવ્યા મુજબ, IIM-Aના ફ્લેગશિપ પીજીપી એમબીએ કોર્સની આ વર્ષની એડમિશન પ્રક્રિયામાં 10 બેઠકો EWS ક્વોટા માટે ફાળવવામાં આવી છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

શુક્રવારે અમદાવાદ IIMએ સફળ થયેલા 430 ઉમેદવારોને એડમિશન લેટર આપ્યા હતા. અધિકારીઓએ કહ્યું કે, આ વર્ષની બેચમાં 395 વિદ્યાર્થીઓ હશે. અધિકારીઓના મતે, આ વર્ષે ગુજરાતમાંથી કેટલા વિદ્યાર્થીઓ IIM-Aમાં એડમિશન મેળવી શક્યા છે તેની માહિતી તારવવાની બાકી છે.

એન્જિનિયરિંગના વિદ્યાર્થીઓએ આ બેચમાં પણ બાજી મારી છે. આ વર્ષે એડમિશન મેળવવામાં સફળ રહેલા કુલ ઉમેદવારોમાંથી 79% એન્જિનિયરિંગ બેકગ્રાઉન્ડ ધરાવે છે. ગયા વર્ષે પણ એન્જિનિયરિંગના આટલા જ વિદ્યાર્થીઓ હતા તેમ અધિકારીએ જણાવ્યું. આ જ પ્રકારે જેન્ડર રેશિયો જોઈએ તો ગયા વર્ષની સરખામણીમાં ખાસ ફરક પડ્યો નથી. આ વર્ષે પણ પસંદગી પામેલા કુલ ઉમેદવારોમાંથી 23% વિદ્યાર્થિનીઓ છે. પસંદગી પામેલા વિદ્યાર્થીઓનો સરેરાશ વર્ક એક્સપિરિયન્સ 22 મહિના છે.

IIM-Aના એડમિશન વિભાગના વડા પ્રોફેસર વિશાલ ગુપ્તાએ કહ્યું, "પીજીપી કોર્સના 430 ઉમેદવારો અને પીજીપી-એફએબીએમના 47 ઉમેદવારોને એડમિશન લેટર મોકલવામાં આવ્યા છે. પીજીપીના વિદ્યાર્થીઓમાં વૈવિધ્યતા આવે તેવો પ્રયાસ વર્ષોવર્ષથી IIM કરે છે. અમને આનંદ છે કે, આ વર્ષે પણ બેચમાં એન્જિનિયરિંગ અને નોન-એન્જિનિયરિંગ વિદ્યાર્થીઓ ઉપરાંત યુવક-યુવતીઓને સારો રેશિયો છે."

IIM-Aના હોદ્દેદારોએ કહ્યું કે, કોવિડ-19 મહામારીની એડમિશન પ્રક્રિયા પર અસર થઈ નથી. ગયા વર્ષની જેમ આ વર્ષે પણ એડમિશન પ્રક્રિયા ઉમેદવારોના CATના સ્કોર, એપ્લિકેશન રેટિંગ (ધોરણ 10-12 અને ગ્રેજ્યુએશનના પરિણામનો પણ સમાવેશ થાય છે), પર્સનલ ઈન્ટરવ્યૂ અને એનાલિટિકલ રાઈટિંગ ટેસ્ટ આધારિત હતી. લોકડાઉન પહેલા જ ફેસ-ટુ-ફેસ ઈન્ટરવ્યૂ પૂરા કરી દેવાયા હતા.