પિતાની તસવીર સામે શૂટિંગનો વિડીયો વાયરલ, ચિરાગ પાસવાને નીતિશ કુમાર પર સાધ્યું નિશાન

પટણા: બિહાર વિધાનસભા ચૂંટણી સમયે એલજેપી અધ્યક્ષ ચિરાગ પાસવાનનો એક વિડીયો લીક થઈ ગયો છે. આ વિડીયોમાં ચિરાગ પાસવાન એક જાહેરાતનું શૂટિંગ કરી રહ્યા છે, જેમાં તેઓ એક્ટિંગ કરતા જોવા મળી રહ્યા છે. પિતા રામવિલાસ પાસવાનની તસવીર સામે જ ચિરાગ ડાયલોગ બોલી રહ્યા છે, મજાક-મસ્તી કરી રહ્યા છે. એટલું જ નહીં, એક્ટિંગની સાથે-સાથે કઈ વાત કઈ રીતે કહેવાની છે, એ બધુ નક્કી કરતા દેખાઈ રહ્યા છે. આ જાહેરાતમાં ચિરાગ ઘણા ઈમોશનલ દેખાઈ રહ્યા છે! આ લીક વિડીયો અને જાહેરાતના વિડીયોને જોઈને ઘણા સવાલ ઉઠી રહ્યા છે. તો, જેડીયુએ આ લીક વિડીયોને લઈને ચિરાગ પાસવાન પર નિશાન સાધ્યું છે. જોકે, એલજેપીએ કહ્યું કે, જેડીયુની હારની અકળામણ હવે જાહેરમાં દેખાવા લાગી છે. નીતિશ કુમારને હવે પોતાની હાર પર પૂરો વિશ્વાસ થઈ ગયો છે. તો ચિરાગ પાસવાને પણ નીતિશ કુમાર પર નિશાન સાધતા કહ્યું કે, જનતા દળ આટલા નીચલા સ્તરે જશે તેની આશા ન હતી.

ચિરાગ પાસવાને એમ પણ કહ્યું કે, તેમણે કોઈની સામે એ સાબિત કરવાની જરૂર નથી કે પિતાના મોતથી તેઓ કેટલા દુઃખી છે. તેમણે ન્યૂઝ એજન્સી એએનઆઈને જણાવ્યું કે, 'મને સમજાતું નથી કે, આ વિડીયો ફરતો કરવાનો હેતુ શું છે. મારે મારા પિતાના નિધનના દુઃખનો પુરાવો આપવાની જરૂર નથી. મને ક્યારેય આશા ન હતી કે, સીએમ આટલા નીચલા સ્તરે ઉતરી જશે. જો તમારે પ્રશ્ન જ પૂછવા છે તો નીતિઓ, કામ, 'બિહાર ફર્સ્ટ બિહારી ફર્સ્ટ'ને ક્રિટિસાઈઝ કરો. પણ મને ક્યારેય વિચાર્યું ન હતું કે, મુખ્યમંત્રી અંગત પ્રહાર કરીને આટલા નીચલા સ્તરે ઉતરી જશે.'

ચિરાગે એવો પણ આરોપ લગાવ્યો કે, નીતિશ કુમાર લોકોના ઘરમાં જાસૂસી કરી રહ્યા છે. તેમણે ઉમેર્યું કે, 'તેમને (નીતિશ કુમારને) કદાચ બીક છે કે મારી સરકારમાં તેઓ જેલમાં જશે. મુખ્યમંત્રીએ લોકોના ઘરમાં જાસૂસી કરવાનું શરૂ કરી દીધું છે અને તે ચિંતાની વાત છે.'

હકીકતમાં, ચિરાગ પાસવાનનો જે વિડીયો સામે આવ્યો છે, તેને લઈને સવાલ ઉઠી રહ્યા છે કે, પોતાના પિતા રામવિલાસ પાસવાનના નિધન પછી દુઃખના સમયમાં કોઈ કઈ રીતે મજાક-મસ્તી અને એક્ટિંગ કરી શકે? શું ચિરાગને પિતાના મોતના દુઃખ કરતા વધુ ચૂંટણીની ચિંતા છે? ચૂંટણી જીતવા માટે ચિરાગ પાસવાને એક્ટિંગ કરી છે? આ લીક વિડીયો બિહારમાં પહેલા તબક્કાના વોટિંગ પહેલા જ સામે આવ્યો છે. પિતાની તસવીર સામે ચિરાગ પાસવાનના આ અંદાજને લઈને એક પ્રકારનો રાજકીય વિવાદ શરૂ થઈ ગયો છે.

જેડીયુ પ્રવક્તા રાજીવ રંજને કહ્યું કે, ચિરાગ પાસવાનના આ વિડીયોને જોયા બાદ બિહારની જનતાને તેમની ચાલ અને ચરિત્રને સમજવામાં મુશ્કેલી નહીં પડે. એક દિવસ પહેલા પોતાના પિતાના અગ્નિ સંસ્કાર સમયે બભાન થવાનું નાટક કરનારા ચિરાગ પાસવાન બીજી જ દિવસે કેમેરા સામે ઊભા થઈ ગયા. કઈ રીતે આ મોતને અંકે કરવામાં આવે, તેના માટે મજાક-મસ્તીની સાથે પોતાની આસપાસના લોકો સાથે વાતચીત કરતા જોવા મળી રહ્યા છે. આ એટલી અમાનવીય અનૈતિક તસવીર છે, જેની જેટલી ટીકા કરવામાં આવે તેટલી ઓછી છે. તેમણે કહ્યું કે, જે રીતે તેમના ચહેરા પર હાસ્ય જોવા મળી રહ્યું છે, તેનાથી રામવિલાસ પાસવાનની આત્મા દુઃખી થશે. આવા લોકો પોતાના પિતાની મોતને અંકે કરવાનો સતત પ્રયાસ કરી રહ્યા છે. હકીકતમા, રામવિલાસ પાસવાન સતત વિચારતા હતા કે નીતિશ કુમારની સરકાર બને અને લોજપા તેમાં સામેલ થાય. પરંતુ આ વાયરલ વિડીયોથી એક મહત્વકાંક્ષી અને સ્વાર્થી યુવાન નેતાની જે અસલી તસવીર છે તે બિહારની જનતા સામે આવી ગઈ.

એલજેપીનો જવાબ-નીતિશ કુમારને હવે લાગી રહ્યો છે હારનો ડર
એલજેપીએ સમગ્ર મામલે જેડીયુ પર વળતો પ્રહાર કર્યો છે. એલજેપીએ સત્તાવાર ટ્વિટર હેન્ડલ પરથી કરેલી ટ્વીટમાં કહ્યું કે, જેડીયુના નેતાઓએ એક વિડીયો રિલીઝ કર્યો છે, જેમાં રાષ્ટ્રીય અધ્યક્ષ ચિરાગ પાસવાન પોતાના પિતાની તસવીર સાથે 'બિહાર1stબિહારીst' શૂટ કરાવી રહ્યા છે. હવે, નીતિશ કુમાર તેના પર પણ રાજકારણ કરવા ઈચ્છે છે. તેમની હારની અકળામળ હવે જાહેરમાં જોવા મળી રહી છે. નીતિશ કુમારને હવે પોતાની હારનો પૂરો વિશ્વાસ થઈ ગયો છે.

એલજેપીએ બીજી ટ્વીટમાં લખ્યું કે, ચૂંટણી પાર્ટીએ લડવાની છે, તો વિડીોય શૂટ થશે જ, આ વિડીયોને બતાવીને જેડીયુના લોકો શું બતાવવા માગે છે. જેડીયુના નેતા હારની અકળામણમાં ઘણા નીચલા સ્તર પર ઉતરી આવ્યા છે. પાર્ટીનો મેનિફેસ્ટો લોન્ચ કરવા આ વિડીયો શૂટ કરાયો હતો. દરરોજ વિડીયો શૂટ થઈ રહ્યા છે, તેમાં શું વાંધો છે. નીતિશ કુમારને જનતા તેનો જવાબ આપશે. નીતિશ કુમારની વિદાય નિશ્ચિત છે.