Gujarat Election: ભાજપ ગુરુવારે જાહેર કરશે ઉમેદવારોના નામ, મોટાભાગના નવા ચહેરાઓ!

ગાંધીનગર: ગુજરાત વિધાનસભા ચૂંટણીને લઈને કોંગ્રેસ અને આમ આદમી પાર્ટી દ્વારા તેમના ઉમેદવારોની જાહેરાત કરી દેવામાં આવી છે. ત્યારે 27 વર્ષથી સત્તામાં રહેલા ભાજપ દ્વારા કયા ઉમેદવારો જાહેર કરવામાં આવશે તેને લઈને છેલ્લા સમયથી આતુરતા જોવાઈ રહી છે. જો કે બુધવારે દિલ્હીમાં મળેલી બેઠકમાં ચર્ચા-વિચારણા કર્યા બાદ ભાજપના ઉમેદવારોના નામ નક્કી કરવામાં આવ્યા છે પરંતુ હજી સુધી સત્તાવાર રીતે જાહેરાત કરવામાં આવી નથી. એટલે ગુરુવારે તેમના નામ પર મહોર લાગી શકે છે. સૂત્રો અનુસાર નો રીપિટ થિયરી અનુસાર ઉમેદવારોની યાદીમાં મોટા ભાગના નવા ચહેરાઓને સામેલ કરવામાં આવ્યા છે. જોકે, ઉમેદવારનો યાદી જાહેર કરવામાં આવી તે પહેલા જ ભૂતપૂર્વ મુખ્યમંત્રી વિજય રૂપાણી અને ભૂતપૂર્વ નાયબ મુખ્યમંત્રી નીતિન પટેલ સહિત પાંચ દિગ્ગજ નેતાઓએ ચૂંટણી નહીં લડવાની જાહેરાત કરી હતી.

ભાજપની ચૂંટણી સમિતિની બેઠક પૂર્ણ
ભાજપમાં પીએમ મોદી, ગૃહમંત્રી અમિત શાહ, ભાજપ રાષ્ટ્રીય અધ્યક્ષ જે પી નડ્ડા, ગુજરાત સીએમ ભૂપેન્દ્ર પટેલ અને સીઆર પાટીલ સહિત અનેક કેન્દ્રીય મંત્રીઓ વચ્ચે ભાજપના ઉમેદવારોના નામને લઈને ચાલેલી મેરેથોન બેઠક 4 કલાક પછી પૂર્ણ થઈ છે. જેમાં ટિકિટ આપવા મુદ્દે વિસ્તૃત ચર્ચા-વિચારણા કરવામાં આવ્યા બાદ નામો પણ લગભગ નક્કી થઈ ગયા હોય તેવી પણ ચર્ચા છે.

પૂર્વ મંત્રીઓની ચૂંટણી નહીં લડવાની જાહેરાત
ગુજરાત વિધાનસભાની ચૂંટણી માટે ભાજપના ઉમેદવારનો જાહેરાત કરવામાં આવી તે પહેલા ભૂતપૂર્વ મુખ્યમંત્રી વિજય રૂપાણી, નાયબ મુખ્યમંત્રી નીતિન પટેલ, ભૂતપૂર્વ ગૃહમંત્રી પ્રદીપસિંહ જાડેજા, આરસી ફળદુ, ભૂતપૂર્વ શિક્ષણમંત્રી ભૂપેન્દ્ર સિંહ ચુડાસમાએ ચૂંટણી નહીં લડવાની જાહેરાત કરી હતી. રાજકોટ પશ્ચિમના ધારાસભ્ય વિજય રૂપાણીએ મીડિયાને આપેલા એક નિવેદનમાં જણાવ્યું હતું કે, તેઓ આ વખતે ચૂંટણી નથી લડવાના. તો બીજી તરફ ગત વિધાનસભા ચૂંટણીમાં મહેસાણા બેઠક પરથી વિજયી થયેલી નીતિન પટેલે પણ પત્ર લખીને ચૂંટણી નહીં લડવાની જાહેરાત કરી છે.

ગુજરાતમાં બે તબક્કામાં ચૂંટણી
ગુજરાતમાં વિધાનસભાની ચૂંટણી માટે બે તબક્કામાં મતદાન થવાનું છે. પ્રથમ તબક્કા માટે 1 ડિસેમ્બરે અને બીજા તબક્કા માટે 5 ડિસેમ્બરે મતદાન થશે. 8મી ડિસેમ્બરે મતગણતરી હાથ ધરાશે.

AAPના આગમન સાથે ભાજપ અને કોંગ્રેસ સામે નવો પડકારગુજરાતમાં 2017ની વિધાનસભા ચૂંટણીમાં ભાજપે 99 બેઠકો અને તેની મુખ્ય હરીફ કોંગ્રેસે 77 બેઠકો જીતી હતી. આ પછી, કોંગ્રેસના ઘણા ધારાસભ્યો બદલાતા વિધાનસભામાં ભાજપના સભ્યોની સંખ્યા વધીને 111 થઈ ગઈ છે અને ભાજપ તમામ વર્તમાન ધારાસભ્યોને ફરીથી ટિકિટ આપે તેવી શક્યતા ઓછી છે. આ સાથે જ ગુજરાત વિધાનસભાની ચૂંટણીમાં આમ આદમી પાર્ટી (AAP)ના આગમનને કારણે ભાજપ અને કોંગ્રેસ સામે નવો પડકાર ઉભો થયો છે.