Gujarat Election: સાવલીમાં ભાજપ-કોંગ્રેસના કાર્યકરો વચ્ચે મારમારી, પોલીસે કર્યો લાઠીચાર્જ

અમદાવાદ: ગુજરાત વિધાનસભાની ચૂંટણીના બીજા અને અંતિમ તબક્કાનો પ્રચાર શનિવારે સાંજે 5 વાગ્યે સમાપ્ત થઈ ગયો. જો કે પ્રચારના છેલ્લા દિવસે વડોદરાના સાવલી તાલુકામાં ભાજપ અને કોંગ્રેસની રેલીઓ સામસામે આવી. દરમિયાન સામાન્ય બોલાચાલી બાદ મામલ બિચક્યો અને બંને પક્ષો વચ્ચે મારમારીના દ્રશ્યો સર્જાયા હતા. અહેવાલો અનુસાર સ્થિતિ ઉગ્ર બનતા પોલીસે લાઠીચાર્જ કરીને મામલે શાંત પાડ્યો હતો.

પ્રાપ્ત અહેવાલો અનુસાર સાવલીના શેરપુરા ગામે ભાજપ અને કોંગ્રેસના કાર્યકરો વચ્ચે ઘર્ષણ થયું. બન્ને પાર્ટીના નેતાઓની રેલી આમને સામને આવતા છુટા હાથની મારામારી થઈ હતી. કોંગ્રેસ પક્ષના આશરે સાતથી આઠ જેટલા બાઈકોને નુકસાન પહોંચાડવામાં આવ્યું છે. સામસામે ઝંડો અડતા આ બબાલ થઈ હતી. વાતાવરણ વધુ તંગ ન બને તે માટે SRPની ટીમ અને સાવલી પોલીસ ઘટનાસ્થળે પહોંચી હતી અને સ્થિતિ પર કાબૂ મેળવ્યો હતો.

બીજા તબક્કાનો ચૂંટણી પ્રચાર પૂર્ણ
ગુજરાત વિધાનસભાની ચૂંટણીના બીજા તબક્કાનો પ્રચાર શનિવારે સાંજે 5 વાગ્યે સમાપ્ત થયો. ચૂંટણી પ્રચારના છેલ્લા દિવસે ઉમેદવારો અને રાજકીય પક્ષોએ મતદારોને રીઝવવા તમામ પ્રયાસો કર્યા. હવે 5 ડિસેમ્બરે બીજા તબક્કામાં રાજ્યની કુલ 182 બેઠકોમાંથી 93 બેઠકો પર મતદાન થશે. ઉલ્લેખનીય છે કે, સૌરાષ્ટ્ર, કચ્છ અને દક્ષિણ ગુજરાતની 89 બેઠકો માટે પ્રથમ તબક્કાનું મતદાન 1 ડિસેમ્બરે યોજાયું હતું. જેમાં સરેરાશ 63.31 ટકા મતદાન થયું હતું. હવે બીજા તબક્કામાં મુખ્યમંત્રી ભૂપેન્દ્ર પટેલ, પાટીદાર નેતા હાર્દિક પટેલ મેદાનમાં છે. જ્યારે અલ્પેશ ઠાકોર પણ ભાજપના ઉમેદવાર તરીકે ચૂંટણી લડી રહ્યા છે.

છેલ્લા દિવસે ભાજપે બધી તાકાત લગાવીપ્રચારના છેલ્લા દિવસે ભાજપના 50 જેટલા મોટા નેતાઓએ રોડ શો અને રેલીઓ કરી હતી. જેમાં યુપીના સીએમ યોગી આદિત્યનાથ, કેન્દ્રીય મંત્રી સ્મૃતિ ઈરાની, પુરુષોત્તમ રૂપાલા અને અન્ય સામેલ હતા. ભાજપના તમામ નેતાઓએ અમદાવાદ, બનાસકાંઠા, આણંદ વગેરે વિસ્તારોમાં પ્રચારનો સૂર આગળ ધપાવ્યો હતો. ભાજપના નેતાઓ મોદીના કાર્યક્રમોમાં ઉમટેલી વિશાળ ભીડને તેમની આગામી જીતનો પુરાવો કહી રહ્યા છે.