ભારે કરી!! અલ્પેશ ઠાકોરનું આવું પોસ્ટર ગાંધીનગરમાં કોણે લગાડી દીધું?

ગાંધીનગર: ગુજરાત વિધાનસભા ચૂંટણીને લઈને આમ આદમી પાર્ટી અને કોંગ્રેસ દ્વારા ઉમેદવારોના નામ જાહેર કરવામાં આવ્યા છે. તો બીજી તરફ દિલ્હી ખાતે ભાજપની ચૂંટણી સમિતિની બેઠકમાં પાર્ટીના ઈલેક્શન કેન્ડિડેટ્સને લઈને ચર્ચા થઈ. આ બધા વચ્ચે ગાંધીનગરમાં બીજેપી નેતા અલ્પેશ ઠાકોર વિરુદ્ધ પોસ્ટર લાગતા રાજકારણ ગરમાયું છે. 'ભાવિ મુખ્યમંત્રી' અલ્પેશ ઠાકોરની ગાંધીનગર દક્ષિણમાં જરૂર ન હોવાના પોસ્ટર લાગતા લોકોમાં ભારે કુતુહલ સર્જાયું છે. મહત્વનું છે કે, ગાંધીનગર દક્ષિણ બેઠક ઉપર સંભવિત દાવેદાર તરીકે અલ્પેશ ઠાકોરનું નામ ચર્ચાઈ રહ્યું છે.

પોસ્ટરમાં શું લખેલું છે?
ગાંધીનગરમાં અલ્પેશ ઠાકોરના વિરુદ્ધમાં પોસ્ટર લગાડવામાં આવ્યાનું જાણવા મળ્યું છે. જેમાં અલ્પેશ ઠાકોરના ફોટાની નીચે 'ભાવિ મુખ્યમંત્રી શ્રી અલ્પેશજી ઠાકોર (આયાતી ઉમેદવાર)' લખેલું છે. અને તેની નીચે 'અમારી 35 ગાંધીનગર દક્ષિણ વિધાનસભામાં તમારી કોઈ જરૂર નથી. તમારા માટે રાધનપુર બરાબર છે. આવશો તો લીલા તોરણે ઘરે જવાની તૈયારી રાખજો.' ઉલ્લેખનીય છે કે, આ તસવીર સોશિયલ મીડિયા પર જોરદાર વાયરલ થઈ છે.

ઠાકોર સમાજના વ્યક્તિને CM બનાવાની માંગ
ડિસેમ્બરમાં ગુજરાત વિધાનસભાની ચૂંટણી થવાની છે. તેને લઈને હાલ રાજ્યમાં ચૂંટણીનો દોર ચાલી રહ્યો છે. દરેક રાજકીય પાર્ટીઓ પ્રચારમાં લાગી ગઈ છે. આ દરમિયાન ઘણા રાજકીય નેતાઓના નિવેદનો પણ સામે આવી રહ્યા છે. દરમિયાન બનાસકાંઠામાં ભાજપ નેતા અલ્પેશ ઠાકોરે જણાવ્યું છે કે, આ વખતે ગુજરાતનાં મુખ્યમંત્રી પદ પર ઠાકોર સમાજનો વ્યક્તિ હોવો જોઈએ.

દિલ્હીમાં ભાજપની ચૂંટણી સમિતિની બેઠક પૂર્ણભાજપમાં પીએમ મોદી, ગૃહમંત્રી અમિત શાહ, ભાજપ રાષ્ટ્રીય અધ્યક્ષ જે પી નડ્ડા, ગુજરાત સીએમ ભૂપેન્દ્ર પટેલ અને સીઆર પાટીલ સહિત અનેક કેન્દ્રીય મંત્રીઓ વચ્ચે ભાજપના ઉમેદવારોના નામને લઈને ચાલેલી મેરેથોન બેઠક 4 કલાક પછી પૂર્ણ થઈ છે. જેમાં ટિકિટ આપવા મુદ્દે વિસ્તૃત ચર્ચા-વિચારણા કરવામાં આવ્યા બાદ નામો પણ લગભગ નક્કી થઈ ગયા હોય તેવી પણ ચર્ચા છે. ઉપરાંત આ વખતે ઉમેદવારોમાં મોટાભાગના ચહેરાઓ તમને નવા જોવા મળે તો નવાઈ નથી.