Exit Polls: ગુજરાતમાં ભાજપ રેકોર્ડ 7મી વખત બનાવશે સરકાર, AAPનું ખાતું ખૂલશે
Gujarat Elections 2022: ગુજરાતમાં બીજા તબક્કાનું મતદાન શાંતિપૂર્ણ રીતે પુરું થયું છે. બીજા તબક્કામાં સાંજે પાંચ વાગ્યા સુધીમાં લગભગ 61 ટકા જેટલું મતદાન થયાનો અંદાજ છે. મતદાન પુરું થયા બાદ સાંજે 6.30 કલાકથી એક્ઝિટ પોલ્સના આંકડાના પણ આવવાના શરૂ થઈ ગયા હતા. લગભગ દરેક એક્ઝિટ પોલ્સમાં ગુજરાતમાં ભાજપની સરકાર બનવાનો અંદાજ વ્યક્ત કરાયો છે.
હાઈલાઈટ્સ:
- લગભગ દરેક એક્ઝિટ પોલમાં ભાજપને 120થી વધુ બેઠકો મળવાનો અંદાજ વ્યક્ત કરાયો.
- દરેક એક્ઝિટ પોલમાં કોંગ્રેસની બેઠકો ઘટતી હોવાનું અનુમાન લગાવાયું છે.
- દરેક એક્ઝિટ પોલમાં આમ આદમી પાર્ટીનું ગુજરાતમાં ખાતું ખુલવાની શક્યતા વ્યક્ત કરાઈ છે.
ગુજરાતમાં વિધાનસભાની ચૂંટણી માટેના બંને તબક્કાનું મતદાન પૂર્ણ થઈ ગયું છે. આજે બીજા તબક્કાનું મતદાન પુરું થયું તે સાથે જ એક્ઝિટ પોલ્સના આંકડા પણ આવવાના શરૂ થઈ ગયા હતા. લગભગ દરેક એક્ઝિટ પોલ્સમાં ગુજરાતમાં ફરીથી ભાજપની સરકાર બનવાનો અંદાજ વ્યક્ત કરાયો છે. તો, સાથે જ આમ આદમી પાર્ટી પણ આશ્ચર્ય સર્જશે તેવું અનુમાન કેટલાક એક્ઝિટ પોલ્સમાં લગાવાયો છે. જોકે, લગભગ દરેક એક્ઝિટ પોલ્સમાં કોંગ્રેસની બેઠકો ઘટતી દર્શાવાઈ છે.
ટાઈમ્સ નાઉ-ઈટીસીનો એક્ઝિટ પોલ શું કહે છે?
ટાઈમ્સ નાઉ-ઈટીસીના એક્ઝિટ પોલમાં ભાજપને 131, કોંગ્રેસને 41, આપને 6 અને અન્યોને 4 બેઠકો મળવાનો અંદાજ વ્યક્ત કરાયો છે.
ટીવી નાઈનના વર્તારા મુજબ ભાજપને 125થી 130 બેઠક મળશે
ટીવી નાઈનના એક્ઝિટ પોલમાં ભાજપને 125-130, કોંગ્રેસને 40-50 જ્યારે આમ આદમી પાર્ટીને 03-05 બેઠકો મળશે તેવો વરતારો કરાયો છે, જ્યારે અન્યોને 03-07 બેઠક મળશે તેવું અનુમાન વ્યક્ત કરાયું છે.
જન કી બાતના એક્ઝિટ પોલમાં ભાજપને 117થી 140 બેઠકો મળવાનું અનુમાન
જન કી બાત દ્વારા જે એક્ઝિટ પોલ કરાયો છે તેમાં ભાજપને 117-140, કોંગ્રેસને 34થી 51 જ્યારે આમ આદમી પાર્ટીને 6થી 13 બેઠકો મળશે તેવું અનુમાન વ્યક્ત કરાયું છે. ઉત્તર ગુજરાતની 32 બેઠકોમાંથી ભાજપને 18.22, કોંગ્રેસને 8-12, આપને શૂન્ય જ્યારે અન્યને 1-3 બેઠક મળી શકે છે તેમ ટીવી નાઈનનો એક્ઝિટ પોલ જણાવે છે. તેમાં એવો પણ દાવો કરાયો છે કે સૌરાષ્ટ્ર અને દક્ષિણ ગુજરાતમાં પણ આમ આદમી પાર્ટીના ગાજ્યા મેઘ વરસવાની શક્યતા ઘણી ઓછી છે.
P-MARQના એક્ઝિટ પોલમાં આપને 2થી 10 બેઠકો મળવાનો અંદાજ
પોલિટિકલ માર્કર નામની એક એજન્સી અને રિપબ્લિક ભારતના એક્ઝિટ પોલમાં ગુજરાતમાં ભાજપને 128-148 બેઠક, કોંગ્રેસને 30-32 બેઠક જ્યારે આમ આદમી પાર્ટીને 2થી 10 બેઠક અને અન્યોને 0-3 બેઠક મળશે તેવો અંદાજ વ્યક્ત કરાયો છે.
ન્યૂઝ એક્સના એક્ઝિટ પોલમાં પણ ભાજપની સરકાર બનવાનો અંદાજ
ન્યૂઝ એક્સના એક્ઝિટ પોલમાં પણ ભાજપની સરકાર બનશે તેમ જણાવાયું છે. જેમાં ભાજપને 117થી 140, કોંગ્રેસને 34થી 51, આમ આદમી પાર્ટીને 06થી 13 બેઠકો જ્યારે અપક્ષોને શૂન્ય બેઠક મળશે તેવી શક્યતા વ્યક્ત કરાઈ છે.
સી-વોટર્સના એક્ઝિટ પોલ્સમાં આમ આદમી પાર્ટી માટે સામે આવી ચોંકાવનારી વાત
બીજી તરફ, સી વોટર્સના એક્ઝિટ પોલ પર નજર કરીએ તો, દક્ષિણ ગુજરાતની 35 બેઠકો પર આમ આદમી પાર્ટી મોટો ધડાકો કરે તેવી શક્યતા છે. અહીં આપને 27 ટકા વોટ મળવાનું અનુમાન વ્યક્ત કરાયું છે, જોકે 48 ટકા વોટ સાથે ભાજપ ટોપ પર રહી શકે છે, જ્યારે 23 ટકા વોટ શેર સાથે કોંગ્રેસ ત્રીજા ક્રમે સરકતી દેખાઈ રહી છે. એબીપી-સીવોટરના સર્વે મુજબ, ઉત્તર ગુજરાતની 32 બેઠકોમાંથી ભાજપને 21થી 25 બેઠકો, કોંગ્રેસને 6થી 10 બેઠકો, આપને 0થી 1 બેઠક, અન્યને 0થી 2 બેઠક મળતી દેખાઈ રહી છે.ઉત્તર ગુજરાતમાં ભાજપને 48 ટકા વોટ, કોંગ્રેસને 40 ટકા વોટ અને આપને 8 ટકા વોટ મળતા દેખાઈ રહ્યા છે.