જે લોકો ઉછળી-ઉછળીને બધું બોલતા હતા, તે ગઈકાલ સાંજથી ચૂપ છે: પીએમ મોદી

ગુજરાતમાં પ્રથમ તબક્કાનું મતદાન પૂરું થઈ ગયા બાદ હવે બીજા તબક્કાના મતદાન પૂર્વે ચૂંટણી પ્રચાર ચાલી રહ્યો છે. વડાપ્રધાન નરેન્દ્ર મોદીએ ગઈકાલે નરોડાથી ચાંદખેડા સુધીનો આશરે 50 કિમીથી વધારે લાંબો રોડ શો યોજ્યો હતો તો આજે સતત બીજા દિવસે તેમણે ઉત્તર ગુજરાતમાં પાટણ, સોજીત્રા તથા કાંકરેજમાં જાહેર સભાને સંબોધી હતી. ત્યારબાદ અમદાવાદમાં જૂના અમદાવાદમાં એટલે કે કોટ વિસ્તારમાં પણ ચૂંટણી પ્રચાર કર્યાં બાદ સરસપુર ખાતે એક જંગી સભાને સંબોધિત કરી હતી. આ ઉપરાંત નગરદેવી ભદ્રકાળી મંદિર ખાતે પૂજા કરી હતી.

વડાપ્રધાન નરેન્દ્ર મોદીએ અમદાવાદમાં સરસપુર ખાતે આ ચૂંટણીની છેલ્લી સભા સંબોધિત કરી હતી અને સૌનો આભાર વ્યક્ત કર્યો હતો. વડાપ્રધાન નરેન્દ્ર મોદીએ કોંગ્રેસ પર આકરા પ્રહાર કરતા જણાવ્યું હતું કે પ્રથમ તબક્કાનું મતદાન પૂરુ થયું છે ત્યારે જેઓ ઉછળીને બોલી રહ્યા હતા તેઓ ગઈકાલ સાંજથી જ ચૂપ થઈ ગયા છે. તેમને એ વાતનો અહેસાસ થઈ ચુક્યો છે કે હવે તેમનો ગુજરાતમાં મેળ પડવાનો નથી.

પ્રથમ તબક્કાથી જ નક્કી થઈ ચુક્યું છે કે ભાજપને જોરદાર વિજય મળવાનો છે. કોંગ્રેસના નિવેદનોમાંથી આ વાત જાણવા મળે છે. કારણ કે તેમણે EVMને અપશબ્દો કહેવાનું શરૂ કરી દીધુ છે.

આ સાથે PM મોદીએ એમ પણ કહ્યું કે સ્વતંત્રતાના 100 વર્ષ પૂરા થાય, 25 વર્ષનો અમૃતકાલ સામે આવે, તે સમયે એટલે કે 25 વર્ષ બાદ ગુજરાત કેવું હોય, સમૃદ્ધ, દિવ્ય, વિકસિત હોય. આ 25 વર્ષના વિકાસનો પાયો નાંખવામાં આ વખતનું મતદાન ખૂબ જ મહત્વ ધરાવે છે. જેઓ પ્રથમ વખત મતદાન કરી રહ્યા છે તેમનું અપીલ કરું છું કે 25 વર્ષ ખૂબ જ સારા જાય તે માટે તમે ભાજપને મત આપો. હું તમારા ઉજવળ ભવિષ્યની ખાતરી આપું છું.

વડાપ્રધાન નરેન્દ્ર મોદીએ G20 અંગે કહ્યું કે તેનો અર્થ એવો થાય છે કે ભારત G20દેશોનું નેતૃત્વ સંભાળી રહ્યું છે એટલે કે વિશ્વના 75 ટકા અર્થવ્યવસ્થા ધરાવતા દેશોનું નેતૃત્વ કરશે.