સુરત એટલે મિની હિન્દુસ્તાન, આ શહેરમાં ટેલેન્ટની ભરપૂર કદર થાય છે: પીએમ મોદી

સુરત: ગુજરાતના બે દિવસના પ્રવાસની સુરતથી શરુઆત કરનારા પીએમ મોદીએ આજે અહીં એક જનસભા સંબોધતા જણાવ્યું હતું કે, સુરત શહેર લોકોની એકતા અને જનભાગીદારીનું શાનદાર ઉદાહરણ છે. ભારતનો કોઈ પ્રદેશ એવો નહીં હોય કે જેના લોકો સુરતની ધરતી પર ના રહેતા હોય. એક પ્રકારે મિની હિન્દુસ્તાન છે સુરત શહેર, જેની સૌથી મોટી ખાસીયત છે તે શ્રમનું સમ્માન કરનારું શહેર છે. અહીં ટેલેન્ટની કદર થાય છે, પ્રગતિની આકાંક્ષા પૂરી થાય છે તેમજ આગળ વધવાના સપનાં સાકાર થાય છે. વિકાસની દોડમાં જે પાછળ રહી જાય તેને પણ આ શહેર વધુ મોકો આપે છે. સુરતની આ જ સ્પિરિટ આઝાદીના અમૃત કાળમાં વિકસિત ભારતના નિર્માણ માટે ખૂબ મોટી પ્રેરણા છે. સુરતના જમણને યાદ કરતાં પીએમે કહ્યું હતું કે નવરાત્રીમાં ઉપવાસ ચાલતા હોય ત્યારે અહીં આવવું થોડું મુશ્કેલ છે.

પીએમે જણાવ્યું હતું કે, જ્યારે પબ્લિક પ્રાઈવેટ પાર્ટનરશીપની વાતો થતી હતી ત્યારે સુરતમાં પીપલ્સ, પબ્લિક, પ્રાઈવેટ પાર્ટનરશીપનું મોડેલ ધરાવતું હતું અને તે જ સુરતને વિશેષ બનાવે છે. એક સમયે સુરતમાં મહામારી અને પૂરના સંકટમાં અપપ્રચારને હવા આપવામાં આવતી હતી. પરંતુ આજે સુરતના લોકોએ શહેરને એક બ્રાન્ડ બનાવીને બતાવી દીધું છે. આજે દુનિયાના સૌથી ઝડપથી વિકસતા શહેરમાં સુરતનું નામ સામેલ છે, અને તેનો લાભ અહીંના દરેક વેપાર અને કારોબારને થઈ રહ્યો છે. છેલ્લા 20 વર્ષમાં સુરતે દેશના બાકીના શહેરોની સરખામણીએ ખૂબ ઝડપથી પ્રગતિ કરી છે. આજે દેશના સૌથી સ્વચ્છ શહેરમાં સુરતનો ગર્વથી ઉલ્લેખ થાય છે.

ડબલ એન્જિનની સરકાર બન્યા બાદ સુરતના ગરીબ, મધ્યમ વર્ગને અનેક નવી સુવિધા મળી રહી છે. આયુષ્યમાન ભારત યોજના હેઠળ દેશમાં 4 કરોડથી વધુ દર્દીને લાભ મળ્યો છે, જેમાંથી 32 લાખ ગુજરાતના અને સવા લાખ દર્દી સુરતના છે. વળી, પીએમ સ્વનીધિ યોજના હેઠળ પણ 35 લાખ સ્ટ્રીટ વેન્ડરને બેંકો તરફથી વિના ગેરંટીએ સસ્તી લોન મળી છે, જેમાં સુરતના 40 હજાર લોકોનો સમાવેશ થાય છે. સુરતના પશ્ચિમ વિસ્તારમાં આજે જે ચહેલપહેલ દેખાય છે તે 20 વર્ષના પ્રયાસોનું પરિણામ છે. તાપીમાં આજે ડઝનબંધ પૂલ છે, જે શહેરને અને શહેરીજનોને સમૃદ્ધિથી જોડી રહ્યા છે, તેમ પીએમે જણાવ્યું હતું.

સુરત સાચા અર્થમાં સેતુઓનું શહેર છે, જે માનવીયતા, રાષ્ટ્રીયતા અને સમૃદ્ધિની ખાઈને ભૂલાવી લોકોને જોડવાનું કામ કરે છે. આજે જે પ્રોજેક્ટના શિલાન્યાસ કે ખાતમૂહુર્ત થયા છે તે તમામ સુરતની ઓળખને સશક્ત બનાવશે. ડ્રીમ સિટી પ્રોજેક્ટ પૂરો થશે ત્યારે સુરત વિશ્વનું સૌથી મોટું અને સુરક્ષિત ડાયમંડ ટ્રેડિંગ હબ બનશે. તે દિવસો દૂર નથી જ્યારે સુરત દુનિયાભરની ડાયમંડ કંપનીઓ અને કારોબારીઓના આકર્ષણનું કેન્દ્ર બનશે.

રોપેક્સ ફેરીનો ઉલ્લેખ કરતાં પીએમે કહ્યું હતું કે, વેપાર, કારોબારમાં લોજિસ્ટિકનું કેટલું મહત્વ છે તે સુરતવાસીઓ સારી રીતે જાણે છે. નવી રાષ્ટ્રીય લોજિસ્ટિક પોલિસીથી સુરતને મોટો લાભ મળશે. ગોગા-હજીરા રોપેક્સ ફેરીથી સૌરાષ્ટ્રના કૃષિ હબને સુરતના બિઝનેસ હબ સાથે જોડવામાં આવ્યું છે. તેનાથી લોકોનો સમય અને પૈસા બંને બચી રહ્યા છે. એક સમયે ઘોઘાથી હજીરા આવવા 10-12 કલાક લાગતા હતા તે હવે દરીયામાર્ગે 3-4 કલાકમાં પહોંચી જગ્યા છે. તે જ રીતે સુરતથી અનેક ટ્રકો ભરીને પૂર્વ ઉત્તર પ્રદેશમાં મોકલવામાં આવે છે. જેના માટે હવે રેલવે તેમજ પોસ્ટલ વિભાગે ખાસ વ્યવસ્થા કરી છે. સુરત અને કાશી વચ્ચે હવે સ્પેશિયલ ગુડ્સ ટ્રેન ચલાવવાની તૈયારી થઈ રહી છે, જેનો મોટો લાભ સુરતના વેપારીઓને થશે.