વિધાનસભા ચૂંટણી પહેલા કોંગ્રેસને ઝટકો, વિસાવદરના MLA હર્ષદ રિબડિયાનું રાજીનામું

ગાંધીનગર: ગુજરાત વિધાનસભાની ચૂંટણી પહેલા કોંગ્રેસને વધુ એક ઝટકો લાગ્યો છે. નેતાઓએ સતત પક્ષ છોડ્યા બાદ હવે વધુ એક મોટા પાટીદાર નેતાએ તેમનો હાથ છોડ્યો છે. વિસાવદરના ધારાસભ્ય હર્ષદ રિબડિયાએ મંગળવારે વિધાનસભા સ્પીકર નીમાબેન આચાર્યને પોતાનું રાજીનામું આપ્યું હતું. કહેવામાં આવી રહ્યું છે કે કોંગ્રેસ છોડ્યા બાદ તેઓ હવે ભારતીય જનતા પાર્ટીમાં જઈ શકે છે.

હાર્દિક પટેલ બાદ બીજા પાટીદાર નેતાએ કોંગ્રેસ છોડી
હર્ષદ જુનાગઢ જિલ્લાના વિસાવદરના ધારાસભ્ય પદ પર હતા. હર્ષદ પહેલા પાટીદાર આંદોલનમાંથી કોંગ્રેસમાં જોડાયેલા ધારાસભ્ય હાર્દિક પટેલે પણ કોંગ્રેસ છોડી દીધી હતી. હાર્દિક પટેલ બાદ હવે બીજા મોટા પાટીદાર નેતા હર્ષદે પણ કોંગ્રેસને ઝટકો આપ્યો છે.

ભાજપ પાસેથી છીનવી હતી બેઠક
વિસાવદર બેઠક અગાઉ ભાજપના ખાતામાં હતી. ભાજપના નેતા કેશુભાઈ પટેલ અહીંથી જીતતા હતા. હર્ષદે કેશુભાઈને હરાવીને આ સીટ જીતી હતી અને આ સીટ કોંગ્રેસના ફાળે ગઈ હતી. હવે ભાજપ પાસેથી આ સીટ છીનવી લેનાર હર્ષદ કોંગ્રેસ છોડીને ભાજપમાં જશે તો આ સીટ ફરી ભાજપ પાસે આવી શકે છે. આ ઉપરાંત ભાજપને પાટીદાર મતોનો ફાયદો પણ મળી શકે છે.

ભાજપ પર 40 કરોડની ઓફર કરવાનો આરોપ હતો
હર્ષદ રિબડિયા એ જ ધારાસભ્ય છે જેમણે જૂનમાં ભાજપ પર નિશાન સાધ્યું હતું. તેમણે આરોપ લગાવ્યો હતો કે અહેમદ પટેલની રાજ્યસભાની ચૂંટણી દરમિયાન ભાજપે તેમને ક્રોસ વોટિંગ માટે 40 કરોડ રૂપિયાની ઓફર કરી હતી પરંતુ તેમણે આ ઓફર ઠુકરાવી દીધી હતી.

ભાજપમાં જવાની વાતને ગણાવી હતી અફવાજો કે આ વર્ષની શરૂઆતમાં પણ હર્ષદ બીજેપીમાં જોડાયા હોવાના સમાચાર આવ્યા હતા. જોકે પછી તેમણે તેને અફવા ગણાવી હતી. હર્ષદે કહ્યું હતું કે ભાજપ તેમના વિરુદ્ધ ગમે તેટલી અફવાઓ ફેલાવે, પરંતુ તે કોંગ્રેસમાં જ રહેશે, તે ભાજપમાં જોડાશે નહીં. જો કે કોંગ્રેસમાંથી રાજીનામું આપ્યા બાદ તેઓ ભાજપમાં જોડાશે તેવી ચર્ચાએ જોર પકડ્યું છે.