ગીર નેશનલ પાર્કમાં આમિર ખાને મનાવી એનિવર્સરી, પત્ની માટે ગાયું રોમાન્ટિક ગીત

બોલિવુડના 'મિસ્ટર પરફેક્ટનિસ્ટ' આમિર ખાન અને તેની પત્ની કિરણ રાવે પોતાની 15મી વેડિંગ એનિવર્સરી ગુજરાતના ગીર નેશનલ પાર્કમાં સેલિબ્રેટ કરી હતી. આ સેલિબ્રેશનમાં માત્ર બંનેના નજીકના લોકો જોડાયા હતા. વેડિંગ એનિવર્સરી સેલિબ્રેશનની તસવીરો અને વીડિયો આમિર ખાનના ફેન પેજે સોશિયલ મીડિયા પર શેર કરી છે. સેલિબ્રેશનની જે તસવીરો સામે આવી છે તેમાં આમિર ખાન અને કિરણ રાવની સાથે તેમનો દીકરો આઝાદ પણ જોવા મળી રહ્યો છે. કપલના આ ખાસ દિવસને વધારે ખાસ બનાવવા માટે થ્રી-ટાયર કેક લાવવામાં આવી હતી. કેકની ઉપર અંગ્રેજીમાં AK લખેલું જોઈ શકાય છે.


ગીરમાં હાલ કડકડતી ઠંડી પડી રહી છે તેથી આમિર, કિરણ અને આઝાદ સહિતના મહેમાનો ગરમ કપડામાં જોવા મળ્યા હતા. આમિરે બ્લેક જેકેટ અને મેચિંગ ટોપી પહેરી હતી. જ્યારે કિરણે ઓલિવ ગ્રીન જેકેટ અને ગળામાં સ્કાર્ફ વીંટાળ્યો હતો. સેલિબ્રેશન દરમિયાન સૌથી વધારે ઉત્સાહિત નવ વર્ષનો આઝાદ દેખાતો હતો.


કેક કટ કર્યા બાદ આમિર ખાને પત્ની માટે શશિ કપૂરની ફિલ્મ 'પ્યાર કા મૌસમ'નું સોન્ગ 'તુમ બિન જાઉ કહા' ગાયું હતું. તેણે આ સોન્ગ ઓર્કેસ્ટ્રાની સાથે ગાયું હતું. વીડિયોમાં તેની આસપાસ સિતાર વાદક અને તબલા વગાડનાર પણ જોવા મળી રહ્યા છે. આમિરે આ સિવાય 'ઓહરે તાલ મિલે નદી કે જલ મેં' સોન્ગ પણ ગાયું હતું. જે 'અનોખી રાત' ફિલ્મનું છે. ઉલ્લેખનીય છે કે, કિરણ રાવ સાથેના આમિર ખાનના આ બીજા લગ્ન છે. તેની પહેલી પત્નીનું નામ રીના દત્તા છે.


આમિર ખાન અને કિરણ રાવના લગ્ન 28મી ડિસેમ્બર, 2005ના રોજ થયા હતા. અગાઉ એક ઈન્ટરવ્યૂમાં કિરણ રાવ વિશે વાતચીત કરતાં આમિર ખાને કહ્યું હતું કે, 'હું લગાન (2001) કરી રહ્યો હતો ત્યારે મારી મુલાકાત કિરણ સાથે થઈ હતી. તે ફિલ્મની આસિસ્ટન્ટ ડિરેક્ટર હતી, પરંતુ તે સમયે અમે રિલેશનશિપમાં નહોતો. અમે સારા મિત્રો પણ નહોતા. રીનાથી અલગ અને ડિવોર્સ લીધા બાદ હું ફરીથી તેને મળ્યો હતો. હું ટ્રોમામાં હતો તે સમયે તેનો ફોન આવ્યો હતો અને અમે અડધી કલાક વાતચીત કરી હતી. તેની સાથે વાતચીત કર્યા બાદ મને લાગ્યું કે, 'હે ભગવાન! જ્યારે તેની સાથે વાત કરું છું ત્યારે મને ખુશી થાય છે'. આ બાબતથી હું પ્રભાવિત થયો હતો'.


વર્કફ્રંટની વાત કરીએ તો, તે પોતાની અપકમિંગ ફિલ્મ 'લાલ સિંહ ચઢ્ઢા'ની રિલીઝ થવાની રાહ જોઈ રહ્યો છે. આ ફિલ્મ પહેલા ક્રિસમસ પર રિલીઝ થવાની હતી. પરંતુ મહામારીના કારણે શૂટિંગ પૂરું ન થઈ શકતાં રિલીઝ ડેટ ટાળી દેવાઈ હતી. આ ફિલ્મ હવે આવતા વર્ષે રિલીઝ થશે. 'લાલ સિંહ ચઢ્ઢા' હોલિવુડની ફિલ્મ 'ફોરેસ્ટ ગમ્પ'ની હિંદી રિમેક છે. આ ફિલ્મમાં આમિરની ઓપોઝિટમાં કરીના કપૂર છે.