થિયેટર ખુલ્યા બાદ પણ 'બેરોજગાર' જ રહીશ તેવું કહેનારને અભિષેકે આપ્યો જવાબ

અભિષેક બચ્ચન બોલિવુડના એવા સેલેબ્સમાંથી એક છે, જે કોઈને કોઈ કારણથી ટ્રોલ થતો રહે છે. ગઈકાલે સરકારે અનલોક 5.0ની ગાઈડલાઈન જાહેર કરી હતી. જે અંતર્ગત 50 ટકાની ક્ષમતા સાથે થિયેટર, સિનેમા હોલ અને મલ્ટિપ્લેક્સ ખોલવાની મંજૂરી આપવામાં આવી છે. આ વાતને લઈને અભિષેક બચ્ચને ટ્વીટ કરીને ખુશી વ્યક્ત કરી હતી અને આ અઠવાડિયાના બેસ્ટ ન્યૂઝ ગણાવ્યા હતા.

અભિષેક બચ્ચને એક ન્યૂઝ ચેનલની ટ્વીટ શેર કરી છે, જેમાં લખ્યું છે કે, અનલોક 5ની ગાઈડલાઈન બહાર આવી ગઈ છે. 50 ટકાની ક્ષમતા સાથે સિનેમા હોલને ખોલવાની મંજૂરી આપવામાં આવી છે. એક્ટરે કેપ્શનમાં લખ્યું હતું કે, આ અઠવાડિયાના બેસ્ટ ન્યૂઝ.


અભિષેકના આ ટ્વીટ પર ટ્રોલ કરતાં એક યૂઝરે લખ્યું કે, 'તેમ છતાં પણ તું બેરોજગાર નહીં રહે?'. જેનો એક્ટરે સરસ જવાબ આપ્યો છે. તેણે લખ્યું છે કે, 'આ બધુ તમારા (દર્શકોના) હાથમાં છે. જો તમને અમારું કામ નહીં ગમે તો અમને બીજું કામ નહીં મળે. તેથી અમે અમારી ક્ષમતા પ્રમાણે કામ કરવાનો પ્રયાસ કરીશું અને સારું થાય તેવી આશા રાખીએ છીએ અને પ્રાર્થના કરીએ છીએ'.


તો અન્ય એકે અભિષેકના ટ્વીટમાં કોમેન્ટ કરતાં લખ્યું છે કે, 'તને માત્ર પૈસાની ચિંતા છે. તારા માટે એ મહત્વ નથી ધરાવતું કે કેટલા લોકો મરી જશે'. જેને જવાબ આપતાં એક્ટરે લખ્યું છે કે, 'હા, પૈસા જરૂરી છે તમામ માટે. પરંતુ હું મારા તે લાખો ભાઈ-બહેન વિશે પણ વિચારી રહ્યો છું જે અમારી ઈન્ડસ્ટ્રીમાં કામ કરે છે અને પૈસા કમાય છે. સિનેમાને ટર્નસ્ટાઈલની સાથે ફરીથી શરુ કરવામાં આવી રહ્યું છે'.



એક યૂઝરે અભિષેક બચ્ચનને કોરોનાથી સંક્રમિત થયો હતો તે વાત યાદ અપાવતા કહ્યું કે, 'તું એ જ વ્યક્તિ છે ને કે જેણે કોરોના પોઝિટિવ થયા બાદ લોકોને ઘરમાં રહેવાની સલાહ આપી હતી?'. જેના જવાબમાં એક્ટરે લખ્યું છે કે, 'હા, સાત અઠવાડિયા પહેલા પોઝિટિવ થયો હતો. તે સમયમાં ઘણુ બદલાઈ ગયું છે. આપણે બધાએ સાવધાની રાખવાની જરૂર છે. સરકારે છ મહિના પહેલા જ સુરક્ષાના માપદંડોને ધ્યાનમાં રાખીને થિયેટર ખોલવાનો નિર્ણય લીધો હતો'.