ગોવિંદાએ 57મા બર્થ ડે પર કરી ધમાકેદાર પાર્ટી, 90ના દશકાના ગીતો પર કર્યો ડાન્સ

બોલિવુડના હીરો નંબર 1 ગોવિંદાનો આજે (21 ડિસેમ્બર) જન્મદિવસ છે. ગોવિંદાના 57મા બર્થ ડે પર સરપ્રાઈઝ પાર્ટીનું આયોજન કરવામાં આવ્યું હતું. મધ્ય રાત્રિએ યોજાયેલી પાર્ટીમાં ગોવિંદાની પત્ની સુનિતાએ એક્ટરના નજીકના મિત્રોને આમંત્રિત કર્યા હતા. બર્થ ડે પાર્ટીમાં 90ના દશકાના ગીતો પર ડાન્સ કરીને એક્ટરે ખૂબ ધમાલ-મસ્તી કરી હતી. સ્પેશિયલ પાર્ટી માટે ગોવિંદાના ઘરને ફુગ્ગાથી સજાવાયું હતું. જ્યારે બ્લેક આઉટફિટમાં ગોવિંદા હેન્ડસમ લાગતો હતો.



બર્થ ડે સેલિબ્રેશન વિશે વાત કરતાં ગોવિંદાએ અમારા સહયોગી ઈટાઈમ્સને જણાવ્યું, "મારી પત્નીએ મારા માટે સરપ્રાઈઝ બર્થ ડે પાર્ટીનું આયોજન કર્યું હતું. જેમાં મારા તમામ મિત્રોને આમંત્રિત કરવામાં આવ્યા હતા. રાજપાલ યાદવ, રવિ કિશન, અરમાન કોહલી, ગણેશ આચાર્ય, શક્તિ કપૂર વગેરે પાર્ટીમાં હાજર રહ્યા હતા. મેં ગણેશ આચાર્ય સાથે મારા 90ના દાયકાના ગીત 'ગોરિયા ચૂરા ના મેરા જીયા' પર ડાન્સ કર્યો હતો. આખી રાત અમે પાર્ટી કરી હતી, સવારે 6 વાગ્યે દૂધવાળો આવ્યો ત્યારે અમે અટક્યા હતા."


ગોવિંદાની બર્થ ડે પાર્ટી માટે ખાસ નિયોન રંગની લાઈટથી 'HBD ગોવિંદા' લખવામાં આવ્યું હતું, તેની ઝલક એક્ટરના દીકરા યશવર્ધને બતાવી હતી. તસવીરમાં યશવર્ધન બહેન ટીના સાથે પોઝ આપતો જોવા મળે છે.

2020નું વર્ષ પૂરું થવામાં છે ત્યારે ગોવિંદાએ નવું વર્ષ સારું નીવડે તેવી આશા વ્યક્ત કરી છે. ગોવિંદાએ કહ્યું, "હું ઈશ્વરને પ્રાર્થના કરીશ કે વિશ્વ આ મહામારીમાંથી મુક્ત થઈ જાય અને આપણે 2021માં સામાન્ય જીવન જીવી શકીએ."


ગોવિંદાના બર્થ ડે પર અનિલ કપૂર, કરિશ્મા કપૂર, માધુરી દીક્ષિત, ચંકી પાંડે, ડાન્સર ધર્મેશ, એશા દેઓલ, કપિલ શર્મા વગેરે જેવા સેલેબ્સે સોશિયલ મીડિયા પર શુભકામના આપી છે. માધુરીએ ગોવિંદા સાથેની તસવીરો શેર કરતાં લખ્યું, "તમારી ફિલ્મો, ડાન્સ, ડાયલોગ...તમારી હાજરી માત્ર પણ મારા સહિત સૌના ચહેરા પર સ્મિત લાવી દે છે. તમારા જન્મદિવસ પર અઢળક શુભેચ્છા."


અનિલ કપૂરે પણ ગોવિંદા સાથેની ડાન્સ કરતી તસવીરો શેર કરતાં લખ્યું, "અમારા હીરો નંબર 1ને હેપી બર્થ ડે. હંમેશા ખુશીઓ અને સારું સ્વાસ્થ્ય મળે તેવી કામના."


કરિશ્માએ ઈન્સ્ટાગ્રામ સ્ટોરીમાં ગોવિંદા સાથેની તસવીર શેર કરીને લખ્યું, "હેપી બર્થ ડે ચિ ચિ."