બ્રેન સ્ટ્રોક બાદ સ્થિર છે રાહુલ રોયની હાલત, ડાયરેક્ટરે જણાવ્યો એ દિવસનો ઘટનાક્રમ

એક્ટર રાહુલ રોય આગામી ફિલ્મ LAC (લાઈન ઓફ એકચ્યુઅલ કંટ્રોલ) માટે 15 નવેમ્બરથી કારગિલમાં શૂટિંગ કરતા હતા. ધ ચિત્રા વકીલ શર્મા અને નીતિન કુમાર ગુપ્તા પ્રોડક્શન્સે આજે ત્યાં કામ પૂરું કર્યું પરંતુ રવિવારે 'આશિકી' એક્ટર રાહુલ રોયને સ્ટ્રોક આવવાની ખબર ચર્ચામાં રહી હતી. હાલ રાહુલ રોય મુંબઈની હોસ્પિટલમાં સારવાર લઈ રહ્યા છે.

અમારા સહયોગી મુંબઈ મિરરે પ્રોડ્યુસર-ડાયરેક્ટર નીતિન કુમારનો સંપર્ક કર્યો ત્યારે તેમણે જણાવ્યું કે, ફિલ્મમાં આર્મી ઓફિસરની ભૂમિકામાં જોવા મળનારા રાહુલનું શૂટિંગ 23 નવેમ્બરના રોજ પૂરું થઈ ગયું હતું. પરંતુ કારગિલના મોસમનો આનંદ માણવા રાહુલ થોડા દિવસ ત્યાં રોકાયા હતા. શનિવારે રાહુલ રોય કોલકાતા જવા નીકળવાના હતા ગુરુવારે જ્યારે નીતિન રાહુલને મળવા તેમના હોટલ રૂમમાં પહોંચ્યા ત્યારે રાહુલનું નિરીક્ષણ કર્યું હતું. રાહુલ વ્યસ્થિત રીતે ચાલતા હતા અને બીજું કામ પણ બરાબર કરી શકતા હતા પરંતુ તેમને બોલવામાં તકલીફ પડી રહી હતી. તેઓ આખું વાક્ય વ્યવસ્થિત નહોતા બોલી શકતા.

નીતિને એ દિવસને યાદ કરતાં કહ્યું, "એક ડૉક્ટર હોવાના નાતે મને શંકા ગઈ કે રાહુલ અફેસિયા (Aphasia)માંથી પસાર થઈ રહ્યો છે. આ એવી સ્થિતિ છે જેમાં વ્યક્તિની સ્પીચ પર અસર થાય છે. જેથી હું તાત્કાલિક તેને સ્થાનિક હોસ્પિટલમાં CT સ્કેન માટે લઈ ગયો હતો. ત્યાંના ડૉક્ટરોએ ખાસ કંઈ ફોડ ના પાડ્યો પરંતુ મેં રાહુલના રિપોર્ટ મારા અન્ય ડૉક્ટર મિત્રોને મોકલ્યા. જેમાંથી એકે કહ્યું કે, રાહુલને મિનિ સ્ટ્રોક આવ્યો હોઈ શકે છે જે CT સ્કેનમાં પકડાતો નથી. તેમણે જ ભલામણ કરી કે રાહુલને વધુ સારવાર માટે મુંબઈ લઈ જવામાં આવે."

રસ્તા બ્લોક હોવાથી નીતિને જિલ્લા મેજિસ્ટ્રેટ અને સ્થાનિક સત્તાધીશોની મદદથી રાહુલને એરલિફ્ટ કરવા માટે હેલિકોપ્ટરની વ્યવસ્થા કરી હતી. રાહુલને પહેલા શ્રીનગર લઈ જવાયો અને ત્યાંથી મુંબઈ મોકલાયો હતો. નીતિને કહ્યું, "હાલ નાણાવટી હોસ્પિટલમાં રાહુલની સારવાર ચાલી રહી છે. મેં તેની બહેન અને ભાઈ સાથે વાત કરી છે. તેઓ તેની સાથે હોસ્પિટલમાં જ છે. હાલ રાહુલની હાલત સ્થિર છે. રાહુલ એવું પણ પૂછી રહ્યો હતો કે, LAC 2નું શૂટિંગ ક્યારથી શરૂ કરીશું."

રાહુલને સેરિબ્રોવેસ્ક્યુલર એક્સિડન્ટ (Cerebrovascular Accident) અથવા મિડલ સેરિબ્રલ આર્ટરી (MCA)માં લોહીનો ગઠ્ઠો થઈ ગયો. જેના કારણે મગજની ડાબી બાજુથી પસાર થતી MCAમાં ઈસ્કેમિયા (Ischemia) (એવી સ્થિતિ જેમાં ટિશ્યૂ સુધી લોહી પહોંચતું નથી અને ઓક્સિજનની ઘટ પડવા માંડે છે) થયું. પરિણામે તેઓ અફેસિયાનો શિકાર થયા.

નીતિનના કહેવા પ્રમાણે, રાહુલને ઓછામાં ઓછા 10 દિવસ સુધી ઓબ્ઝર્વેશનમાં રાખવામાં આવશે. જો કે, બે દિવસમાં તેને ચાલવાની છૂટ આપી દેવાશે. "હું રાહુલના મેડિકલ બિલ ભરી રહ્યો છું કારણે અમારી મિત્રતા જૂની છે. અમે સાથે ઘણી ફિલ્મો કરી છે. જુલાઈ-ઓગસ્ટમાં અમે 'ધ વૉક' ફિલ્મનું શૂટિંગ કર્યું હતું. મને ખબર છે રાહુલ એકદમ સાજો થઈ જશે પછી તરત જ રૂપિયા પાછા ચૂકવી દેવાની વાત કાઢશે." નીતિન 4 ડિસેમ્બરે મુંબઈ પરત આવશે અને આવ્યા બાદ તરત જ રાહુલની ખબર કાઢવા જશે.