લકવા બાદ સાજી થઈ રહી છે કોરોનાના દર્દીઓની સારવાર કરનારી એક્ટ્રેસ, કહ્યું-'પ્રાર્થના કરજો'

શાહરૂખ ખાનની ફિલ્મ 'ફેન'ની એક્ટ્રેસ શિખા મલ્હોત્રા હાલ મુંબઈના પરેલમાં આવેલી KEM હોસ્પિટલના ICUમાંથી બહાર આવી છે. અમારા સહયોગી ઈટાઈમ્સે શિખા સાથેની તેની તબિયત વિશે વાત કરી હતી. કોરોના બાદ પેરાલિસિસનો શિકાર થયેલી શિખાએ અશક્ત અવાજમાં કહ્યું, "મેં છેલ્લે 'કાંચલી' ફિલ્મમાં કામ કર્યું હતું અને તે પછીથી કોઈ ફિલ્મ મળી નથી. 'કાંચલી' ફિલ્મ પણ ખૂબ ઓછા લોકોએ જોઈ છે ત્યારે હું ખૂબ તણાવમાં હતી. મર્યાદિત સિનેમાઘરોમાં મારી ફિલ્મ રિલીઝ થઈ હતી અને મને આશા હતી કે OTT પ્લેટફોર્મ પર રિલીઝ થશે પરંતુ એ શક્ય ના બન્યું. 'કાંચલી'માં મેં લીડ રોલ કર્યો છે."

કોરોનાનો શિકાર થયેલી શિખાએ એ સમય યાદ કરતાં કહ્યું, "ઓક્ટોબર મહિનામાં એકાએક મને લાગ્યું કે પગમાં અસહ્ય દુઃખાવો થઈ રહ્યો છે અને વારંવાર છીંક આવતી હતી. મેં કોરોનાનો ટેસ્ટ કરાવ્યો અને મારો ડર સાચો પડ્યો." કોરોનાનો ચેપ કેવી રીતે લાગ્યો તે વિશે વાત કરતાં શિખાએ જણાવ્યું, "મારી મમ્મી નર્સ હતી અને મેં પણ બાલાસાહેબ ઠાકરે ટ્રોમા કેર હોસ્પિટલ (જોગેશ્વરી)માં 6 મહિના સુધી નર્સ તરીકે કામ કર્યું. માર્ચ 2020થી હું કોરોનાના દર્દીઓની વચ્ચે હતી ત્યારે ત્યાંથી ચેપ લાગ્યો હશે તે સ્વાભાવિક છે."

કોરોનાથી સંક્રમિત થયા બાદ શિખાની તબિયત અચાનક જ લથડી હતી. તેણે કહ્યું, "મારું શુગર લેવલ ઘટીને 26 થઈ ગયું હતું. સામાન્ય રીતે આ 100 હોવું જોઈએ. મારા શરીરમાં જરાય તાકાત નહોતી અને ઓક્સિજન લેવલ પણ ઘટી ગયું હતું. હું 10 દિવસ સુધી આર્ટિફિશિયલ ઓક્સિજન પર હતી. જો કે, મારી રિકવરી થઈ અને મને હોસ્પિટલમાંથી રજા આપવામાં આવી. હું મારા કોવિડના ટ્રોમામાંથી માંડ બહાર આવી હતી ત્યાં જ 10 ડિસેમ્બરે મને લાગ્યું કે પગથી માથા સુધીના મારા શરીરના જમણા ભાગમાં જરાય તાકાત નથી. એનાથી પણ ખરાબ સ્થિતિ ત્યારે થઈ જ્યારે મારું જડબું એક તરફ વળી ગયું. મને અંદાજો આવી ગયો કે પેરાલિસિસ થયો છે. ફરીથી હું હોસ્પિટલમાં પહોંચી ગઈ."


હાલની સ્થિતિ વિશે માહિતી આપતાં શિખાએ કહ્યું, "આજે 11 દિવસ હોસ્પિટલમાં રહ્યા પછી હું થોડી વાત કરી શકું છું. મને જલદી જ ડિસ્ચાર્જ કરવામાં આવી શકે છે કારણકે હવે મને ICUની બહાર ખસેડવામાં આવી છે. જો કે, હું હજી પણ ચાલી નથી શકતી અને મારો હાથ પણ મુક્ત રીતે ઊંચો નથી કરી શકતી. ફિઝિયોથેરાપી ચાલુ છે અને થોડો-થોડો ફરક પડી રહ્યો છે."


વિલાપ કરતાં શિખાએ કહ્યું, "હું આશા રાખું છું કે હવે મને કામ મળે. મને નથી ખબર કે બોલિવુડના મોટા પ્રોડ્યુસરોનો સંપર્ક કેવી રીતે કરવો. પરંતુ હું અહીં સારું કામ કરવા માગુ છું. મારા માટે પ્રાર્થના કરજો અને તમારા માધ્યમથી હું વાચકોને કહેવા માગુ છું કે મારી ફિલ્મ 'કાંચલી' જોજો." ઉલ્લેખનીય છે કે, શિખાએ શાહરૂખનની ફિલ્મ 'ફેન'માં ટીવી એન્કરનો રોલ કર્યો હતો. જ્યારે તાપસી પન્નુની ફિલ્મ 'રનિંગ શાદી'માં શિખાએ તાપસીની કોલેજ સિનિયરનો રોલ કર્યો હતો.