કોરોનાની રસી લેનારી પહેલી ભારતીય એક્ટ્રેસ બની શિલ્પા શિરોડકર

2020માં દુનિયાભરમાં કોરોના વાયરસે આતંક મચાવ્યો. કોરોના મહામારીના કારણે લોકોની જીવનશૈલીમાં મોટા ફેરફારો આવ્યા છે. ન્યૂ નોર્મલ સાથે જીવવા ટેવાઈ રહેલા વિશ્વભરના લોકો કોરોના વેક્સીનની આતુરતાથી રાહ જોઈ રહ્યા હતા. ત્યારે હવે કેટલીક કંપનીઓની કોરોના વેક્સીનની મંજૂરી મળી ગઈ છે અને કેટલાક દેશોમાં રસીકરણ શરૂ થઈ ગયું છે. ભારતમાં પણ લોકોને વેક્સીન આપવાની તૈયારી પૂરજોશમાં ચાલી રહી છે. દરમિયાન બોલિવુડ એક્ટ્રેસ શિલ્પા શિરોડકરે (Shilpa Shirodkar) કોરોનાની રસી લઈ લીધી છે.


શિલ્પા શિરોડકર કોરોનાની વેક્સીન લેનારી પહેલી ભારતીય અભિનેત્રી બની છે. શિલ્પાએ દુબઈમાં કોરોનાની રસી લીધી છે. એક્ટ્રેસે પોતાના સોશિયલ મીડિયા અકાઉન્ટ પર તસવીર શેર કરીને આ અંગેની જાણકારી આપી છે. શિલ્પાએ ઈન્સ્ટાગ્રામ પર પોતાની એક તસવીર શેર કરી છે. જેમાં તેની બાજુ પર મેડિકલ ટેપ જોઈ શકાય છે, જે સામાન્ય રીતે ઈંજેક્શન આપ્યા પછી લગાવામાં આવે છે. શિલ્પાએ તસવીર શેર કરતાં લખ્યું, "રસી લીધી અને સુરક્ષિત છું. ન્યૂ નોર્મલ. હું તૈયાર છું 2021❤️ આભાર UAE❤️"


જણાવી દઈએ કે શિલ્પા શિરોડકર એક્ટ્રેસ નમ્રતા શિરોડકરની બહેન છે. શિલ્પાની તસવીર પર અન્ય ફેન્સની સાથે નમ્રતાએ પણ કોમેન્ટ કરી છે. નમ્રતાએ લખ્યું, 'ગુડ ગર્લ💕💕💕' નમ્રતા શિરોડકરે સાઉથના સુપરસ્ટાર મહેશ બાબુ સાથે લગ્ન કર્યા છે. મતલબ કે, શિલ્પા મહેશ બાબુની સાળી છે.


જણાવી દઈએ કે, શિલ્પા શિરોડકરે યૂકેના બેન્કર અપરેશ રંજીત સાથે 2000ની સાલમાં લગ્ન કર્યા હતા. ત્યારબાદથી શિલ્પા પરિવાર સાથે દુબઈમાં રહે છે. શિલ્પા શિરોડકરે 80ના દાયકાના અંતમાં ફિલ્મી કરિયર શરૂ કર્યું હતું. 90ના દશકમાં શિલ્પાએ ઘણાં જાણીતા એક્ટર્સ સાથે ફિલ્મો કરી હતી. શિલ્પાએ ગોવિંદા, અનિલ કપૂર, અમિતાભ બચ્ચન, ચંકી પાંડે, મિથુન ચક્રવર્તી, સુનીલ શેટ્ટી જેવા એક્ટર્સ સાથે કામ કર્યું છે. આ સિવાય તે અમુક ટીવી સીરિયલોમાં પણ જોવા મળી છે.