ઐશ્વર્યાએ સેલિબ્રેટ કર્યો 'પા'નો 78મો બર્થ ડે, પૌત્રી સાથે જોવા મળ્યા બિગ બી

ગઈકાલે બોલિવુડના શહેનશાહ અમિતાભ બચ્ચનનો જન્મદિવસ હતો. તેમના જન્મદિવસ પર બોલિવુડના તમામ સેલેબ્સે તેમજ ફેન્સે સોશિયલ મીડિયા પર તેમને શુભેચ્છા પાઠવી હતી. હવે, બચ્ચન પરિવારની વહુએ બિગ બીના બર્થ ડે સેલિબ્રેશનની કેટલીક તસવીરો ઈન્સ્ટાગ્રામ પર શેર કરી છે.


ઐશ્વર્યા રાયે બે તસવીરો શેર કરી છે. જેમાં પહેલી તસવીરમાં દીકરી આરાધ્યા દાદા સાથે જોવા મળી રહી છે. કેપ્શનમાં લખ્યું છે કે, '🥰❤️લવ યુ દાદાજી💝💖✨ હેપ્પી હેપ્પી બર્થ ડે મારા ડિયર દાદાજી ❤️💝🤗🌟😘🌈🎊💐✨'.


ઐશ્વર્યાએ અન્ય જે તસવીર શેર કરી છે તેમાં તે બિગ બી અને આરાધ્યા સાથે જોવા મળી રહી છે. કેપ્શનમાં લખ્યું છે કે, 'હેપ્પી બર્થ ડે ડિયર દાદાજી-પા. ખૂબ પ્રેમ, તમારા જીવનમાં હંમેશા સુખ-શાંતિ અને ખુશી જળવાઈ રહે...તમારા આશીર્વાદ અમારા પર વરસતા રહે 🙏🌟💖✨'.


ગઈકાલે અભિષેક બચ્ચને પોતાના પિતાના 78મા બર્થ ડે પર તેમની બાળપણની અનસીન તસવીર શેર કરી હતી. જેમાં તેણે લખ્યું હતું કે, 'હેપ્પી બર્થ ડે બી !!! મારા હીરો...લવ યુ પા'.


તો બિગ બીએ પણ ટ્વિટર પર ટ્વીટ કરીને શુભેચ્છા પાઠવનારનો આભાર માન્યો છે. તેમણે લખ્યું છે કે, 'તમે જે પ્રાર્થનાઓ કરી છે તેને શબ્દોમાં વર્ણવી શકું તેમ નથી. આભાર એ નાનો શબ્દ છે', આ સાથે તેમણે ભગવાનની તસવીર પણ શેર કરી હતી.

પ્રોફેશનલ ફ્રંટની વાત કરીએ તો, અમિતાભ બચ્ચન, સાઉથ સુપરસ્ટાર પ્રભાસ અને દીપિકા પાદુકોણ સ્ટારર ફિલ્મમાં જોવા મળશે. આ સિવાય તેમની પાસે બ્રહ્માસ્ત્ર, ચહેરે અને ઝુંડ જેવી ફિલ્મો પણ છે.

જુલાઈ મહિનાની શરુઆતમાં અમિતાભ બચ્ચન અને અભિષેકનો કોરોના રિપોર્ટ પોઝિટિવ આવ્યો હતો. જેના બીજા દિવસે ઐશ્વર્યા અને આરાધ્યાને પણ કોરોના થયો હોવાનું સામે આવ્યું હતું. બિગ બી અને અભિષેકને નાણાવટી હોસ્પિટલમાં દાખલ કરવામાં આવ્યા હતા જ્યારે ઐશ્વર્યા અને આરાધ્યા હોમ ક્વોરન્ટિન થયા હતા. જો કે, થોડા દિવસ બાદ ઐશ્વર્યા અને આરાધ્યાને પણ હોસ્પિટલમાં દાખલ કરવાની જરૂર પડી હતી. જો કે, પરિવાર હવે એકદમ સ્વસ્થ છે. તે સમયે પણ તેમની સુખાકારી માટે દેશભરના ફેન્સે તેમના માટે પ્રાર્થનાઓ કરી હતી.